Sistemi i kalimit kufitar e-Gate shtrihet në portet e Durrësit dhe Sarandës verën e ardhshme

Sistemi elektronik i kalimit kufitar e-Gate, që ka shpejtuar kontrollet në Aeroportin e Rinasit, pritet të vendoset edhe në Portin e Durrësit dhe në Portin e Sarandës, me synim funksionimin e tij brenda sezonit turistik të verës së ardhshme. Vendimi u konfirmua gjatë një inspektimi në Rinas nga Ministrja e Punëve të Brendshme, Albana Koçiu dhe Drejtori i Policisë së Shtetit, Ilir Proda.

Sipas të dhënave të ministrisë, vetëm gjatë 10 muajve të parë të vitit, më shumë se 10 milionë qytetarë kanë kaluar kufirin përmes e-Gate, duke reduktuar radhët dhe duke përshpejtuar procedurat hyrëse dhe dalëse.

Ministrja Koçiu tha se zgjerimi i sistemit në portet kryesore vjen për të garantuar të njëjtin standard shërbimi për udhëtarët që lëvizin me linja detare. “Do ta bëjmë efektiv që në muajt e verës së sezonit të ardhshëm, për t’u shërbyer me të njëjtin standard edhe qytetarëve që lëvizin nëpërmjet detit,” u shpreh ajo.

Ndërkohë, Drejtori i Policisë së Shtetit, Ilir Proda, theksoi se e-Gate ka qenë vendimtar për përballimin e fluksit të lartë të pasagjerëve, me aeroportin që pritet të arrijë deri në 12 milionë udhëtarë këtë vit. Sipas tij, modernizimi ka përmirësuar si shërbimin ndaj qytetarëve, ashtu edhe menaxhimin e sigurisë kufitare.

Shtrirja e sistemit në dy portet kryesore detare konsiderohet një hap tjetër në modernizimin e menaxhimit të kufijve, duke e afruar Shqipërinë me standardet evropiane në shërbimet kufitare dhe turistike.