Ministria e Turizmit dhe Mjedisit dhe Agjencia Kombëtare e Turizmit prezantuan sot Kalendarin Digjital të Eventeve në Turizëm përmes aplikacionit TEA 2.0.
Ministrja e Turizmit dhe Mjedisit, Mirela Kumbaro, në ceremoninë e lancimit të kësaj platforme, në të cilën mori pjesë edhe kryeministri Edi Rama u shpreh se falë kalendarit të eventeve TEA, atraksionet dhe ngjarjet turistike të Shqipërisë kanë pasur një jehonë më të gjerë.
“Falë turizmit, sot Shqipëria e ka më të lehtë që të tregojë bukuritë e saj, njerëzit e saj, energjitë dhe kemi një instrument që na ndihmon, dhe ai është TEA – Kalendari i Eventeve Turistike – i krijuar për herë të parë vitin e kaluar dhe tejkaloi gjithë parashikimet tona më optimiste duke u përqafuar nga mijëra turistë vendas e të huaj. Këtë vit vjen me më shumë opsione, me ambicien për të qenë një udhërrëfyes digjital për eventet turistike, ku tani shtrihen nga janari deri në dhjetor”, u shpreh ministrja Kumbaro.
Ministrja Kumbaro u ndal edhe tek sukseset në shifra të turizmit dhe promovimin e vendit tonë si vendi i nderit i panairit ITB-Berlin 2025.
“Shqipëria po përjeton një moment të bukur në turizëm jo vetëm për rekordin turistëve të huaj, por edhe si destinacioni i këtij viti në arenën ndërkombëtare të kësaj inustrie, si vendi i nderit në Panairin më të rëndësishëm në botë për turizmin ITB-Berlin.
3,3 milionë turistë kemi mikpritur gjatë këtyre pesë muajve të parë, ose rreth 40% më shumë se e njëjta periudhë e një viti më parë duke vërtetuar të gjitha projeksionet e bëra edhe në bashkëpunim me sektorin privat. Hashtagu #Albania në krye të klasifikimit të videove të TikTok duke krijuar më shumë se 3,8 milionë postime, na e përforcon bindjen se në gjithë format e promovimit, patjetër na duhet të fokusohemi tek dixhitalizimi”, u shpreh më tej ministrja Kumbaro duke përfunduar se “ky aplikacion ua bën më të bukura pushimet dhe më të lehtë biznesin”.
Drejtoresha e Agjencisë Kombëtare të Turizmit, Zana Çela prezantoi detajet inovative që TEA 2.0 sjell, në ceremoninë ku të pranishëm ishin edhe kryeministri Edi Rama, guvernatori i Bankës së Shqipërisë Gent Sejko, ministra, kryetarë bashkie, turoperatorë e hotelierë.
Në vitin e dytë të saj, kjo platformë vjen e përmirësuar dhe e pasuruar jo vetëm me evente të turizmit e ngjarje kulturore, por mundëson edhe informacion të plotë të njësive të mikpritjes dhe shërbimeve, si dhe ndërlidhet me faqe të tjera zyrtare që ofrojnë informacione të rëndësishme për turistët, siç janë eTransport, udhërrëfyesit e certifikuar lokalë e kombëtarë, operatorët detarë të licensuar, etj.