Zëvendëskryeministrja, njëherësh Ministrja e Infrastrukturës dhe Energjisë, Belinda Balluku, inspektoi sot punimet në linjën hekurudhore Tiranë-Rinas-Durrës, një nga investimet më të mëdha infrastrukturore në vend.

“Tashmë kemi hyrë në një fazë të avancuar të punimeve për ndërtimin e stacioneve, që e bën këtë projekt akoma më afër realizimit dhe përfundimit të tij”, u shpreh Znj. Balluku.

Aktualisht, puna vijon në 8 kantiere aktive, përfshirë ndërtimin e Stacionit të ri të Trenit në Tiranë, stacioneve në Kashar, Vorë, Sukth, Shkozet dhe rikonstruksionin e stacionit në Durrës. Risi e këtij projekti është ndërtimi i stacionit të ri në Rinas, që do të lidhë drejtpërdrejt aeroportin me rrjetin hekurudhor, si dhe stacioni “Epoka” për të lehtësuar transportin e studentëve.

Stacioni qendror i Tiranës do të ndërtohet me dizajn modern nga arkitektë ndërkombëtarë dhe do të përfshijë ambiente komerciale dhe zyrat e Hekurudhës Shqiptare.

Zëvendëskryeministrja Balluku theksoi rëndësinë e ngritjes së kapaciteteve njerëzore në këtë sektor, duke ndjekur modelin e suksesshëm të trajnimeve në Aviacionin Civil dhe sektorë të tjerë të transportit.

Dorëzimi i trasesë së përfunduar të linjës Tiranë-Rinas-Durrës parashikohet të realizohet brenda tremujorit të parë të vitit 2026, pas së cilës do të fillojë puna për elektrifikimin e linjës, një projekt me vlerë 27 milionë euro.

Ky investim përfaqëson një hap të rëndësishëm drejt modernizimit të transportit publik dhe zhvillimit të qëndrueshëm ekonomik të vendit.