Vendime të miratuara në mbledhjen e Këshillit të Ministrave, datë 18 Maj 2022:
V E N D I M
PËR
PËRCAKTIMIN E KËRKESAVE DHE KUSHTEVE, QË DUHET TË PLOTËSOJË NJË STANDARD MATJEJE PËR T’U DEKLARUAR ETALON KOMBËTAR MATJEJE
Në mbështetje të nenit 100 të Kushtetutës dhe të pikës 5, të nenit 12, të ligjit nr.126/2020, “Për metrologjinë”, me propozimin e ministrit të Financave dhe Ekonomisë, Këshilli i Ministrave
V E N D O S I:
I. DISPOZITA TË PËRGJITHSHME
1. Deklarimi si etalon kombëtar matjeje ka si synim arritjen e gjurmueshmërisë metrologjike, në kuadër të mirëpërcaktimit, riprodhimit, realizimit dhe ruajtjes së njësive bazë të matjes të Sistemit Ndërkombëtar të Njësive të Matjes (SI), përfshirë shumëfishat dhe nënfishat e tyre, në përputhje me përparësitë e përcaktuara në planin afatgjatë për zhvillimin e etaloneve kombëtare të matjeve, të miratuar nga ministria përgjegjëse për ekonominë, në zbatim të pikës 4, të nenit 12, të ligjit nr.126/2021, “Për metrologjinë”.
2. Përveç përkufizimeve të dhëna në nenin 3, të ligjit nr.126/2020, “Për metrologjinë”, termat në vijim kanë këto kuptime:
a) “CIPM MRA”, një marrëveshje ndërkombëtare për njohjen reciproke të etaloneve kombëtare të matjes dhe certifikatave të kalibrimit dhe matjeve, të lëshuara nga institucionet kombëtare të metrologjisë, e miratuar nga Komiteti Ndërkombëtar i Peshave dhe Masave nën autoritetin e Konventës së Metrit;
b) “CMC”, aftësitë matëse dhe kalibruese të njohura ndërkombëtarisht sipas CIPM MRA-së, të cilat ruhen në bazën e të dhënave të Byrosë Ndërkombëtare të Peshave dhe Masave (në vijim, BIPM). CMC-ja e miratuar dhe të dhënat teknike mbështetëse janë të disponueshme publikisht në batabazën e të dhënave (KCDB), sipas CIPM MRA-së;
c) “Fusha e njohjes”, fusha e një njësie matjeje individuale të Sistemit Ndërkombëtar të Njësive të Matjes (SI), për sa u takon madhësive fizike, dhe fusha e matjeve referencë e disa mostrave për të përcaktuar parametrat e një substance, duke përfshirë përcaktimin e parametrave të matur;
ç) “Krahasim ndërkombëtar ndërlaboratorik”, një krahasim, në të cilin një laborator krahason aftësitë e tij matëse në një fushë të caktuar dhe për një madhësi të caktuar me aftësitë matëse të laboratorëve të tjerë në nivel ndërkombëtar. Këto janë krahasime ndërlaboratorike brenda BIPM-së dhe krahasime ndërlaboratorike brenda Organizatës Rajonale Evropiane të Metrologjisë (EURAMET), ose krahasime rajonale ndërlaboratorike, nëse ato përfshijnë të paktën një institut të huaj të metrologjisë, që është anëtar me të drejta të plota i EURAMET-it ose i njërës prej organizatave të tjera rajonale metrologjike;
d) “Vlerë referencë”, vlera që jepet nga një laborator, në përputhje me një procedurë të qartë matjeje të njohur e validuar, që siguron gjurmueshmërinë e kësaj vlere te njësitë e Sistemit Ndërkombëtar të Njësive të Matjes (SI).
II. KËRKESAT DHE KUSHTET PËR NJOHJEN E NJË ETALONI KOMBËTAR TË MATJES
1. Një standard matjeje të njihet si etalon kombëtar për një fushë të caktuar matjeje, kur plotëson këto kërkesa:
1.1. E siguron gjurmueshmërinë metrologjike nëpërmjet:
a) kalibrimit të rregullt periodik në nivel ndërkombëtar deri te Sistemi Ndërkombëtar i Njësive të Matjes (SI); ose
b) rezultatit të një krahasimi kyç ndërlaboratorik ndërkombëtar, në rastet kur bëhet fjalë për realizim primar të një etaloni; ose
c) transferimit të vlerës referencë, duke përdorur metoda referencë, kur bëhet fjalë për material referues.
1.2. Zotëron karakteristikat më të mira metrologjike lidhur me diapazonin e matjes, saktësinë dhe pasigurinë e matjes në Republikën e Shqipërisë, e dokumentuar kjo nëpërmjet aftësive matëse dhe kalibruese (CMC) të akredituara nga një trupë akreditimi nënshkruese e një marrëveshjeje shumëpalëshe për njohjen reciproke të dokumenteve të akreditimit për kalibrimin e testimin, në përputhje me standardin për kompetencën teknike të laboratorëve të testimit dhe kalibrimit, ISO/IEC 17025:2017; dhe raporteve të pjesëmarrjes periodike në krahasime ndërlaboratorike ose teste të zotësisë, të organizuara në përputhje me kërkesat e standardit SSH ISO/IEC 17043:2010 “Vlerësimi i konformitetit – kërkesa të përgjithshme për testet e zotësisë”.
2. Një etalon matjeje, që plotëson kërkesat e pikës 1, të këtij kreu, deklarohet etalon kombëtar matjeje, kur institucioni mbajtës i tij plotëson këto kushte:
2.1. I përdor etalonet e matjes vetëm për sigurimin e gjurmueshmërisë metrologjike për etalonet e tjera të nivelit më të ulët dhe, nga përdorimi i tij, lëshon vetëm certifikata dhe raporte të akredituara nga një trupë akreditimi, nënshkruese e një marrëveshjeje shumëpalëshe për njohjen reciproke të dokumenteve të akreditimit për kalibrimin e testimin, në përputhje me standardin për kompetencën teknike të laboratorëve të testimit dhe kalibrimit, SSH ISO/IEC 17025:2017;
2.2. I përdor etalonet e matjes për kërkimin dhe zhvillimin shkencor për fushën përkatëse të matjeve, me qëllim përmirësimin e parametrave të tij metrologjikë.
3. Nuk lejohet përdorimi i etalonit kombëtar për kalibrime dhe matje, që mund të kryhen me etalone të një niveli më të ulët të saktësisë.
4. Për një fushë të caktuar të matjeve të njihet dhe të deklarohet vetëm një etalon kombëtar.
5. Laboratori mbajtës i një etaloni kombëtar matjeje ka përgjegjësi të plotë për rezultatet e kalibrimeve dhe matjeve që kryen.
III. DISPOZITA TË FUNDIT
1. Vendimi nr.1160, datë 13.8.2008, i Këshillit të Ministrave, “Për miratimin e rregullores për etalonet kombëtare të matjes”, shfuqizohet.
2. Ngarkohet Drejtoria e Përgjithshme e Metrologjisë për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
PËRCAKTIMIN E INSTITUCIONIT PËRGJEGJËS PËR MBIKËQYRJEN DHE KONTROLLIN E PRODHIMIT, IMPORTIMIT, EKSPORTIMIT, RUAJTJES, TREGTIMIT DHE PËRDORIMIT TË PRODUKTEVE PLEHËRUESE
Në mbështetje të nenit 100 të Kushtetutës dhe të nenit 22, të ligjit nr.17/2020, “Për produktet plehëruese”, me propozimin e ministrit të Bujqësisë dhe Zhvillimit Rural, Këshilli i Ministrave
V E N D O S I:
1. Caktimin e Autoritetit Kombëtar të Ushqimit si institucioni përgjegjës për mbikëqyrjen dhe kontrollin e prodhimit, importimit, eksportimit, ruajtjes, tregtimit dhe përdorimit të produkteve plehëruese.
2. Ngarkohen Ministria e Bujqësisë dhe Zhvillimit Rural dhe Autoriteti Kombëtar i Ushqimit për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
MIRATIMIN, NË PARIM, TË MARRËVESHJES NDRYSHUESE ME SHKËMBIM LETRASH, TË MARRËVESHJES SË HUAS, NDËRMJET REPUBLIKËS SË SHQIPËRISË DHE BANKËS EVROPIANE PËR RINDËRTIM DHE ZHVILLIM, PËR FINANCIMIN E KONEKTIVITETIT TË RRUGËVE RAJONALE DHE LOKALE NË SHQIPËRI, RATIFIKUAR ME LIGJIN NR.44/2020
Në mbështetje të nenit 100 të Kushtetutës dhe të neneve 10, 12 e 23, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Financave dhe Ekonomisë, Këshilli i Ministrave
V E N D O S I:
Miratimin, në parim, të marrëveshjes ndryshuese me shkëmbim letrash, të marrëveshjes së huas, ndërmjet Republikës së Shqipërisë dhe Bankës Evropiane për Rindërtim dhe Zhvillim, për financimin e konektivitetit të rrugëve rajonale dhe lokale në Shqipëri, ratifikuar me ligjin nr.44/2020, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
***
V E N D I M
PËR
NJË NDRYSHIM NË VENDIMIN NR.45, DATË 22.1.2020, TË KËSHILLIT TË MINISTRAVE, “PËR SHPALLJEN E ZONËS SË RE PËR ZHVILLIM NË NJËSINË ADMINISTRATIVE SHIJAK, BASHKIA SHIJAK, DHE CAKTIMIN E FONDIT SHQIPTAR TË ZHVILLIMIT SI NJËSI ZBATUESE”
Në mbështetje të nenit 100 të Kushtetutës dhe të neneve 13, shkronja “b”, nënndarjet “iii” e “iv”, dhe 16, pika 3, të aktit normativ nr.9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”, miratuar me ligjin nr.97/2019, me propozimin e Zëvendëskryeministrit dhe ministër i Shtetit për Rindërtimin dhe Programin e Reformave, Këshilli i Ministrave
V E N D O S I:
1. Harta dhe koordinatat, që i bashkëlidhen vendimit nr.45, datë 22.1.2020, të Këshillit të Ministrave, zëvendësohen, përkatësisht, me hartën dhe koordinatat, që i bashkëlidhen këtij vendimi.
2. Ngarkohen Zëvendëskryeministri dhe ministër i Shtetit për Rindërtimin dhe Programin e Reformave, Fondi Shqiptar i Zhvillimit, Bashkia Shijak dhe Agjencia Kombëtare e Planifikimit të Territorit për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
NJË NDRYSHIM NË VENDIMIN NR.113, DATË 17.2.2021, TË KËSHILLIT TË MINISTRAVE, “PËR MIRATIMIN E DOKUMENTIT UDHËZUES TË POLITIKAVE MBI ZONAT E PËRCAKTUARA PËR AKUAKULTURË (ZPA) NË SHQIPËRI”
Në mbështetje të nenit 100 të Kushtetutës dhe të pikës 2, të nenit 5, të ligjit nr.103/2016, “Për akuakulturën”, të ndryshuar, me propozimin e ministrit të Bujqësisë dhe Zhvillimit Rural, Këshilli i Ministrave
V E N D O S I:
1. Në dokumentin udhëzues të politikave mbi zonat e përcaktuara për akuakulturë (ZPA) në Shqipëri, bashkëlidhur vendimit nr.113, datë 17.2.2021, të Këshillit të Ministrave, dhe pjesëve përbërëse të tij, tabela 2 dhe figura nr.1 zëvendësohen përkatësisht me tabelën 2 dhe figurën nr.1, që i bashkëlidhen këtij vendimi.
2. Ngarkohet Ministria e Bujqësisë dhe Zhvillimit Rural për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
DISA NDRYSHIME DHE SHTESA NË VENDIMIN NR.24, DATË 14.1.2015, TË KËSHILLIT TË MINISTRAVE, “PËR MIRATIMIN E STRUKTURËS DHE MËNYRËS SË FUNKSIONIMIT E ORGANIZIMIT TË AGJENCISË KOMBËTARE TË BARNAVE DHE PAJISJEVE MJEKËSORE”, TË NDRYSHUAR
Në mbështetje të nenit 100 të Kushtetutës, të nenit 17, të ligjit nr.105/2014, “Për barnat dhe shërbimin farmaceutik”, dhe të nenit 6, të ligjit nr.89/2014, “Për pajisjet mjekësore”, me propozimin e ministrit të Shëndetësisë dhe Mbrojtjes Sociale, Këshilli i Ministrave
V E N D O S I:
1. Në vendimin nr.24, datë 14.1.2015, të Këshillit të Ministrave, të ndryshuar, bëhen këto ndryshime dhe shtesa:
a) Në pikën 1, fjalët “… sipas strukturës që i bashkëlidhet këtij vendimi …” zëvendësohen me “… sipas strukturës dhe organikës, të përcaktuara në skemat 1 dhe 2, që i bashkëlidhen këtij vendimi …”.
b) Pas pikës 5 shtohet pika 5/1, me këtë përmbajtje:
“5.1. Rregullorja për organizimin dhe funksionimin e Agjencisë Kombëtare të Barnave dhe Pajisjeve Mjekësore miratohet me urdhër të ministrit përgjegjës për shëndetësinë.”.
c) Shkronja “c”, e pikës 7, shfuqizohet.
ç) Shkronja “dh”, e pikës 7, ndryshohet, si më poshtë vijon:
“dh) miraton përshkrimet e punës për të gjithë punonjësit e Agjencisë.”.
d) Skemat 1 dhe 2 zëvendësohen me skemat me të njëjtin numër e titull, që i bashkëlidhen këtij vendimi.
2. Ngarkohen Ministria e Shëndetësisë dhe Mbrojtjes Sociale dhe Agjencia Kombëtare e Barnave dhe Pajisjeve Mjekësore për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
DISA NDRYSHIME DHE SHTESA NË VENDIMIN NR.279, DATË 12.5.2021, TË KËSHILLIT TË MINISTRAVE, “PËR PËRDORIMIN E FONDIT TË RINDËRTIMIT, PËR FINANCIMIN E RINDËRTIMIT TË OBJEKTIT SOCIAL-KULTUROR, PALLATI I KULTURËS, BASHKIA SHIJAK, DHE CAKTIMIN E BASHKISË SHIJAK SI NJËSI ZBATUESE”
Në mbështetje të nenit 100 të Kushtetutës, të neneve 13, shkronja “b”, nënndarjet “i” dhe “iii”, 16 e 36, të aktit normativ nr.9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”, miratuar me ligjin nr.97/2019, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 7, të ligjit nr.115/2021, “Për buxhetin e vitit 2022”, të ndryshuar, me propozimin e Zëvendëskryeministrit dhe ministër i Shtetit për Rindërtimin dhe Programin e Reformave, Këshilli i Ministrave
V E N D O S I:
I. Në vendimin nr.279, datë 12.5.2021, të Këshillit të Ministrave, bëhen këto ndryshime dhe shtesa:
1. Pika 1 ndryshohet, si më poshtë vijon:
“1. Përdorimin e fondit të rindërtimit, në masën 192 687 839 (njëqind e nëntëdhjetë e dy milionë e gjashtëqind e tetëdhjetë e shtatë mijë e tetëqind e tridhjetë e nëntë) lekë pa TVSH, për financimin e rindërtimit, mbikëqyrjes dhe kolaudimit të objektit social-kulturor, Pallati i Kulturës, Bashkia Shijak.”.
2. Pas pikës 2 shtohet pika 2/1, me këtë përmbajtje:
“2/1. Bashkisë Shijak, në buxhetin e miratuar për vitin 2022, i transferohet fondi në masën 2 086 701 (dy milionë e tetëdhjetë e gjashtë mijë e shtatëqind e një) lekë pa TVSH, për financimin e rindërtimit, mbikëqyrjes dhe kolaudimit të objektit social-kulturor, Pallati i Kulturës, Bashkia Shijak, në formën e transfertës së pakushtëzuar.”.
3. Pika 3 ndryshohet, si më poshtë vijon:
“3. Caktimin e Bashkisë Shijak si njësi zbatuese për rindërtimin, mbikëqyrjen dhe kolaudimin e objektit social-kulturor, Pallati i Kulturës, Bashkia Shijak.”.
II. Ngarkohen Zëvendëskryeministri dhe ministër i Shtetit për Rindërtimin dhe Programin e Reformave, Ministria e Financave dhe Ekonomisë dhe Bashkia Shijak për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
KALIMIN TE BASHKITË SHIJAK, KAMZË, KAVAJË DHE KRUJË TË NJËSIVE INDIVIDUALE TË BANIMIT
Në mbështetje të nenit 100 të Kushtetutës dhe të pikës 6, të nenit 21, të aktit normativ nr.9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”, miratuar me ligjin nr.97/2019, me propozimin e Zëvendëskryeministrit dhe ministër i Shtetit për Rindërtimin dhe Programin e Reformave, Këshilli i Ministrave
V E N D O S I:
1. Kalimin te bashkitë Shijak, Kamzë, Kavajë dhe Krujë të 272 (dyqind e shtatëdhjetë e dy) njësive individuale të banimit, përkatësisht, sipas listave të inventarit, që i bashkëlidhen këtij vendimi, detajuar, si më poshtë vijon:
a) Bashkia Shijak 27 (njëzet e shtatë) njësi individuale banimi;
b) Bashkia Kamzë 29 (njëzet e nëntë) njësi individuale banimi;
c) Bashkia Kavajë 15 (pesëmbëdhjetë) njësi individuale banimi;
ç) Bashkia Krujë 201 (dyqind e një) njësi individuale banimi.
2. Ngarkohen Zëvendëskryeministri dhe ministër i Shtetit për Rindërtimin dhe Programin e Reformave, Fondi Shqiptar i Zhvillimit dhe bashkitë Shijak, Kamzë, Kavajë dhe Krujë për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
KALIMIN TE BASHKITË DURRËS, KAVAJË DHE KRUJË TË OBJEKTEVE ARSIMORE
Në mbështetje të nenit 100 të Kushtetutës dhe të pikës 6, të nenit 21, të aktit normativ nr.9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”, miratuar me ligjin nr.97/2019, me propozimin e Zëvendëskryeministrit dhe ministër i Shtetit për Rindërtimin dhe Programin e Reformave, Këshilli i Ministrave
V E N D O S I:
1. Kalimin te bashkitë Durrës, Kavajë dhe Krujë të 7 (shtatë) objekteve arsimore, sipas listave të inventarit që i bashkëlidhen këtij vendimi.
2. Ngarkohen Zëvendëskryeministri dhe ministër i Shtetit për Rindërtimin dhe Programin e Reformave, Fondi Shqiptar i Zhvillimit dhe bashkitë Durrës, Kavajë dhe Krujë për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
ORGANIZIMIN DHE FUNKSIONIMIN E DREJTORISË SË PËRGJITHSHME TË METROLOGJISË
Në mbështetje të nenit 100 të Kushtetutës, të nenit 6, të ligjit nr.90/2012, “Për organizimin dhe funksionimin e administratës shtetërore”, dhe të pikës 2, të nenit 6, të ligjit nr.126/2020, “Për metrologjinë”, me propozimin e ministrit të Financave dhe Ekonomisë, Këshilli i Ministrave
V E N D O S I:
I. DISPOZITA TË PËRGJITHSHME
1. Organizimin dhe funksionimin e Drejtorisë së Përgjithshme të Metrologjisë (në vijim, DPM) si person juridik publik buxhetor, i specializuar për metrologjinë, në varësi të ministrit përgjegjës për ekonominë (në vijim, ministri), me seli në Tiranë.
2. DPM-ja financohet nga buxheti i shtetit. Buxheti i DPM-së është pjesë e buxhetit të ministrisë përgjegjëse për ekonominë.
3. DPM-ja, si institucioni kombëtar shtetëror për metrologjinë në Republikën e Shqipërisë, ka si mision të sigurojë rregullimin e sistemit kombëtar të metrologjisë në Shqipëri dhe të kërkesave për të kryer veprimtaritë në metrologjinë shkencore, industriale dhe atë ligjore.
4. DPM-ja e shtrin veprimtarinë në të gjithë territorin e Republikës së Shqipërisë në këto fusha përgjegjësie:
a) Sistemin e njësisë së matjes;
b) Sigurimin e gjurmueshmërisë së matjes nëpërmjet standardeve të matjes;
c) Kontrollin metrologjik ligjor të instrumenteve matëse, parapaketimeve dhe shisheve;
ç) Autorizimin e monitorimin e personave juridikë dhe fizikë për të kryer veprimtari në metrologjinë ligjore.
II. PËRGJEGJËSITË FUNKSIONALE TË DREJTORISË SË PËRGJITHSHME TË METROLOGJISË
DPM-ja ka përgjegjësi të organizojë punën për të siguruar:
a) përdorimin e njësive matëse në përputhje me Sistemin Ndërkombëtar të Njësive;
b) gjurmueshmërinë e standardeve të matjes të Republikës së Shqipërisë ndaj standardeve ndërkombëtare dhe standardeve kombëtare të vendeve të tjera;
c) ngritjen dhe administrimin e laboratorëve të ruajtjes së etaloneve kombëtare të matjeve, si dhe ato të kalibrimit e të verifikimit të instrumenteve matëse, në përputhje me standardet kombëtare, evropiane dhe ndërkombëtare, për metrologjinë dhe kërkesat ligjore në fuqi;
ç) kompetencën teknike të laboratorëve të etaloneve kombëtare të matjeve të Drejtorisë së Përgjithshme të Metrologjisë nëpërmjet vetëdeklarimit të kapaciteteve matëse dhe kalibruese, sipas marrëveshjes së njohjes së ndërsjellë të Komitetit Ndërkombëtar të Peshave dhe Masave ose akreditimit;
d) kompetencën teknike të laboratorëve kalibrues dhe verifikues të Drejtorisë së Përgjithshme të Metrologjisë nëpërmjet akreditimit, në përputhje me standardet kombëtare, evropiane e ndërkombëtare dhe praktikat e njohura në nivel evropian e ndërkombëtar;
dh) lëvizjen e lirë të instrumenteve matëse ligjërisht të kontrolluara, të cilat janë objekt i markimit CE, dhe markimin metrologjik;
e) lëvizjen e lirë të produkteve të parapaketuara, nëse ato kanë shenjën e konformitetit dhe harmonizimin e metodave për matjet e kontrollin metrologjik;
ë) matje uniforme në Republikën e Shqipërisë dhe besim në rezultatet e matjeve të kryera në funksion të tregut;
f) mbrojtjen e konsumatorëve dhe të shtetit nga rezultatet e pasakta të matjeve të instrumenteve matëse.
III. ORGANIZIMI DHE FUNKSIONIMI I DREJTORISË SË PËRGJITHSHME TË METROLOGJISË
1. DPM-ja e shtrin veprimtarinë e saj në të gjithë territorin e Republikës së Shqipërisë dhe organizohet në:
a) nivel qendror, nëpërmjet drejtorisë qendrore;
b) nivel rajonal, nëpërmjet sektorëve të shërbimit, me vendndodhje sipas përcaktimit në urdhrin përkatës të miratimit të strukturës dhe organikës së DPM-së.
2. Struktura organike e Drejtorisë së Përgjithshme të Metrologjisë miratohet me urdhër të Kryeministrit, sipas përcaktimeve të legjislacionit në fuqi për organizimin dhe funksionimin e administratës shtetërore.
3. DPM-ja drejtohet dhe përfaqësohet nga drejtori i Përgjithshëm, i cili organizon veprimtarinë saj dhe përgjigjet përpara ministrit.
4. Marrëdhëniet e punës së drejtorit të Përgjithshëm të DPM-së dhe nëpunësve të saj rregullohen në bazë të dispozitave të legjislacionit për nëpunësin civil. Marrëdhëniet e punës së punonjësve administrativë të DPM-së rregullohen në bazë të dispozitave të Kodit të Punës.
5. Rregullorja për metodat e brendshme të punës dhe sjellja e personelit të DPM-së miratohet nga ministri i Financave dhe Ekonomisë, me propozimin e drejtorit të Përgjithshëm.
6. DPM-ja, përveç detyrave të përcaktuara në ligjin për metrologjinë, kryen edhe këto detyra:
a) Harton dhe dërgon për miratim, pranë ministrisë përgjegjëse për ekonominë, planin afatgjatë për zhvillimin e etaloneve kombëtare të matjeve, bazuar në nevojat e vendit, çdo 4 (katër) vjet;
b) Harton dhe dërgon për miratim nga ministri planin vjetor të veprimtarisë së DPM-së;
c) Nëpërmjet drejtorit të Përgjithshëm, raporton te ministri periodikisht dhe sa herë që kërkohet prej tij;
ç) Çdo detyrë tjetër brenda fushës së tij të përgjegjësisë, të ngarkuar nga aktet ligjore dhe nënligjore në fuqi për metrologjinë, si dhe nga ministri.
7. DPM-ja ka stemën, logon dhe vulën zyrtare. Stema e DPM-së ka shënimet “Republika e Shqipërisë, Ministria (emri i ministrisë përgjegjëse), Drejtoria e Përgjithshme e Metrologjisë”, në përputhje me përcaktimin e vendimit të Këshillit të Ministrave për mënyrën e përdorimit të stemës së Republikës së Shqipërisë.
8. Vula e DPM-së ka elementet dhe formën e përcaktuar në vendimin e Këshillit të Ministrave për rregullat e prodhimit, të administrimit, të kontrollit dhe të ruajtjes së vulave zyrtare. Vula prodhohet, administrohet dhe ruhet në përputhje me legjislacionin në fuqi.
IV. DISPOZITA TË FUNDIT
1. Vendimi nr.1576, datë 17.10.2008, i Këshillit të Ministrave, “Për mënyrën e organizimit dhe të funksionimit të Drejtorisë së Përgjithshme të Metrologjisë’’, shfuqizohet.
2. Ngarkohen Ministria e Financave dhe Ekonomisë dhe Drejtoria e Përgjithshme e Metrologjisë për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
CAKTIMIN E DITËS SË MËRKURË, DATË 25.5.2022, DITË PUSHIMI
Në mbështetje të neneve 95, pika 2, dhe 100, të Kushtetutës, me propozimin e Kryeministrit, Këshilli i Ministrave
V E N D O S I:
1. Caktimin e ditës së mërkurë, datë 25.5.2022, ditë pushimi për punonjësit e administratës shtetërore, të institucioneve me seli në Qarkun e Tiranës, me përjashtim të Policisë së Shtetit, Gardës së Republikës, shërbimit zjarrfikës, dhe punonjësve të sistemit shëndetësor.
2. Dita e punës e datës 25.5.2022 do të zëvendësohet në një nga ditët e pushimit brenda këtij viti.
3. Ngarkohen institucionet e administratës shtetërore për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
PËRCAKTIMIN E RREGULLAVE PËR KRIJIMIN, AKSESIN, FUNKSIONIMIN DHE ADMINISTRIMIN E REGJISTRIT ELEKTRONIK TË ARMËVE, PJESËVE KRYESORE DHE MUNICIONEVE
Në mbështetje të nenit 100 të Kushtetutës dhe të pikës 9, të nenit 10, të ligjit nr.74/2014, “Për armët”, të ndryshuar, me propozimin e ministrit të Brendshëm, Këshilli i Ministrave
V E N D O S I :
1. Krijimin e regjistrit elektronik të armëve të zjarrit, pjesëve kryesore të tyre dhe municioneve, në pronësi të personave fizikë dhe juridikë, i cili menaxhohet nga Policia e Shtetit.
2. Regjistri elektronik i armëve të zjarrit, pjesëve kryesore të tyre dhe municioneve, në pronësi të personave fizikë dhe juridikë, krijohet mbi bazën e të dhënave të armëve, pjesëve kryesore të tyre, municioneve, si dhe të dhënave për personat fizikë dhe juridikë, që i kanë ato në pronësi.
3. Regjistri i armëve të zjarrit, pjesëve kryesore të tyre dhe municioneve, në pronësi të personave fizikë dhe juridikë, mbahet në format elektronik në sistem të informatizuar.
4. Regjistri elektronik i armëve të zjarrit, pjesëve kryesore të tyre dhe municioneve në pronësi të personave fizikë dhe juridikë është sipas formatit, që i bashkëlidhet këtij vendimi dhe është pjesë përbërëse e tij.
5. Regjistri elektronik i armëve të zjarrit, pjesëve kryesore të tyre dhe municioneve, në pronësi të personave fizikë dhe juridikë, përmban të dhëna për:
a) gjenealitetet e personit fizik ose juridik, që ka në pronësi armën/armët e zjarrit, pjesët kryesore të tyre dhe municionet, përfshirë adresat e furnitorëve, së bashku me datën ose datat përkatëse;
b) armën/armët e zjarrit, pjesët kryesore të tyre dhe municionet, si:
i. llojin, markën, modelin, kalibrin, numrin e serisë së çdo arme zjarri dhe markimin e vendosur në pjesën kryesore për çdo armë zjarri;
ii. numrin e serisë ose markimin unik të vendosur në pjesët kryesore të çdo arme zjarri, në rastin kur ndryshon nga markimi në trupin ose djepin e armës së zjarrit.
c) licencën, autorizimin dhe vendimin për pajisjen me armë zjarri;
ç) dokumentet e pajisjes dhe heqjes së armës së zjarrit;
d) çdo modifikim që i bëhet armës së zjarrit dhe që çon në ndryshimin e kategorisë apo nënkategorisë së saj, duke përfshirë çaktivizimin apo shkatërrimin e certifikuar të saj, si dhe datën ose datat përkatëse;
dh) certifikatën e çaktivizimit.
6. Të dhënat, që administrohen në regjistrin elektronik të armëve të zjarrit, pjesëve kryesore të tyre dhe municioneve, në pronësi të personave fizikë dhe juridikë, mund të aksesohen nga autoritetet kompetente për:
a) lëshimin ose revokimin e autorizimeve e licencave;
b) parandalimin, hetimin, zbulimin ose ndjekjen e veprave penale ose ekzekutimin e dënimeve penale.
7. Regjistri elektronik i armëve të zjarrit, pjesëve kryesore të tyre dhe municioneve në pronësi të personave fizikë dhe juridikë menaxhohet nga Policia e Shtetit, duke garantuar, si vijon:
a) Organet përgjegjëse të Policisë së Shtetit janë subjekte, të cilat plotësojnë të dhënat në regjistër, sipas fushës së tyre të përgjegjësisë;
b) Organeve përgjegjëse të Policisë së Shtetit u garantohet aksesi për leximin e të dhënave, me qëllim përmbushjen e detyrave të tyre;
c) Organit të prokurorisë dhe gjykatës u garantohet aksesi për leximin e të dhënave në regjistrin elektronik të armëve të zjarrit, pjesëve kryesore të tyre dhe municioneve në pronësi të personave fizikë e juridikë. Aksesimi i të dhënave do të mundësohet duke përdorur lidhje VPN (Virtual Private Network) me rrjetin e Policisë së Shtetit.
8. Afati i ruajtjes së të dhënave të regjistrit elektronik të armëve të zjarrit, pjesëve kryesore dhe municioneve të tyre, në pronësi të personave fizikë e juridikë, është:
a) për lëshimin ose revokimin e autorizimeve e licencave, për një periudhë prej 10 (dhjetë) vjetësh, pas shkatërrimit/çaktivizimit të armës së zjarrit ose pjesëve kryesore;
b) për parandalimin, hetimin, zbulimin ose ndjekjen e veprave penale ose ekzekutimin e dënimeve penale, për një periudhë prej 30 (tridhjetë) vjetësh, pas shkatërrimit/çaktivizimit të armës së zjarrit ose pjesëve kryesore.
9. Vendimi nr.292, datë 8.4.2015, i Këshillit të Ministrave, “Për përcaktimin e rregullave për krijimin dhe administrimin e regjistrit të armëve”, shfuqizohet.
10. Ngarkohen Ministria e Brendshme dhe Drejtoria e Përgjithshme e Policisë së Shtetit për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
DISA SHTESA NË VENDIMIN NR.457, DATË 3.7.2019, TË KËSHILLIT TË MINISTRAVE, “PËR MIRATIMN E PROCEDURAVE PËR PJESËMARRJE NË QENDRËN E TRAJNIMEVE NË FUSHËN E PRONËSISË INDUSTRIALE, SI DHE PËRCAKTIMIN E TARIFAVE PËRKATËSE”
Në mbështetje të nenit 100 të Kushtetutës dhe të pikës 2, të nenit 193/d, të ligjit nr.9947, datë 7.7.2008, “Për pronësinë industriale”, të ndryshuar, me propozimin e ministrit të Financave dhe Ekonomisë, Këshilli i Ministrave
V E N D O S I:
Në vendimin nr.457, datë 3.7.2019, të Këshillit Ministrave, bëhen këto shtesa:
1. Në titullin e vendimit dhe në pikën 1, pas fjalëve “.., si dhe përcaktimin e tarifave përkatëse …” shtohen “… dhe masën e shpërblimit të lektorëve …”.
2. Pas pikës 18 shtohet pika 18/1, me këtë përmbajtje:
“18/1. Masa e shpërblimit të lektorëve, për të cilët lidhet kontratë ndërmjet Drejtorisë së Përgjithshme të Pronësisë Industriale dhe lektorëve, të jetë, si më poshtë vijon:
a) 500 lekë/orë 60-minutëshe trajnimi, për kontratat me lektorët, të cilët do të përmbushin kriteret e mëposhtme:
i. Të zotërojnë një diplomë “Master i shkencave” apo të barasvlefshme me të, sipas legjislacionit të arsimit të lartë;
ii. Të zotërojnë kualifikimin e nevojshëm në përputhje me modulin apo kurrikulën për të cilën do të angazhohen si trajner, të vërtetuar me dëshmi, diploma, për eksperiencën profesionale;
iii. Të kenë jo më pak se 5 (pesë) vite përvojë pune në fushën e pronësisë industriale;
iv. Të kenë aftësi të prezantimit dhe të transmetimit të saktë e të qartë të informacionit te pjesëmarrësit;
v. Të mos kenë qenë të dënuar me vendim të formës së prerë;
vi. Zotërimi i gjuhës angleze përbën përparësi.
b) 1000 lekë/orë 60-minutëshe trajnimi për kontratat me lektorët të cilët do të përmbushin këto kritere:
i. Të zotërojnë një diplomë universitare;
ii. Të zotërojnë kualifikimin e nevojshëm profesional në përputhje me modulin apo kurrikulën për të cilën do të jenë angazhuar si trajner, të vërtetuar me dëshmi, diploma, rekomandime apo vërtetime për eksperiencën profesionale;
iii. Të kenë jo më pak se 3 (tri) vite përvojë pune në fushën përkatëse;
iv. Të kenë aftësi të prezantimit dhe të transmetimit të saktë e të qartë të informacionit te pjesëmarrësit;
v. Të mos kenë qenë të dënuar me vendim të formës së prerë;
vi. Zotërimi i gjuhës angleze përbën përparësi.
c) 12 000 (dymbëdhjetë mijë) lekë, në rastet e hartimit të kurrikulave apo të materialeve të trajnimit për më pak se 6 orë trajnimi 60-minutëshe;
ç) Në rastet e rishikimit të kurrikulave, pagesa të jetë deri në 50% të pagesës së përcaktuar sipas shkronjës “c”.
d) Për trajnerët e dërguar në kuadër të një projekti apo marrëveshjeje teknike të lidhur nga DPPI-ja me organizata të huaja në fushën e PI apo zyra homologe, kushtet për pagesat e trajnerëve sipas kësaj pike përcaktohen në marrëveshjën dypalëshe me atë organizatë apo në kontratën e projektit.”.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
DISA SHTESA DHE NDRYSHIME NË VENDIMIN NR.1088, DATË 24.12.2020, TË KËSHILLIT TË MINISTRAVE, “PËR PËRCAKTIMIN E MËNYRËS DHE TË PROCEDURAVE TË REGJISTRIMIT E PUBLIKIMIT TË TË DHËNAVE PËR PRONARËT PËRFITUES, SI DHE TË NJOFTIMIT NGA AUTORITETET SHTETËRORE KOMPETENTE DHE NGA SUBJEKTET E DETYRUARA”, TË NDRYSHUAR
Në mbështetje të nenit 100 të Kushtetutës dhe të neneve 4, pika 7, 6, pikat 8, 9, e 10, dhe 15, pika 4, të ligjit nr.112/2020, “Për regjistrin e pronarëve përfitues”, të ndryshuar, me propozimin e ministrit të Financave dhe Ekonomisë, Këshilli i Ministrave
V E N D O S I:
I. Në vendimin nr.1088, datë 24.12.2020, të Këshillit të Ministrave, të ndryshuar, bëhen këto shtesa dhe ndryshime:
1. Në kreun I, “DISPOZITA TË PËRGJITHSHME”, bëhen shtesat dhe ndryshimi i mëposhtëm:
a) Pas shkronjës “c”, të pikës 1, shtohen shkronjat “ç” dhe “d”, me këtë përmbajtje:
“ç) “Regjistrim fillestar” është regjistrimi për herë të parë i pronarëve përfitues të subjekteve raportuese, në përputhje me parashikimet e ligjit për regjistrin e pronarëve përfitues.
d) “Regjistrim i ndryshimeve” është regjistrimi i çdo ndryshimi faktik të personit të regjistruar më parë si pronar përfitues sipas ligjit për regjistrin e pronarëve përfitues (zëvendësimi, shtimi i një personi të ri apo heqja e një personi nga regjistri i pronarëve përfitues), si dhe regjistrimi i çdo ndryshimi tjetër në të dhënat e regjistruara të pronarëve përfitues.”.
.
b) Pikat 2 dhe 3 ndryshohen, si më poshtë vijon:
“2. Kërkesa për regjistrimin fillestar, regjistrimin e ndryshimeve apo përditësimin e të dhënave të pronarëve përfitues bëhet sipas afateve të përcaktuara në pikën 3, të nenit 5, të ligjit për regjistrin e pronarëve përfitues.
3. Kërkesa për regjistrimin fillestar, regjistrimin e ndryshimeve apo përditësimin e të dhënave të pronarëve përfitues paraqitet nga personi i autorizuar për të përfaqësuar subjektin raportues, në përputhje me parashikimet e kreut II, të këtij vendimi.”.
2. Në kreun II, “PROCEDURAT E APLIKIMIT PËR REGJISTRIMIN E TË DHËNAVE NË REGJISTRIN E PRONARËVE PËRFITUES”, bëhen disa ndryshime:
a) Pikat 1 dhe 2 ndryshohen, si më poshtë vijon:
“1. Kërkesa për regjistrimin fillestar të pronarëve përfitues të subjekteve raportuese, që regjistrohen në regjistrin tregtar, paraqitet nga personi i autorizuar për të përfaqësuar subjektin raportues, sipas procedurave të parashikuara nga legjislacioni që rregullon procedurat e regjistrimit fillestar të personit juridik në regjistrin tregtar.
2. Kërkesa për kryerjen e të gjitha regjistrimeve të tjera sipas këtij vendimi paraqitet nga personi i autorizuar për të përfaqësuar subjektin raportues, duke u identifikuar elektronikisht në sportelin elektronik të QKB-së nëpërmjet autentifikimit nga portali unik i shërbimeve qeveritare “e-Albania”. Pas këtij autentifikimi, personi i autorizuar për të përfaqësuar subjektin raportues akseson sportelin elektronik dhe zgjedh llojin e regjistrimit që kërkohet të kryhet. Pas përzgjedhjes së llojit të regjistrimit, sistemi i informatizuar shfaq formularin përkatës të kërkesës, sipas formatit të miratuar, dhe hap dosjen elektronike, e cila mban numrin përkatës (një numër për çdo dosje ose aplikim), të dhënë nga sistemi i informatizuar (numri i çështjes).”.
b) Pika 9 ndryshohet, si më poshtë vijon:
“9. Për plotësimin e të metave në rastin e pezullimit të një kërkese të paraqitur për regjistrim fillestar, të ndryshimeve apo përditësimit të të dhënave të pronarëve përfitues, zbatohen procedurat e parashikuara sipas këtij kreu.”.
3. Në kreun III, “DOKUMENTACIONI DHE FORMA E KËRKUAR”, bëhen ndryshimet dhe shtesa e mëposhtme:
a) Në pikën 1 bëhen disa ndryshime:
i. Nënndarjet “iii” dhe “iv”, të shkronjës “a”, ndryshohen, si më poshtë vijon:
“iii. dokumentacionin e autoritetit kompetent regjistrues, që vërteton se pronari përfitues i regjistruar është zotërues i 25 (njëzet e pesë) % ose më tepër të aksioneve/kuotave të kapitalit, të të drejtave të votimit ose të interesave të pronësisë, si dhe që përmban datën e përcaktimit si pronar përfitues; dhe
iv. çdo dokumentacion tjetër që zotëron subjekti raportues për identifikimin dhe regjistrimin e pronarit, përfitues të tij, sipas ligjit për regjistrin e pronarëve përfitues, përfshirë datën e përcaktimit si pronar përfitues, nëse ky informacion nuk rezulton në dokumentacionin sipas nënndarjes “iii” të kësaj shkronje.”.
ii. Nënndarjet “iii” dhe “iv”, të shkronjës “b”, ndryshohen, si më poshtë vijon:
“iii. dokumentacionin e autoritetit kompetent regjistrues, që vërteton se pronari përfitues i regjistruar është zotërues i 25 (njëzet e pesë) % ose më tepër të aksioneve/kuotave të kapitalit, të të drejtave të votimit ose të interesave të pronësisë, si dhe që përmban datën e përcaktimit si pronar përfitues; dhe
iv. çdo dokumentacion tjetër që zotëron subjekti raportues për identifikimin dhe regjistrimin e pronarit përfitues të tij, sipas ligjit për regjistrin e pronarëve përfitues, përfshirë datën e përcaktimit si pronar përfitues, nëse ky informacion nuk rezulton në dokumentacionin sipas nënndarjes “iii” të kësaj shkronje.”.
iii. Shkronjat “c” dhe “ç” ndryshohen, si më poshtë vijon:
“c) Dokumentacioni i përcaktuar në nënndarjet “i” dhe “iii”, të shkronjës “a”, të kësaj pike, duhet të jetë hartuar brenda 90 (nëntëdhjetë) ditëve kalendarike nga data e paraqitjes së kërkesës për regjistrimin fillestar të pronarëve përfitues.
ç) Dokumentacioni i përcaktuar në nënndarjet “i” dhe “iii”, të shkronjës “b”, të kësaj pike, duhet të jetë hartuar brenda 90 (nëntëdhjetë) ditëve kalendarike nga data e paraqitjes së kërkesës për regjistrimin e ndryshimeve të të dhënave të pronarëve përfitues.”.
iv. Paragrafi i dytë, i shkronjës “dh”, ndryshohet, si më poshtë vijon:
“Deklarata me shkrim e nënshkruar nga përfaqësuesi ligjor i subjektit raportues, e përcaktuar në këtë shkronjë, duhet të jetë hartuar brenda afateve të kërkuara për dokumentet e tjera të përcaktuara sipas shkronjës “a” ose shkronjës “b”, të pikës 1, të këtij kreu.”.
v. Paragrafi i dytë, i shkronjës “ë”, ndryshohet, si më poshtë vijon:
“Deklarata me shkrim e nënshkruar nga përfaqësuesi ligjor i subjektit raportues, e përcaktuar në këtë shkronjë, duhet të jetë hartuar brenda afateve të kërkuara për dokumentet e tjera të përcaktuara sipas shkronjës “a” ose shkronjës “b”, të pikës 1, të këtij kreu.”.
b) Pas pikës 5 shtohet pika 6, me këtë përmbajtje:
“6. Në rastin e një kërkesë sipas pikës 1, të kreut II, të këtij vendimi, paraqitet i njëjti dokumentacion i kërkuar sipas parashikimeve të mësipërme të këtij kreu, me përjashtim të dokumentacionit që vërteton numrin unik të identifikimit së bashku me datën e regjistrimit të subjektit në regjistrin tregtar, si dhe ekstraktin e të dhënave të regjistruara të subjektit raportues, të lëshuar sipas legjislacionit përkatës që rregullon procedurat e regjistrimit në regjistrin tregtar. Dokumentet e kërkuara në lidhje me këtë kërkesë paraqiten në të njëjtat mënyra dhe në të njëjtin format me dokumentacionin e kërkuar sipas legjislacionit përkatës që rregullon procedurat e regjistrimit në regjistrin tregtar.”.
4. Në kreun IV, “PROCEDURA E VLERËSIMIT TË APLIKIMIT DHE ARSYET E REFUZIMIT PËR REGJISTRIMIN E TË DHËNAVE TË PRONARËVE PËRFITUES TË SUBJEKTEVE RAPORTUESE”, bëhen disa ndryshime dhe shtesa:
a) Titulli i kreut ndryshohet dhe zëvendësohet me:
“IV. PROCEDURA E VLERËSIMIT TË KËRKESËS DHE ARSYET E PEZULLIMIT APO REFUZIMIT PËR REGJISTRIMIN E TË DHËNAVE TË PRONARËVE PËRFITUES TË SUBJEKTEVE RAPORTUESE”.
b) Pika 1 ndryshohet, si më poshtë vijon:
“1. Kërkesa dhe dokumentet shoqëruese të paraqitura sipas parashikimeve të krerëve II e III, të këtij vendimi, merren në shqyrtim nga nëpunësit e autorizuar të QKB-së për vendimmarrje, sipas radhës së paraqitjes së tyre.”.
c) Në pikën 2 bëhen ndryshimi dhe shtesa e mëposhtme:
i. Shkronja “dh”, ndryshohet, si më poshtë vijon:
“dh) faktin nëse janë shlyer sanksionet administrative të zbatuara, sipas parashikimeve të ligjit për regjistrin e pronarëve përfitues.”.
ii. Pas shkronjës “dh” shtohet shkronja “e”, me këtë përmbajtje:
“e) faktin nëse të dhënat që kërkohen të regjistrohen janë të ndryshme nga të dhënat e regjistrueshme, sipas dispozitave të ligjit për regjistrin e pronarëve përfitues.”.
ç) Pikat 5, 6, 7, 8 dhe 9 ndryshohen, si më poshtë vijon:
“5. Nëse nëpunësi i autorizuar (regjistruesi) i QKB-së, pas verifikimeve sipas pikave të sipërpërmendura, vëren se kërkesa është në përputhje me parashikimet e ligjit për regjistrin e pronarëve përfitues dhe të këtij vendimi:
a) në rastin e një kërkese të paraqitur sipas pikës 1, të kreut II, të këtij vendimi, miraton kërkesën njëkohësisht me regjistrimin e subjektit raportues si person juridik në regjistrin tregtar;
b) në rastet e një kërkese të paraqitur sipas pikës 2, të kreut II, të këtij vendimi, miraton kërkesën jo më vonë se 2 (dy) ditë pune nga paraqitja e saj.
6. Nëse nëpunësi i autorizuar (regjistruesi) i QKB-së, pas verifikimeve sipas pikave të sipërpërmendura, vëren se kërkesa nuk është në përputhje me parashikimet e ligjit për regjistrin e pronarëve përfitues dhe të këtij vendimi:
a) në rastin e një kërkesë të paraqitur sipas pikës 1, të kreut II, të këtij vendimi, jo më vonë se 1 (një) ditë pune nga marrja e kërkesës, pezullon veprimet për regjistrimin fillestar të pronarëve përfitues të subjektit raportues. Pezullimi i veprimeve sipas kësaj pike përbën shkak për pezullimin e procedurave të regjistrimit fillestar të personit juridik në regjistrin tregtar. Plotësimi i të metave që pengojnë regjistrimin kryhet nga subjekti raportues brenda afateve dhe në përputhje me parashikimet e legjislacionit në fuqi që rregullon procedurat e regjistrimit në regjistrin tregtar si dhe me parashikimet e kreut III, të këtij vendimi. Mosplotësimi i të metave që pengojnë regjistrimin në regjistrin e pronarëve përfitues, sipas këtij vendimi, nga subjekti raportues me pronësi direkte përbën shkak për refuzimin e aplikimit për regjistrimin e personit juridik në regjistrin tregtar sipas legjislacionit përkatës;
b) në rastin e një kërkese të paraqitur sipas pikës 2, të kreut II, të këtij vendimi, jo më vonë se 2 (dy) ditë pune nga marrja e kërkesës, pezullon veprimet për regjistrimin e kërkesës dhe QKB-ja e njofton subjektin raportues sipas kreut VII, të këtij vendimi, për shkakun e saktë të pezullimit. Plotësimi i të metave që pengojnë regjistrimin kryhet nga subjekti raportues brenda 30 (tridhjetë) ditëve kalendarike, në përputhje me parashikimet e krerëve II dhe III, të këtij vendimi.
7. Në rastet e pezullimit të veprimeve sipas pikës 6, të këtij kreu, nëse subjekti raportues plotëson të metat që pengojnë regjistrimin, brenda afateve përkatëse, nëpunësi i autorizuar (regjistruesi) i QKB-së miraton kërkesën sipas pikës 5, të këtij kreu. Në këto raste, regjistrimi mban datën e paraqitjes së kërkesës së parë.
8. Nëpunësi i autorizuar (regjistruesi) i QKB-së refuzon kërkesën si vijon:
a) njëkohësisht me refuzimin e aplikimit për regjistrimin e personit juridik në regjistrin tregtar sipas legjislacionit përkatës, në rastin e një kërkese të paraqitur sipas pikës 1, të kreut II, të këtij vendimi, nga një subjekt me pronësi direkte;
b) jo më vonë se 2 (dy) ditë pune pas përfundimit të afatit të përcaktuar sipas shkronjës “a”, të pikës 6, të këtij kreu, nëse subjekti raportues me pronësi indirekte nuk plotëson të metat që pengojnë regjistrimin, në rastin e një kërkesë të paraqitur sipas pikës 1, të kreut II, të këtij vendimi;
c) jo më vonë se 2 (dy) ditë pune pas përfundimit të afatit të përcaktuar sipas shkronjës “b”, të pikës 6, të këtij kreu, nëse subjekti raportues nuk plotëson të metat që pengojnë regjistrimin, në rastin e një kërkese të paraqitur sipas pikës 2, të kreut II, të këtij vendimi;
ç) jo më vonë se 2 (dy) ditë pune pas paraqitjes së kërkesës, nëse të dhënat që kërkohen të regjistrohen janë të ndryshme nga të dhënat e regjistrueshme, sipas dispozitave të ligjit për regjistrin e pronarëve përfitues.
9. Me refuzimin e një kërkese, subjektet raportuese kanë të drejtë të riaplikojnë, sipas ligjit dhe këtij vendimi, paraqitja e së cilës trajtohet si kërkesë e re. Paraqitja e një kërkesë të re nuk çliron subjektin raportues nga sanksionet e parashikuara sipas ligjit për regjistrin e pronarëve përfitues, në lidhje me moskryerjen e regjistrimeve të detyrueshme brenda afateve ligjore.”.
5. Pika 1, e kreut VII, “DISPOZITA PËR NJOFTIMIN E VENDIMEVE”, ndryshohet, si më poshtë vijon:
“1. Çdo vendim i QKB-së në lidhje me miratimin, pezullimin apo refuzimin e një kërkese njoftohet nëpërmjet publikimit në regjistër. Data e njoftimit është data e publikimit në regjistër. Në rastin e një kërkese për regjistrimin fillestar të pronarëve përfitues nga subjektet raportuese, që regjistrohen në regjistrin tregtar, njoftimi bëhet nga QKB-ja, në përputhje me parashikimet e legjislacionit në fuqi që rregullon procedurat e regjistrimit në regjistrin tregtar.”.
6. Pas kreut VIII, “AKSESI NË REGJISTRIN E PRONARIT PËRFITUES DHE TË DHËNAT E TIJ”, shtohet kreu IX, me këtë përmbajtje:
“IX. DISPOZITA TRANSITORE
1. Regjistrimi fillestar i të dhënave për pronarët përfitues nga subjektet raportuese ekzistuese, të regjistruara në regjistrin tregtar me pronësi direkte, kryhet sipas pikave 2 -5, të këtij kreu.
2. QKB-ja identifikon subjektet raportuese ekzistuese të regjistruara në regjistrin tregtar me pronësi direkte, të cilat, në datën e hyrjes në fuqi të ligjit nr.6/2022, “Për disa ndryshime dhe shtesa në ligjin nr.112/2020, “Për regjistrin e pronarëve përfitues””, të ndryshuar, nuk kanë përmbushur detyrimin për regjistrimin fillestar të pronarëve të tyre përfitues.
3. QKB-ja, në bashkëpunim me Agjencinë Kombëtare për Shoqërinë e Informacionit, brenda datës 30.6.2022, transferon nga baza e të dhënave ekzistuese në Regjistrin Tregtar në regjistrin e pronarëve përfitues të dhënat e pronarëve përfitues që identifikohen sipas përcaktimeve ligjore, në lidhje me subjektet e përcaktuara sipas pikës 2, të këtij kreu.
4. Detyrimi për regjistrimin fillestar të pronarëve përfitues nga subjektet e përcaktuara sipas pikës 2, të këtij kreu, quhet i përmbushur në datën e transferimit në regjistrin e pronarëve përfitues të të dhënave të pronarëve të tyre përfitues sipas pikës 3, të këtij kreu.
5. Subjektet e përcaktuara sipas pikës 2, të këtij kreu, kanë të drejtë të përditësojnë të dhënat e pronarëve të tyre përfitues, që janë transferuar në regjistrin e pronarëve përfitues sipas pikës 3, të këtij kreu, duke paraqitur kërkesë sipas parashikimeve të kreut II, të këtij vendimi. Në lidhje me kërkesën e paraqitur nga këto subjekte për herë të parë, pas transferimit të të dhënave në regjistrin e pronarëve përfitues, nuk zbatohen kundërvajtje administrative.
6. Subjektet raportuese, të regjistruara në Regjistrin Tregtar me pronësi indirekte, si dhe subjektet raportuese të regjistruara në Regjistrin e Organizatave Jofitimprurëse, të cilat, në datën e hyrjes në fuqi të ligjit nr.6/2022, “Për disa ndryshime dhe shtesa në ligjin nr.112/2020, “Për regjistrin e pronarëve përfitues””, të ndryshuar, nuk kanë përmbushur detyrimin për regjistrimin fillestar apo për regjistrimin e ndryshimeve të të dhënave të pronarëve të tyre përfitues, duhet t’i përmbushin këto detyrime brenda datës 30.6.2022, duke paraqitur kërkesë, në përputhje me parashikimet e kreut II, të këtij vendimi.
7. Ndaj subjekteve raportuese, që, brenda datës 30.6.2022, nuk përmbushin detyrimet sipas pikës 6, të këtij kreu, QKB-ja zbaton gjobën e parashikuar nga pika 4, e nenit 15/1, të ligjit nr.112/2020, “Për regjistrin e pronarëve përfitues”, të ndryshuar.
8. Subjektet raportuese ekzistuese, të regjistruara në Regjistrin Tregtar me pronësi indirekte, si dhe ato të regjistruara në Regjistrin e Organizatave Jofitimprurëse ekzistuese, që rezultojnë me status të pezulluar, regjistrojnë pronarin përfitues në regjistrin e pronarëve përfitues, përpara kërkesës për ndryshimin e statusit të tyre në Regjistrin Tregtar apo në Regjistrin e Organizatave Jofitimprurëse ekzistuese. Ndryshimi i statusit të këtyre subjekteve raportuese ekzistuese në Regjistrin Tregtar apo në Regjistrin e Organizatave Jofitimprurëse bëhet pas verifikimit të kryerjes së regjistrimit të pronarit përfitues në regjistrin e pronarëve përfitues.”.
II. Ngarkohen Ministria e Financave dhe Ekonomisë, QKB-ja, autoriteti përgjegjës për mbajtjen e Regjistrit të Organizatave Jofitimprurëse, dhe Agjencia Kombëtare për Shoqërinë e Informacionit për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
NJË SHTESË NË VENDIMIN NR.656, DATË 31.10.2018, TË KËSHILLIT TË MINISTRAVE, “PËR PËRCAKTIMIN E MASËS SË SHPËRBLIMIT TË ANËTARËVE TË KËSHILLAVE, BORDEVE OSE KOMISIONEVE TË PËRHERSHME TË NJËSIVE TË QEVERISJES QENDRORE”, TË NDRYSHUAR
Në mbështetje të nenit 100 të Kushtetutës dhe të pikës 3, të nenit 4, të ligjit nr.10405, datë 24.3.2011, “Për kompetencat për caktimin e pagave dhe shpërblimeve”, me propozimin e ministrit të Financave dhe Ekonomisë dhe ministrit të Infrastrukturës dhe Energjisë, Këshilli i Ministrave
V E N D O S I :
1. Në lidhjen nr.1, të përmendur në pikën 3, të vendimit nr.656, datë 31.10.2018, të Këshillit të Ministrave, të ndryshuar, shtohet tabela që i bashkëlidhet këtij vendimi dhe është pjesë përbërëse e tij.
2. Efektet financiare për shpërblimin e Këshillit Drejtues të Autoritetit Rregullator Hekurudhor përballohen nga buxheti i miratuar për Ministrinë e Infrastrukturës dhe Energjisë.
3. Ngarkohen Ministria e Infrastrukturës dhe Energjisë dhe Autoriteti Rregullator Hekurudhor për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
NJË SHTESË FONDI NË BUXHETIN E VITIT 2022, MIRATUAR PËR MINISTRINË E ARSIMIT DHE SPORTIT
Në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 14, të ligjit nr.115/2021, “Për buxhetin e vitit 2022”, të ndryshuar, me propozimin e ministrit të Arsimit dhe Sportit, Këshilli i Ministrave
V E N D O S I:
1. Ministrisë së Arsimit dhe Sportit, në buxhetin e miratuar për vitin 2022, në zërin “Shpenzime korrente”, në artikullin 604 “Të tjera transferta korrente të brendshme”, të programit buxhetor “Zhvillimi i sportit”, i shtohet fondi prej 160 000 000 (njëqind e gjashtëdhjetë milionë) lekësh, për financimin e veprimtarisë së federatave sportive dhe shpërblimin e sportistëve elitarë.
2. Efekti financiar, prej 160 000 000 (njëqind e gjashtëdhjetë milionë) lekësh, të përballohet nga fondi rezervë i buxhetit të shtetit, i miratuar për vitin 2022.
3. Ngarkohen Ministria e Arsimit dhe Sportit dhe Ministria e Financave dhe Ekonomisë për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
TRANSFERIMIN NË PRONËSI, NGA MINISTRIA E MBROJTJES TE BASHKIA BELSH, TË PRONËS NR.306, ME EMËRTIM “ISH-REPARTI USHTARAK NR.7040 (B.K DHE GRUP ARTILERIE)”, ME VENDNDODHJE NË TROJAS, BELSH, ELBASAN, ZONA KADASTRALE 3647, DHE PËR NJË NDRYSHIM NË VENDIMIN NR.515, DATË 18.7.2003, TË KËSHILLIT TË MINISTRAVE, “PËR MIRATIMIN E LISTËS SË INVENTARIT TË PRONAVE TË PALUAJTSHME SHTETËRORE, TË CILAT I KALOJNË NË PËRGJEGJËSI ADMINISTRIMI MINISTRISË SË MBROJTJES”, TË NDRYSHUAR, DHE NË VENDIMIN NR.886, DATË 3.11.2010, TË KËSHILLIT TË MINISTRAVE, “PËR MIRATIMIN E LISTËS PËRFUNDIMTARE TË PRONAVE TË PALUAJTSHME PUBLIKE, SHTETËRORE, QË TRANSFEROHEN, NË PRONËSI OSE NË PËRDORIM TË BASHKISË BELSH, TË QARKUT TË ELBASANIT”, TË NDRYSHUAR
Në mbështetje të nenit 100 të Kushtetutës, të neneve 13 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, dhe të neneve 3, 5, 7 dhe 8, të ligjit nr.8744, datë 22.2.2001, “Për transferimin e pronave të paluajtshme të shtetit në njësitë e qeverisjes vendore”, të ndryshuar, me propozimin e ministrit të Mbrojtjes, Këshilli i Ministrave
V E N D O S I:
1. Transferimin në pronësi, nga Ministria e Mbrojtjes te Bashkia Belsh, të pronës nr.306, me emërtim “Ish-repart ushtarak nr.7040 (b.k dhe grup artilerie)”, me vendndodhje në Trojas, Belsh, Elbasan, zona kadastrale 3647, sipas planrilevimit që i bashkëlidhet këtij vendimi dhe është pjesë përbërëse e tij, për ta përdorur për ndërtimin e “Qendrës për Rikuperim Riciklim Belsh”.
2. Në listën e inventarit të pronave të paluajtshme shtetërore, që i bashkëlidhet vendimit nr.515, datë 18.7.2003, të Këshillit të Ministrave, “Për miratimin e listës së inventarit të pronave të paluajtshme shtetërore, të cilat i kalojnë në përgjegjësi administrimi Ministrisë së Mbrojtjes”, të ndryshuar, të hiqet prona nr.306, me emërtim “Ish-repart ushtarak nr.7040 (b.k dhe grup artilerie)”, me vendndodhje në Trojas, Belsh, Elbasan, zona kadastrale 3647, sipas planrilevimit, dhe të shtohet në listën përfundimtare të pronave të paluajtshme publike, shtetërore, që i bashkëlidhet vendimit nr.886, datë 3.11.2010, të Këshillit të Ministrave, “Për miratimin e listës përfundimtare të pronave të paluajtshme publike, shtetërore, që transferohen në pronësi ose në përdorim të bashkisë Belsh, të qarkut të Elbasanit”, të ndryshuar.
3. Bashkisë Belsh i ndalohet të ndryshojë destinacionin e përdorimit të pronës, të përcakuar në pikën 1, të këtij vendimi, ta tjetërsojë ose t’ua japë atë në përdorim të tretëve.
4. Ngarkohen Ministria e Mbrojtjes, Bashkia Belsh dhe Agjencia Shtetërore e Kadastrës për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA