Portal unik për punësimin në sektorin publik, transparencë dhe standardizim i rekrutimit

Qeveria ka prezantuar portalin unik të punësimit në sektorin publik, duke krijuar një pikë të vetme aksesi për të gjitha vendet e lira të punës në administratë.

Platforma puna.gov.al/SektoriPublik konsolidon në një sistem të vetëm shpalljet për shërbimin civil, administratën publike qendrore dhe vendore, institucionet e pavarura dhe shoqëritë me kapital shtetëror mbi 50%, duke adresuar fragmentimin e deritanishëm të informacionit dhe duke ofruar të dhëna të përditësuara në kohë reale për çdo punëkërkues.

Nisma mbështetet në një kuadër të ri rregullator të miratuar në vitin 2026, i cili detyron institucionet të publikojnë vendet e lira jo më vonë se 7 ditë përpara afatit të aplikimit, si dhe të raportojnë numrin e aplikantëve dhe rezultatin përfundimtar brenda 7 ditëve nga përmbyllja e procesit. Kjo synon standardizimin e procedurave, rritjen e transparencës dhe forcimin e llogaridhënies në administratën publike.

Gjatë aktivitetit të prezantimit, ku mori pjesë edhe Kryeministri Edi Rama, u theksua se portali e bën më të lehtë për të rinjtë, të sapodiplomuarit dhe profesionistët të informohen dhe të aplikojnë për mundësitë e punësimit në çdo institucion publik, përmes një procesi të thjeshtuar dhe të aksesueshëm.

Ministrja e Shtetit për Administratën Publike dhe Antikorrupsionin, Adea Pirdeni, e cilësoi këtë iniciativë pjesë të një transformimi të thellë të administratës publike, duke theksuar se synohet rikonceptimi i saj si një strukturë konkurruese në tregun e punës dhe e aftë për të përthithur kapacitetet më të mira njerëzore. Ajo nënvizoi se një nga sfidat kryesore mbetet procesi i integrimit në Bashkimin Evropian, ku administrata luan një rol kyç si në përmbushjen e reformave, ashtu edhe në mbështetjen e negociatave.

Sipas saj, reformat përfshijnë edhe fuqizimin e administratës si punëdhënës konkurrues, përmes rishikimit të sistemit të pagave dhe indeksimit të tyre në përputhje me inflacionin, duke synuar një strukturë më të drejtë dhe më të qëndrueshme për punonjësit publikë. Këto masa, sipas ministres, kanë ndikuar edhe në përmirësimin e vlerësimeve ndërkombëtare, ku Shqipëria renditet ndër vendet lider në rajon në menaxhimin e burimeve njerëzore në administratë.

Nga ana tjetër, Ministrja e Ekonomisë dhe Inovacionit, Delina Ibrahimaj, theksoi se portali përfaqëson një hap konkret drejt standardizimit të rekrutimit në administratën publike, duke garantuar që çdo institucion të publikojë vendet e lira dhe rezultatet në një platformë të vetme. Ajo vuri në dukje se kjo nismë mbështetet nga një kontekst pozitiv ekonomik, ku rritja e qëndrueshme, shtimi i bizneseve të reja dhe rritja e investimeve krijojnë më shumë mundësi punësimi dhe zhvillimi profesional.

Të dhënat paraprake tregojnë një përdorim në rritje të platformës, me rreth 180 institucione që kanë publikuar afro 1500 vende pune gjatë tre muajve të parë të vitit 2026. Për vitin 2026 pritet që mbi 300 institucione të bëhen pjesë e portalit dhe të publikohen rreth 6000 vende të lira pune.

Përmes këtij portali, çdo qytetar mund të regjistrohet si punëkërkues dhe të përfitojë mbështetje nga zyrat e punës, ndërsa procesi i kërkimit bëhet më i shpejtë dhe i personalizuar sipas profesionit, vendbanimit dhe nivelit të arsimit. Nisma synon të rrisë meritokracinë, të tërheqë profesionistët më të mirë dhe të avancojë digjitalizimin e administratës publike, në përputhje me standardet evropiane.