Igli Tafa në krye të AKSHI-t, Ibrahimaj: Shqipëria ndër liderët e qeverisjes digjitale, vijon puna për e-Albania 2.0

Gjatë prezantimit të Igli Tafës si drejtori i ri i Agjencisë Kombëtare të Shoqërisë së Informacionit (AKSHI) nga Kryeministri Edi Rama, Ministrja e Ekonomisë dhe Inovacionit, Delina Ibrahimaj, vlerësoi arritjet e institucionit në fushën e qeverisjes digjitale, duke theksuar se Shqipëria renditet ndër vendet me nivelin më të lartë të ofrimit të shërbimeve publike elektronike.

Sipas saj, transformimi digjital ka ndërtuar një administratë më transparente, më të shpejtë dhe më efikase, me kosto më të ulët për qytetarët dhe bizneset.

Ibrahimaj nënvizoi se puna po vijon për platformën e-Albania 2.0, e cila synon të ofrojë shërbime proaktive dhe të shtrihet edhe në pushtetin vendor.

Igli Tafa merr drejtimin e AKSHI-t në një moment kur institucioni konsiderohet një nga asetet kryesore të shtetit në fushën e inovacionit dhe teknologjisë, ndërsa objektivat për vitin 2026 mbeten ambicioze në drejtim të thellimit të reformës digjitale.