Ministria e Bujqësisë dhe Zhvillimit Rural prezanton dy platforma të përditësuara, aplikacionin “Agritourism AL” dhe faqen e internetit agroturizem.gov.al, të cilat përmbajnë mbi 200 oferta turistike dhe synojnë të zhvillojnë e promovojnë agroturizmin shqiptar.

Përmes këtyre platformave digjitale, vizitorët mund të informohen mbi destinacionet dhe ofertat agroturistike, si dhe të rezervojnë aktivitete të larmishme për të zbuluar pasuritë natyrore, kulturore dhe kulinare të Shqipërisë, ndër të cilat:
• Turi i Verërave – vizita në kantinat me verëra autoktone dhe histori të vreshtave të trashëguara brez pas brezi.
• Turi i Kullave – njohje e kullave karakteristike të veriut, si dëshmi të identitetit kulturor dhe mikpritjes tradicionale.
• Turi i Midhjeve – përvoja kulinare përgjatë brigjeve shqiptare, ku shijohen midhje të freskëta dhe gatime tradicionale.
• Turi i Folklorit – udhëtim në traditat e jugut përmes këngëve, kostumeve, zakoneve dhe artizanatit.

Nga veriu në jug, fermat agroturistike ofrojnë mundësi për të shijuar ushqime tradicionale të përgatitura me produkte të zonës, për të njohur nga afër rutinën e fermerëve dhe për të përjetuar mikpritjen karakteristike shqiptare.

“Agritourism AL” mund të shkarkohet falas në App Store dhe Play Store, ndërsa faqja agroturizem.gov.al shërben si një dritare informuese për të gjitha destinacionet dhe ofertat agroturistike në mbarë Shqipërinë.