Në kantierin e një prej veprave të mezipritura nga e gjithë shqiptaria, Rrugës së Arbrit, – punohet pa ndërprerje për të sfiduar gjeologjinë tejet të pafavorshme që karakterizon zonën, duke sjellë shtyrjen e përfundimit të plotë të rrugës.

Tuneli i Murrizit është një nga pjesët më të vështirë, ku progresi në gërmim ka qenë dukshëm më i ulët krahasuar me vepra të tjera, për shkak të problematikave të shumta gjeologjike. Ky tunel ka nisur në 2019 dhe do të përfundojë në 2024, ndërsa tuneli i Llogarasë, i cili përfundon në qershor 2024 ka nisur shumë më vonë se sa ky, por duke pasur një gjeologji shumë më të favorshme në Llogara, e njëjta kompani ecën me rreth 20 metra në ditë, ndërkohë që në Murriz përparon me afro 2 metra në ditë.

Kryeministri Edi Rama inspektoi sot në terren ecurinë e punës për tunelin e Murrizit, ku përfundoi procesi i gërmimit dhe dalja e dritës nga bashkimi i dy anëve të kantierit ishte çasti më i shumëpritur i një pune të tejet sfiduese.

“Ndodhemi në tunelin kryesor të Murrizit. Një tunel i përbërë nga dy tuba. Ndodhemi në tubin kryesor, ndërkohë që tubi tjetër është tubi ndihmës, lidhen me njëri tjetrin me 11 nyje lidhëse, 3 prej të cilave janë më të gjëra dhe kanë mundësi shkëmbimi. Gjatësia e këtij tuneli është 3789 metra, ndërkohë e tunelit ndihmës 3781 metra. Lartësia këtu është 6.8 metra, ndërkohë që tuneli ndihmës është 4.2 metra. Ka qenë një vepër me infrastrukturë jashtëzakonisht sfiduese. E kemi nisur këtë tunel në maj të vitit 2019, ndërkohë tunelin ndihmës e kemi nisur në korrik të 2019.  Na është dashur të përballemi me shumë sfida, pasi gjeologjia është totalisht e paqëndrueshme dhe volumet e kërkimit kanë qenë të mëdha.

Janë përdorur më shumë se 26 ton hekur, pasi ka qenë shumë  e nevojshme që të strukturoren në mënyrë të tillë për të qëndruar.  Ka patur një angazhim shumë të madh nga të gjitha grupet që kanë qenë duke punuar. Kemi patur katër fronte që kanë qenë duke punuar dhe nga përllogaritje na janë dashur më shumë se 1400 ditë për tunelin e vogël dhe më shumë se 1600 ditë për këtë tunel.

Sot jemi në fazën finale praktikisht. Kemi nisur nga e premtja e shkuar që të shohim dritë nga ana tjetër dhe sot është përfundimi dhe këtu hapen dhe mbarojmë përfundimisht gërmimet.” – detajoi Zëvendëskryeministrja Balluku.

Nga ana e tij, Kryeministri Rama vlerësoi punën me ritme të përshpejtuara dhe vuri theksin tek cilësia e punimeve. “Ishte një shenjë e mirë që u hap para se të mbarojë viti se këtë ne nuk e prisnim. Ishte përshpejtim!  Thjeshtë ta mbarojmë me kulmin e cilësisë, pastaj kur të mbarojë të mbarojë. Brenda viti tjetër s’diskutohet, por le t’ia lëmë dhe pak fatit këtu se këtu çfarë s’kemi parë. Tani gjithësi është më në kontroll puna”. –u shpreh kryeministri Rama.