Zëvendëskryeministrja, njëherësh Ministrja e Infrastrukturës dhe Energjisë, Belinda Balluku, njoftoi se shumë shpejt do të nisë ndërtimi i parkut eolik në Tropojë, një projekt i konsideruar ndër më të rëndësishmit në Evropë dhe i mbështetur nga një nga kompanitë më të mëdha amerikane. Në fjalën e saj në panelin me temën “Prioritetet ekonomike dhe projektet kyçe”, zhvilluar në kuadër të konferencës 3-ditore të ambasadorëve shqiptarë në Tiranë, Balluku theksoi se projekti ndodhet aktualisht në fazën e procedurave të autorizimit dhe financimit.

Parku eolik në Tropojë do të jetë një nga projektet kyçe të strategjisë kombëtare për tranzicionin e gjelbër, duke kontribuar në qëllimin afatgjatë të Shqipërisë për ta bërë energjinë e rinovueshme një shtyllë të zhvillimit ekonomik. Ky projekt do të përqendrohet në rritjen e kapaciteteve të ripërtëritshme dhe do të hapë mundësi të reja investimi për kompanitë ndërkombëtare.

“Shqipëria është duke ecur me hapa të shpejtë drejt një të ardhmeje më të qëndrueshme dhe të gjelbër. Ky projekt në Tropojë është një shembull konkret i angazhimit tonë për të ofruar burime energjetike të pastra dhe të rinovueshme, duke siguruar një ndikim pozitiv në ekonominë tonë dhe në rajon”, deklaroi Balluku.

Shqipëria ka arritur të gjashtëfishojë prodhimin e energjisë së gjelbër falë futjes së parqeve fotovoltaike, të cilat përbëjnë tashmë 30% të portofolit energjetik. Sipas saj, vendi po lë pas varësinë e vetme nga hidrocentralet dhe, që prej vitit 2019, ka ndjekur një strategji kombëtare për diversifikimin e burimeve të rinovueshme. Ajo nënvizoi se Korridori VIII nuk është vetëm një rrugë apo hekurudhë, por gjithashtu një korridor energjetik i rëndësishëm, ku Shqipëria po pozicionohet si aktor kyç në rajon.

Zëvendëskryeministrja vuri në dukje se klima e investimeve në Shqipëri është përmirësuar ndjeshëm falë transparencës së proceseve administrative dhe përafrimit me standardet evropiane. Ajo solli si shembull prezencën e kompanive ndërkombëtare franceze si Voltaia dhe Total, por edhe të korporatave amerikane, që kanë investuar në energji, telekomunikacion dhe industri përpunuese.

“Projekte të mëdha infrastrukturore dhe energjetike, të tilla si këto, jo vetëm që kontribuojnë në zhvillimin e ekonomisë shqiptare, por janë gjithashtu projekte rajonale të rëndësishme, që ndihmojnë në forcimin e lidhjeve dhe bashkëpunimit në Ballkanin Perëndimor. Pozita gjeografike e Shqipërisë gjithashtu e bën atë një portë hyrëse për vendet e Ballkanit në Bashkimin Evropian”, deklaroi Balluku.