Ministrja e Shëndetësisë: Pajisje të fjalës së fundit dhe digjitalizim i bankave të gjakut në gjithë Shqipërinë

Transformim i qendrës së dhurimit dhe bankës të gjakut, pajisje të teknologjisë së lartë, rikonstruksion i plotë i godinës, por edhe riorganizim i shërbimeve, janë të parashikuara në investimin që pritet të përfundojë brenda këtij viti në Qendrën Kombëtare të Transfuzionit të Gjakut. Gjatë inspektimit të punimeve, Ministrja e Shëndetësisë dhe Mbrojtjes Sociale Ogerta Manastirliu u shpreh se ndërhyrja e plotë në strukturën e godinës, do të mundësojë ngritjen e një qendre dinjitoze dhe bashkëkohore të cilësisë të lartë, e cila do të plotësohet me shërbimet laboratorike, të përpunimit dhe menaxhimit të bankës së gjakut, sipas standardeve evropiane.

“Brenda 6 mujorit të këtij viti do të kemi përfundim të punimeve të infrastrukturës, ndërkohë që do të vijojmë edhe me pajisjet biomjekësore, por edhe mobilimin e Qendrës së Transfuzionit të Gjakut. Jam e bindur që kjo do të rrisë shumë cilësinë e shërbimit në të gjithë vendin, sepse kjo qendër koordinon në rang kombëtar të gjithë nevojat për transfuzionin e gjakut. Por nga ana tjetër do të bëjë që ne të ngrihemi në një nivel më të lartë përsa i përket kërkimit shkencor dhe rritjes së kapaciteteve të burimeve tona njerëzore”, tha Ministrja Ogerta Manastirliu gjatë inspektimit të punimeve.

Pjesa e parë e investimit nga buxheti i shetit do të shkojë për rikonstruksionin e godinës së ndërtuar në vitin 1982, për ta kthyer këtë qendër në një institucion dinjitoz për qytetarët, por edhe për punonjësit e shëndetësisë. Është parashikuar rritja e kapaciteteve pritëse të dhurimit, përmirësimi i kushteve dhe ciklit të punës që nga regjistrimi, deri te marrja e përgjigjeve në kohë reale.

Në përfundim të periudhës 17 mujore, sa është parashikuar zgjatja e punimeve, një fond tjetër do të shkojë për pajisjen e Qendrës me aparatura të teknologjisë së lartë.

“Sa i përket laboratorëve specifikë të qendrës, puna është fokusuar tek rritja e cilësisë, por edhe e sigurisë së dhurimeve dhe e përpunimit të gjakut”, ka thënë ministrja Manastirliu. “Një tjetër fazë e rëndësishme e këtij projekti është ajo e dixhitalizimit të bankave të gjakut, punë që ka filluar tashmë dhe që do të shtrihet në gjithë Shqipërinë. Kjo do të na mundësojë të sigurojmë në kohë reale informacion, sa i kemi dhurimet, si menaxhohet kjo sasi, garantohet cilësia dhe siguria që ne duhet t’i ofrojmë të gjithë qytetarëve”.

Në të njëjtën kohë ka nisur puna për sigurimin e pajisjeve biomjekësore dhe rikonstruksionin edhe të Qendrës së Transfuzioneve, investime që pritet të rrisin cilësinë e shërbimit në të gjithë vendin sepse kjo qendër koordinon në rang kombëtar të gjithë nevojat për transfuzionin e gjakut.

Investimi në Qendrën Kombëtare të Transfuzionit të Gjakut pritet të rrisë edhe kapacitetet e burimeve njerëzore të shërbimit shëndetësor, por edhe do të çojë në një tjetër nivel edhe kërkimin shkencor në këtë fushë.