Reforma në menaxhimin e integruar të mbetjeve dhe një plan masash ligjore e investimesh, si domosdoshmëri në rrugën e anëtarësimit të Shqipërisë në BE – ishin në fokus të takimit të sotëm të zhvilluar me pushtetin vendor, nën drejtimin e Kryeministrit Rama dhe Ministres së Turizmit dhe Mjedisit Mirela Kumbaro.

“Dëshiroj që të gjithë pa përjashtim në të gjitha nivelet dhe në të gjithë territorin që kanë një funksion publik si të zgjedhur apo si nëpunës të këtij shteti të lidhur me të gjitha çështjen e mjedisit të vetëdijesohen se ky është kapitulli më sfidues i negociatave dhe është aspekti më sfidues i anëtarësimit tonë në BE.” – theksoi kryeministri Rama në fjalën e tij, teksa bëri të ditur se qeveria do të parashtrojë një paketë të re reformash dhe masash, ku një rëndësi të posaçme merr projektligji i ri “Për menaxhimin e integruar të mbetjeve”, i cili parashikon krijimin e Operatorit Kombëtar të Trajtimit të Mbetjeve.

“Ne do të çojmë përpara një paketë të re reformash dhe masash për të cilat dua të them se së pari është projektligji i ri për menaxhimin e integruar të mbetjeve, ku kemi parashikuar krijimin e Operatorit Kombëtar të Trajtimit të mbetjeve, një agjenci, një institucion, një ndërmarrje e re, e cila do të jetë në dispozicion të gjithë Republikës, do të jetë patjetër në dispozicion të pushtetit vendor, do të jetë në dispozicion të qytetarëve, do të jetë në dispozicion të këtij misioni për anëtarësimin e Shqipërisë në Be, duke përqendruar të gjithë procesin e trajtimit të mbetjeve, pra e grumbullimit dhe trajtimit të mbetjeve, që nuk do të jetë më një proces i administruar nga bashkitë, por do të jetë një proces i administruar nga ky operator kombëtar, në bashkëpunim me të gjitha hallkat e tjera të qeverisjes dhe ku në raport me të cilin, bashkitë do të jenë klient njësoj siç janë klientë të operatorëve të tjerë për të tjera shërbime.” – theksoi Kryeministri lidhur me këtë risi.

Ndër të tjera ligji i ri i përgjigjet një tjetër sfide, asaj të përafrimit me direktivat e BE. Lidhur me këtë aspekt, Kryeministri tha se “Ky ligj i ri praktikisht merr përsipër të bëjë këtë gjë, të përafrojë direktivat e Bashkimit Europian 100% me legjislacionin shqiptar”.