Në mbështetje të nenit 100 të Kushtetutës dhe të nenit 4, të ligjit nr.10325, datë 23.9.2010, “Për bazat e të dhënave shtetërore”, me propozimin e ministrit të Arsimit, Këshilli i Ministrave

1. Krijimin e bazës së të dhënave shtetërore të Sistemit Shqiptar të Informacionit të Kërkimit Shkencor (në vijim ACRIS).

2. Institucioni administrues i bazës së të dhënave shtetërore ACRIS është Agjencia Kombëtare e Kërkimit Shkencor dhe Inovacionit (në vijim AKKSHI).

3. Sistemi ACRIS përbëhet nga të dhënat parësore të kërkimit shkencor dhe nga të dhënat dytësore.

a) Të dhënat parësore konsiderohen të dhënat e mbledhura nga AKKSHI-ja, që kanë të bëjnë me:

i. të dhënat lidhur me institucionet, institutet, njësitë e veçanta të kërkimit shkencor dhe kërkuesit shkencorë, sipas Regjistrit Kombëtar të Institucioneve, Instituteve, Njësive të Veçanta të Kërkimit Shkencor dhe Kërkuesve Shkencorë;

ii. të dhënat e projekteve kërkimore-shkencore, kombëtare dhe ndërkombëtare, që financohen me fonde publike, ku të përfshihen të paktën titulli i projektit, fushat e kërkimit, qëllimi, shuma e projektit, financuesit, kohëzgjatja, partnerët;

iii. të dhënat e infrastrukturës, ku ushtrohet veprimtaria kërkimore-shkencore;

iv. listën e disertacioneve të doktoratave të mbrojtura dhe abstraktet përkatëse në një nga pesë gjuhët e Bashkimit Evropian: anglisht, frëngjisht, gjermanisht, spanjisht, italisht;

v. listën e punimeve të diplomës së ciklit të dytë dhe të tretë, të mbrojtura, dhe abstraktet përkatëse në një nga pesë gjuhët e Bashkimit Evropian: anglisht, frëngjisht, gjermanisht, spanjisht, italisht;

vi. listën e përditësuar të kontributit shkencor të personelit akademik e kërkimor të institucioneve të arsimit të lartë dhe kërkimit shkencor e të personelit kërkimor të instituteve të tjera të             kërkim-zhvillimit.

b) Të dhënat dytësore të sistemit konsiderohen të dhënat që merren nga të dhënat parësore te bazat e të dhënave, si më poshtë vijon:

b/1)  Nga Regjistri Kombëtar i Gjendjes Civile, si më poshtë:

i. Emri, atësia, amësia, mbiemri;

ii. Numri i identifikimit personal;

iii. Datëlindja, gjinia, vendlindja;

iv. Statusi civil;

v. Adresa e vendbanimit;

vi. Shtetësia;

vii. Të dhënat e kontaktit të aplikuesit.

        b/2)  Të dhënat identifikuese të kërkuesve shkencorë, shtetas të huaj, që merren nga Regjistri Elektronik Kombëtar për të Huajt në Republikën e Shqipërisë, si më poshtë:

i. Numri unik i identifikimit të të huajit;

ii. Të dhënat nga dokumenti i udhëtimit të të huajit ose gjenealitetet e vetëdeklaruara nga i huaji për rastet e përcaktuara në ligj, që përbëjnë skedën e të huajit.

       b/3) Të dhënat parësore që merren nga portali unik qeveritar “e-Albania”, si më poshtë:

i. Kodi unik i përdoruesit;

ii. Kodi i shërbimit elektronik.

        b/4) Të dhënat që merren nga Sistemi i Menaxhimit të Informacionit të Arsimit të Lartë (SMIAL), si më poshtë:

i. Të dhënat e regjistrimit të studentëve në çdo program studimi;

ii. Numri i identifikimit të matrikullimit të studentit;

iii. Informacioni për statusin për pajisjen me numër matrikullimi;

iv. Mbështetja financiare dhe kreditë studentore;

v. Struktura e institucioneve të arsimit të lartë;

vi. Hapja, riorganizimi dhe mbyllja e IAL-ve, degëve, njësive kryesore, bazë e të programeve të studimit;

vii. Programet e studimit me profilet e tyre, si dhe kuotat e pranimit në to;

viii. Certifikimi i kapaciteteve akademike dhe infrastrukturore për kuotat e pranimit në programet e studimit të ofruara nga IAL-të;

ix. Udhëheqjet shkencore në programet e studimit për fitimin e gradës shkencore “Doktor”;

x. Projektstatutet dhe ndryshimet statutore të IAL-ve;

xi. Informacione për aktet e hapjes/riorganizimit dhe akreditimit të parë e periodik të IAL-ve e të programeve të studimit;

xii. Regjistrimi i formave të diplomave dhe certifikatave, të cilat lëshohen nga institucionet e arsimit të lartë;

xiii. Pajisja e institucioneve të arsimit të lartë me regjistrat themeltarë të arritjeve akademike e të lëshimit të diplomave dhe të certifikatave;

xiv. Njohja e njësimi i diplomave dhe i certifikatave të lëshuara nga institucionet e huaja të arsimit të lartë;

xv. Njohja e titujve akademikë të lëshuar nga institucionet e arsimit të lartë të huaj.

         b/5.  Të dhënat që merren nga Regjistri Tregtar, si më poshtë:

i. Të dhënat që i përkasin themelimit dhe veprimtarisë së subjekteve tregtare;

ii. Të dhënat që i përkasin çregjistrimit;

iii. Çdo ndryshim në status dhe organizimi i subjektit tregtar;

iv. Të dhënat që u përkasin regjistrimeve me vendim të autoritetit publik;

v. Të  dhënat  e  identifikimit  për  personin  juridik,  si  forma,  emri,  numri  e  vendi  i  regjistrimit dhe selia;

vi. Të dhëna për  dokumentet  shoqëruese/akte dhe informacione që regjistrohen, njoftohen apo depozitohen në regjistër;

vii. Të dhëna për ndërveprim dhe baza të dhënash të tjera;

viii. Të dhënat që i përkasin numrit unik të identifikimit të subjektit;

ix. Të dhënat për emrin e subjektit tregtar dhe emrin tregtar;

x. Të dhëna për subjektet e huaja;

xi. Të dhëna për kapitalin themeltar të anëtarëve/aksionarëve/ortakëve;

xii. Kompetencat  e  përfaqësimit  dhe  afatet  e  emërimit  të  personave  përgjegjës  për  administrimin dhe përfaqësimin e shoqërisë në marrëdhënie me të tretët.

4. Dhënës të informacionit për sistemin janë:

a) subjektet publike dhe jopublike të kërkimit shkencor;

b) Qendra e Shërbimeve Arsimore;

c) ministritë përgjegjëse që realizojnë veprimtari kërkimore-shkencore nëpërmjet institucioneve/agjencive/instituteve/njësive të veçanta kërkimore-shkencore;

ç) punonjësit kërkimorë-shkencorë.

5. Individët  kanë  nivel  aksesi,  si  lexues,  nëpërmjet ndërfaqes së AKKSHI-së në internet dhe portalit unik qeveritar “e-Albania”.

6. Sistemi ACRIS ndërvepron me bazën e të dhënave shtetërore të:

a) Regjistrit Kombëtar të Gjendjes Civile;

b) portalit unik qeveritar “e-Albania”;

c) Regjistrit Elektronik Kombëtar për të Huajt në Republikën e Shqipërisë;

       ç)  Sistemit të Menaxhimit të Informacionit të Arsimit të Lartë (SMIAL);

d) Regjistrit Tregtar/ Qendrës Kombëtare të Biznesit.

7. Institucioni administrues siguron që përpunimi i të dhënave personale në ACRIS të kryhet në përputhje me parimet dhe kërkesat e legjislacionit për mbrojtjen e të dhënave personale, duke garantuar ligjshmërinë, drejtësinë, transparencën, minimizimin e të dhënave, saktësinë dhe ruajtjen e tyre, vetëm për periudhën e nevojshme për të përmbushur qëllimin e grumbullimit. Pas përfundimit të afatit të përcaktuar të ruajtjes, të dhënat personale fshihen ose anonimizohen, sipas procedurave të miratuara nga institucioni administrues, në përputhje me legjislacionin në fuqi.

8. Niveli i aksesimit të lejuar për përdoruesit e bazës së të dhënave shtetërore ACRIS përcaktohet, si më poshtë vijon:

a) Për të dhënat lidhur me zotërimin e gradave shkencore dhe titujve akademikë, institucionet e arsimit të lartë, si hedhës, AKKSHI-ja, si gjenerues  i  të dhënave, dhe Qendra e Shërbimeve Arsimore, si gjenerues  i  të dhënave për njohjen dhe njësimin e gradave shkencore dhe njohjen e titujve akademikë;

b) Për të dhënat lidhur me institucionet, institutet, njësitë e veçanta të kërkimit shkencor dhe kërkuesve shkencorë, AKKSHI-ja, si hedhës dhe gjenerues  i  të dhënave;

c) Për të dhënat e projekteve kërkimore-shkencore, kombëtare dhe ndërkombëtare, që financohen me fonde publike, AKKSHI-ja, si hedhës dhe gjenerues  i  të dhënave;

ç) Për të dhënat për infrastrukturën kërkimore-shkencore, subjektet e kërkimit shkencor, si hedhës dhe gjenerues  të  të dhënave;

d) Për të dhënat lidhur me revistat kërkimore shkencore që publikohen në Republikën e  Shqipërisë, subjektet që zhvillojnë veprimtari kërkimore-shkencore, si hedhës, dhe AKKSHI-ja, si gjenerues  i  të dhënave;

dh) Për të dhënat e publikimeve kërkimore-shkencore, kërkuesit shkencorë, si krijues, dhe AKKSHI-ja, si gjenerues  i  të dhënave;

e) Lidhur me listën e disertacioneve të doktoratave të mbrojtura dhe abstraktet përkatëse në një nga pesë gjuhët e Bashkimit Evropian: anglisht, frëngjisht, gjermanisht, spanjisht, italisht, institucionet e arsimit të lartë, si hedhës;

ë) Lidhur me listën e punimeve të diplomës së ciklit të dytë e të tretë, të mbrojtura, dhe abstraktet përkatëse në një nga pesë gjuhët e Bashkimit Evropian: anglisht, frëngjisht, gjermanisht, spanjisht, italisht, institucionet e arsimit të lartë, si hedhës;

f) Lidhur me listën e përditësuar të kontributit shkencor të personelit akademik e kërkimor të institucioneve të arsimit të lartë dhe kërkimit shkencor e të personelit kërkimor të instituteve të tjera të kërkim-zhvillimit, institucionet e arsimit të lartë, si hedhës.

9. Në bazë të ligjit nr.10325, datë 23.9.2010, “Për bazën e të dhënave shtetërore”, rregulloret për organizimin dhe funksionimin e brendshëm të bazës së të dhënave shtetërore përcaktohen nga institucioni administrues dhe miratohen nga titullari i tij.

10. Palët zbatojnë masat e duhura teknike dhe organizative për të siguruar një nivel sigurie të përshtatshëm ndaj rrezikut për çdo veprim në regjistër lidhur me aksesin, ndryshimin, korrigjimin, përhapjen e të dhënave personale, me qëllim garantimin e gjurmueshmërisë, konfidencialitetit, integritetit, disponueshmërisë dhe qëndrueshmërisë së sistemeve e të shërbimeve të përpunimit.

11. Ngarkohen ministria përgjegjëse për çështjet e shkencës dhe të kërkimit shkencor, Agjencia Kombëtare e Kërkimit Shkencor dhe Inovacionit, Qendra e Shërbimeve Arsimore, subjektet e kërkimit shkencor, të organizuar në institucione të kërkimit shkencor, institute dhe njësi të veçanta të kërkimit shkencor, të ngritura për të kryer veprimtari në fushën e shkencës e të kërkimit shkencor, institucionet e arsimit të lartë dhe kërkuesit shkencorë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës dhe të pikës 4, të kreut III, të vendimit nr.436, datë 26.6.2024, të Këshillit të Ministrave, “Për krijimin, organizimin e funksionimin e Drejtorisë së Përgjithshme të Antikorrupsionit”, me propozimin e ministrit të Shtetit për Administratën Publike dhe Antikorrupsionin, Këshilli i Ministrave

1. Z. Skerdi Tushi emërohet drejtor i Përgjithshëm i Drejtorisë së Përgjithshme të Antikorrupsionit.

2. Ngarkohen ministri i Shtetit për Administratën Publike dhe Antikorrupsionin dhe Drejtoria e Përgjithshme e Antikorrupsionit për zbatimin e këtij vendimi.

     Ky vendim hyn në fuqi menjëherë dhe botohet në “Fletoren zyrtare”.

Në mbështetje të nenit 100 të Kushtetutës dhe të pikës 2, të nenit 53, të  ligjit nr.162/2020, “Për prokurimin publik”, të ndryshuar, me propozimin e Kryeministrit, Këshilli i Ministrave

1. Ngarkimin e Fondit Shqiptar të Zhvillimit, si autoritet kontraktor dhe njësi zbatuese, për kryerjen e procedurave të prokurimit publik, për realizimin e projektit “Ndërtimi i muzeut arkeologjik nëntokësor, parkimi nëntokësor dhe rehabilitimi i sheshit “Nënë Tereza””.

2. Në funksion të zbatimit të projektit, të përcaktuar në pikën 1 të këtij vendimi, Fondi Shqiptar i Zhvillimit ngarkohet të kryejë:

a) të gjitha procedurat, sipas legjislacionit në fuqi për prokurimin publik, duke lidhur edhe kontratat përkatëse për projektimin, zbatimin e mbikëqyrjen e projektit, si dhe të ndjekë zbatimin e tyre e të projektit përkatës;

b) paraqitjen e kërkesave për miratimin e lejeve të zhvillimit dhe të ndërtimit në emër të institucioneve publike përfituese pranë autoritetit kompetent të zhvillimit të territorit, si dhe ndjekjen e të gjitha veprimeve e të procedurave të nevojshme për këtë qëllim, sipas legjislacionit në fuqi për zhvillimin e territorit.

3. Fondi Shqiptar i Zhvillimit, Ministria e Turizmit, Kulturës dhe Sportit dhe Bashkia Tiranë mund të lidhin marrëveshje bashkëpunimi, në funksion të zhvillimit të projektit të përcaktuar në pikën 1 të këtij vendimi.

4. Efektet financiare përballohen nga buxheti i miratuar për Fondin Shqiptar të Zhvillimit.

5. Ngarkohen Ministria e Turizmit, Kulturës dhe Sportit, Bashkia Tiranë dhe Fondi Shqiptar i Zhvillimit për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës, të nenit 6, të ligjit nr.90/2012, “Për organizimin dhe funksionimin e administratës shtetërore”, të pikës 1, të nenit 26, të ligjit nr.99/2024, “Për inspektimin në Republikën e Shqipërisë”, dhe të pikës 3, të nenit 25, të ligjit nr.69/2012, “Për sistemin arsimor parauniversitar në Republikën e Shqipërisë”, të ndryshuar, me propozimin e ministrit të Arsimit, Këshilli i Ministrave

1. Krijimin e Inspektoratit Qendror të Arsimit Parauniversitar (në vijim IQAP), i cili organizohet dhe funksionon si person juridik publik, buxhetor, me seli në Tiranë, në varësi të ministrit përgjegjës për arsimin.

2. IQAP-i financohet nga buxheti i shtetit dhe burime të tjera të ligjshme, sipas legjislacionit në fuqi. Buxheti i IQAP-it përbën zë të veçantë në buxhetin e ministrisë përgjegjëse për arsimin.

3. IQAP-i ka për mision garantimin e respektimit të kërkesave ligjore në të gjitha institucionet arsimore parauniversitare në Shqipëri, nëpërmjet inspektimit në arsimin parauniversitar.

1. IQAP-i ka këto funksione:

a) Verifikon pajtueshmërinë e veprimtarisë së institucioneve të arsimit parauniversitar me kuadrin rregullator në fuqi, nëpërmjet inspektimit;

b) Siguron unifikimin e praktikave të inspektimit në fushën e arsimit parauniversitar.

2. IQAP-i, në përmbushje të misionit dhe përgjegjësive funksionale të tij, është institucioni përgjegjës për ofrimin dhe sigurimin e shërbimit arsimor nëpërmjet ushtrimit të funksionit të inspektimit dhe kryen detyrat, si më poshtë vijon:

a) Vlerëson përmbushjen e kritereve të licencimit dhe të ushtrimit të veprimtarisë së institucioneve arsimore private në fushën e arsimit parauniversitar, si dhe i propozon ministrit dënimin administrativ plotësues të pezullimit apo heqjes së licencës për ushtrimin e veprimtarisë;

b) Planifikon veprimtarinë e inspektimit në arsimin parauniversitar dhe harton programin vjetor e mujor, si dhe raportin vjetor të inspektimit, sipas parashikimeve të ligjit për inspektimin dhe atë në fushën e arsimit parauniversitar;

c) Informon publikun për veprimtarinë e inspektimit dhe vendimet e marra;

ç) Çdo detyrë tjetër të parashikuar në kuadrin ligjor për inspektimin dhe atë në fushën e arsimit parauniversitar.

1. IQAP-i organizohet në nivel qendror dhe ushtron juridiksion në të gjithë territorin e Republikës së Shqipërisë nëpërmjet inspektorëve, të cilët  atashohen edhe pranë drejtorive rajonale të arsimit parauniversitar.

2. Veprimtaria e IQAP-it drejtohet nga kryeinspektori, i cili e përfaqëson atë në marrëdhënie me të tretët dhe është përgjegjës për organizimin, funksionimin, si dhe për cilësinë dhe efektivitetin e veprimtarisë së institucionit.

3. Kryeinspektori i IQAP-it ka këto detyra dhe përgjegjësi:

a) Emëron pas paraqitjes së listës me kandidatët fitues nga komisioni i rekrutimit dhe ecurisë në karrierë, i ngritur në përputhje me ligjin për inspektimin, dhe liron nga detyra inspektorët e IQAP-it,  sipas parashikimeve në kuadrin ligjor në fuqi;

b) Emëron dhe liron nga detyra punonjësit administrativë të IQAP-it;

c) Zbaton dhe administron buxhetin e miratuar të IQAP-it, në përputhje me legjislacionin në fuqi, dhe përgatit projektbuxhetin për vitin e ardhshëm, të cilin ia përcjell ministrit përgjegjës për arsimin, pas marrjes së mendimit këshillimor të inspektorit të Përgjithshëm;

ç) Nxjerr urdhra dhe udhëzime për veprimtarinë e strukturave të IQAP-it në fushën e inspektimit arsimor parauniversitar;

d) Bashkërendon veprimtarinë e IQAP-it me organet qendrore dhe organet e tjera shtetërore në fushën e arsimit parauniversitar;

dh) Siguron kontakte me organe homologe dhe organizata të ndryshme për çështje që lidhen me mirëfunksionimin e IQAP-it;

e) Siguron zbatimin e akteve ligjore e nënligjore, që rregullojnë veprimtarinë e inspektimit arsimor parauniversitar, dhe kontrollon zbatimin e tyre nga strukturat inspektuese;

ë) Merr masat menjëherë për zbatimin e vendimeve të komisionit disiplinor ndaj inspektorëve;

f) Propozon pranë ministrisë përgjegjëse për arsimin dhe Inspektoratit të Përgjithshëm ndryshime në aktet ligjore e nënligjore, me qëllim plotësimin dhe përmirësimin e legjislacionit përkatës.

4. Kryeinspektori i IQAP-it përgjigjet dhe raporton drejtpërdrejt pranë ministrit përgjegjës për arsimin, përveç rasteve kur ministri ka përcaktuar shprehimisht, me urdhër, një njësi tjetër raportimi në aparatin e ministrisë përgjegjëse për arsimin dhe Inspektoratit të Përgjithshëm për veprimtarinë inspektuese.

5. Marrëdhëniet e punës së kryeinspektorit dhe inspektorëve të IQAP-it rregullohen sipas dispozitave të Kodit të Punës, dispozitave të ligjit për inspektimin dhe akteve nënligjore, në zbatim të tij. Marrëdhëniet e punës së punonjësve të tjerë administrativë të IQAP-it rregullohen sipas dispozitave të Kodit të Punës së Republikës së Shqipërisë.

6. Struktura dhe organika e IQAP-it miratohen me urdhër të Kryeministrit, sipas përcaktimeve ligjore në fuqi.

7. IQAP-i identifikohet me stemën, logon dhe vulën zyrtare.

8. Stema e IQAP-it përbëhet nga stema e Republikës dhe shënimet: “Republika e Shqipërisë, Ministria e Arsimit, Inspektorati Qendror i Arsimit Parauniversitar”, në përputhje me përcaktimet e vendimit nr.474, datë 10.7.2003, të Këshillit të Ministrave, “Për mënyrën e përdorimit të stemës së Republikës, si dhe raportin e përmasave të saj”, të ndryshuar.

9. Vula e IQAP-it ka formën dhe elementet e përcaktuara në pikën 2, të vendimit nr.390, datë 6.8.1993, të Këshillit të Ministrave, “Për rregullat e prodhimit, administrimit, kontrollit dhe ruajtjes së vulave zyrtare”, të ndryshuar. Vula e IQAP-it përmban dhe shënimin identifikues “Inspektorati Qendror i Arsimit Parauniversitar”.

10. Vula e IQAP-it prodhohet, administrohet dhe ruhet në përputhje me legjislacionin në fuqi.

1. Funksionet inspektuese të Agjencisë Kombëtare të Arsimit Parauniversitar dhe drejtorive rajonale të arsimit parauniversitar transferohen pranë IQAP-it, sipas parimeve të ligjit nr.99/2024, “Për inspektimin në Republikën e Shqipërisë”.

2. Deri në fillimin e funksionimit të plotë të IQAP-it, sipas përcaktimeve të këtij vendimi, Agjencia Kombëtare e Arsimit Parauniversitar dhe drejtoritë rajonale të arsimit parauniversitar vazhdojnë funksionimin e tyre, sipas strukturave dhe organikave të miratuara.

3. Ngarkohen ministri përgjegjës për arsimin dhe inspektori i Përgjithshëm të marrin masat për përgatitjen e strukturës e të organikës së IQAP-it, si dhe për ndjekjen e procedurave të emërimit të kryeinspektorit, sipas kuadrit ligjor në fuqi, brenda 3 (tre) muajve nga hyrja në fuqi e këtij vendimi.

4. Punonjësit e Agjencisë Kombëtare të Arsimit Parauniversitar dhe të drejtorive rajonale të arsimit parauniversitar, që ushtrojnë  funksione inspektimi, vijojnë marrëdhëniet e punës pranë Inspektoratit Qendror të Arsimit Parauniversitar, sipas strukturës dhe organikës që do të miratohet.

5. Ngarkohen Inspektorati i Përgjithshëm dhe ministria përgjegjëse për arsimin të sigurojë ambientet, infrastrukturën dhe mjetet e nevojshme për ushtrimin e veprimtarisë nga ana e IQAP-it.

6. Në vendimin nr.99, datë 27.2.2019, të Këshillit të Ministrave, “Për krijimin, mënyrën e organizimit e të funksionimit të Agjencisë Kombëtare të Arsimit Parauniversitar”, të ndryshuar, bëhen ndryshimet e mëposhtme:

a) Në pikën 1, të kreut II, dhe në shkronjën “a”, të pikës 8, të  kreut III, fjalët “… dhe inspektimit …” hiqen;

b) Pika 5, e kreut II, shfuqizohet.

7. Ngarkohen Ministria e Arsimit, Inspektorati i Përgjithshëm, Agjencia Kombëtare e Arsimit Parauniversitar dhe Inspektorati Qendror i Arsimit Parauniversitar për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës, të pikës 1, të nenit 7, të   ligjit nr.71/2019, “Për Korporatën e Investimeve Shqiptare”, të neneve 13 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, dhe në zbatim të shkronjës “b”, të pikës 1, të kreut II, të vendimit nr.137, datë 6.3.2024, të Këshillit të Ministrave, “Për përcaktimin e kritereve dhe të procedurës për dhënien e pronës shtetërore me qira, enfiteozë, leasing, shitje, përdorim si kolateral dhe të përdorimit në forma të tjera nga ana e Korporatës së Investimeve Shqiptare”, të ndryshuar, me propozimin e ministrit të Ekonomisë dhe Inovacionit, Këshilli i Ministrave

1. Transferimin në pronësi të shoqërisë aksionare “Korporata e Investimeve Shqiptare”, me NIPT: M01917011D, të pronave shtetërore sipas shtojcës nr.1, bashkëlidhur këtij vendimi, për realizimin e nënprojekteve të investimit.

2. Autorizimin e shoqërisë aksionare “Korporata e Investimeve Shqiptare”, vetë apo nëpërmjet entitetit të krijuar prej saj, për të vepruar si zhvillues i pronave me funksion vetëm publik, në emër dhe për llogari të pronarit shtet, për pronat shtetërore, sipas shtojcës nr.2, bashkëlidhur këtij vendimi.

3. Korporata e Investimeve Shqiptare apo entiteti i krijuar prej saj zhvillon pronat e përcaktuara në shtojcat nr.1 dhe nr.2, bashkëlidhur këtij vendimi, në funksion të realizimit të nënprojekteve të investimit, të cilat kanë si qëllim, ndër të tjera, përmbushjen e interesit publik.

4. Autorizohen Korporata e Investimeve Shqiptare dhe institucionet e përcaktuara në shtojcën nr.3, bashkëlidhur këtij vendimi, që brenda 30 (tridhjetë) ditëve nga hyrja në fuqi e këtij vendimi, të lidhin marrëveshje bashkëpunimi për përcaktimin e standardit, metodologjisë, termave e kushteve të bashkëpunimit për përmbushjen e interesit publik, autoritetit, në pronësi apo përgjegjësi administrimi të të cilit regjistrohet prona e re shtetërore që zhvillohet si rezultat i përmbushjes së kushtit të transferimit të pronës/autorizimit për zhvillim apo përmbushjes së interesit të Korporatës, dhe të kushteve  e nevojave për dorëzimin e pronës së re.

5. Autorizohet Korporata e Investimeve Shqiptare për hapjen e procedurës konkurruese për përzgjedhjen e partnerit privat për nënprojektet e investimit “Korpusi i institucioneve të pavarura” dhe “Qendra për Zhvillimin Multifunksional Tiranë”, sipas rregullave të përcaktuara në  vendimin nr.137, datë 6.3.2024, të Këshillit të Ministrave, “Për përcaktimin e kritereve dhe të procedurës për dhënien e pronës shtetërore me qira, enfiteozë, leasing, shitje, përdorim si kolateral dhe të përdorimit në forma të tjera nga ana e Korporatës së Investimeve Shqiptare”, të ndryshuar, për zhvillimin e pronave, sipas shtojcave nr.1 dhe nr.2, nëpërmjet instrumentit ligjor të sipërmarrjes në përputhje me konceptidenë arkitekturore që do të dalë fitues nga konkursi ndërkombëtar. Shpenzimet për shërbimet e parashikuara në këtë pikë mbulohen nga buxheti i Korporatës së Investimeve Shqiptare.

6. Autorizohet Agjencia Kombëtare e Planifikimit të Territorit, që në të njëjtën procedurë, të asistojë Korporatën e Investimeve Shqiptare, nëpërmjet hartimit të termave të referencës për projektidetë arkitekturore, hartimit të kritereve të kualifikimit për projektuesit dhe kritereve të vlerësimit paraprak e përfundimtar të projektideve arkitekturore.

7. Autorizohet Korporata e Investimeve Shqiptare për negociimin me subjekte private dhe publike me qëllim lidhjen e kontratës përkatëse për zhvillimin e pronave të transferuara në pronësi apo për të cilat ka autorizim zhvillimi, në funksion të realizimit të nënprojekteve të investimit, bazuar në                             vendimin nr.137, datë 6.3.2024, të Këshillit të Ministrave, dhe aktet nënligjore në zbatim të tij.

8. Autorizohet Korporata e Investimeve Shqiptare, vetë apo nëpërmjet subjekteve të krijuara prej saj, të kryejë veprimet me Agjencinë Shtetërore të Kadastrës, institucionet publike kompetente për planifikimin e zhvillimin e territorit apo me institucione të tjera, në kuadër të realizimit të projektit të investimit si dhe të sigurojë regjistrimin, në emër të Republikës së Shqipërisë dhe Korporatës së Investimeve Shqiptare, sipas parashikimeve të marrëveshjes së bashkëpunimit, të pronave të reja shtetërore që do të krijohen në kuadër të nënprojekteve të investimit.

9. Në funksion të zhvillimit të pronave të përcaktuara në këtë vendim, në përputhje me parashikimet ligjore përkatëse për planifikimin dhe zhvillimin e territorit, autorizohet Korporata e Investimeve Shqiptare për të proceduar, nëse është e nevojshme, me prishjen e objekteve, pjesë e pronave të përcaktuara në shtojcat nr.1 dhe nr.2, bashkëlidhur këtij vendimi, vetëm pasi ka siguruar vazhdimin e aktiviteteve të institucioneve publike që përdorin/ administrojnë këto prona në ambiente të tjera deri në marrjen në dorëzim të ambienteve të reja të ndërtuara dhe në zbatim të pikës 5, të kreut II, të vendimit nr.137, datë 6.3.2024, të Këshillit të Ministrave, “Për përcaktimin e kritereve dhe të procedurës për dhënien e pronës shtetërore me qira, enfiteozë, leasing, shitje, përdorim si kolateral dhe të përdorimit në forma të tjera nga ana e Korporatës së Investimeve Shqiptare”, të ndryshuar, ngarkohet Korporata të kryejë procesin e konsolidimit të pronave të përcaktuara në shtojcat nr.1 dhe nr.2 në rast se konstatohet mospërputhje midis gjendjes faktike dhe ligjore të pronës.

10. Ngarkohen Ministria e Punëve të Brendshme, Instituti i Statistikave (INSTAT), Avokati i Popullit, Autoriteti i Konkurrencës, Komisioneri për të Drejtën e Informimit dhe Mbrojtjen e të Dhënave Personale, Komisioneri për Mbikëqyrjen e Shërbimit Civil, Komisioni i Prokurimit Publik, Agjencia Kombëtare e Planifikimit të Territorit, Agjencia Shtetërore e Kadastrës dhe Korporata e Investimeve Shqiptare për zbatimin e këtij vendimi.

    Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës dhe të pikës 4, të kreut III, të  vendimit nr.436, datë 26.6.2024, të Këshillit të Ministrave, “Për krijimin, organizimin e funksionimin e Drejtorisë së Përgjithshme të Antikorrupsionit”, me propozimin e ministrit të Shtetit për Administratën Publike dhe Antikorrupsionin, Këshilli i Ministrave

1. Z. Insidor Rexhepi, drejtor i Përgjithshëm i Drejtorisë së Përgjithshme të Antikorrupsionit, lirohet nga kjo detyrë.

2. Ngarkohen ministri i Shtetit për Administratën Publike dhe Antikorrupsionin dhe Drejtoria e Përgjithshme e Antikorrupsionit për zbatimin e këtij vendimi.

     Ky vendim hyn në fuqi menjëherë dhe botohet në “Fletoren zyrtare”.

Në mbështetje të nenit 100 të Kushtetutës dhe të neneve 10 e 11, të marrëveshjes kuadër, ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, dhe Komisionit Evropian, për rregullat specifike të zbatimit të asistencës financiare të Bashkimit Evropian për Republikën e Shqipërisë në kuadër të zbatimit të Instrumentit të Asistencës së Paraanëtarësimit (IPA II), ratifikuar me ligjin nr.37/2015, me propozimin e ministrit të Financave, Këshilli i Ministrave

1. Pika  5  e  vendimit nr.541, datë 18.6.2015, të Këshillit të Ministrave, “Për përcaktimin e funksioneve, të përgjegjësive dhe të marrëdhënieve ndërmjet autoriteteve dhe strukturave të menaxhimit indirekt të asistencës së Bashkimit Evropian, në kuadër të Instrumentit të Asistencës së Paraanëtarësimit IPA II (2014 – 2020)”, ndryshohet, si më poshtë vijon:

      “5. Funksionet dhe përgjegjësitë e strukturës së menaxhimit

Struktura menaxhuese, e përbërë nga zyra mbështetëse e ZKA‑së dhe organi kontabël, si struktura të veçanta, drejtohet nga drejtori i Përgjithshëm i strukturës për menaxhimin e fondeve të Bashkimit Evropian në ministrinë përgjegjëse për financat, nën përgjegjësinë e ZKA‑së, për zbatimin e programit IPA II, sipas funksioneve të përcaktuara në këtë vendim dhe në përputhje me manualet e brendshme të procedurave dhe rregulloren e brendshme të Ministrisë së Financave.”.

2.  Ngarkohet Ministria e Financave për zbatimin e këtij vendimi.

     Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës dhe të neneve 10 e 11 të marrëveshjes kuadër, ndërmjet Republikës së Shqipërisë, të përfaqësuar nga Këshilli i Ministrave i Republikës së Shqipërisë, dhe Komisionit Evropian, për rregullat e zbatimit të asistencës financiare të BE-së për Shqipërinë, në kuadër të Instrumentit për Asistencën e Paraanëtarësimit (IPA II), ratifikuar me  ligjin nr.37/2015, me propozimin e ministrit të Financave, Këshilli i Ministrave

1. Pika 5, e vendimit nr.966, datë 2.12.2015, të Këshillit të Ministrave, “Për përcaktimin e funksioneve, të përgjegjësive dhe të marrëdhënieve ndërmjet autoriteteve dhe strukturave të menaxhimit indirekt të asistencës së Bashkimit Evropian, në kuadër të Instrumentit të Asistencës së Paraanëtarësimit IPARD II (2014 – 2020), sektori i bujqësisë dhe zhvillimit rural”, ndryshohet, si më poshtë vijon:

      “5. Funksionet dhe përgjegjësitë e strukturës menaxhuese

        Struktura menaxhuese, e përbërë nga zyra mbështetëse e ZKA‑së dhe organi kontabël, si struktura të veçanta, drejtohet nga drejtori i përgjithshëm i strukturës për menaxhimin e fondeve të Bashkimit Evropian në ministrinë përgjegjëse për financat, nën përgjegjësinë e ZKA‑së, për zbatimin e programit IPARD II, sipas funksioneve të përcaktuara në këtë vendim dhe në përputhje me manualet e brendshme të procedurave dhe rregulloren e brendshme të ministrisë përgjegjëse për financat.”.

2. Ngarkohet Ministria e Financave për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës, të shkronjave “a” dhe “b”, të pikës 2, të nenit 8, të ligjit nr.35/2023, “Për kompetencat për caktimin e pagave, trajtimeve të tjera financiare dhe përfitimeve të të punësuarve në institucionet e administratës publike, si dhe të pagës bazë minimale në shkallë vendi”, të ndryshuar, dhe të pikave 2, shkronjat “a” e “d”, dhe 4, të nenit 104, të ligjit nr.82/2024, “Për Policinë e Shtetit”, me propozimin e ministrit të Shtetit për Administratën Publike dhe Antikorrupsionin, Këshilli i Ministrave

1. Lidhjet nr.1, nr.2 dhe nr.3, që i bashkëlidhen vendimit nr.4, datë 9.1.2025, të Këshillit të Ministrave, “Për miratimin e vlerave për secilin element përbërës të pagës bruto mujore dhe përcaktimin e kritereve e të procedurave për dhënien e shpërblimeve për punonjësit e Policisë së Shtetit”, zëvendësohen me lidhjet me të njëjtët numra dhe tituj, që i bashkëlidhen këtij vendimi dhe janë pjesë përbërëse të tij.

2. Vlerat e elementit “paga për gradë”, në lidhjen nr.1, që i bashkëlidhet këtij vendimi dhe është pjesë përbërëse e tij, janë rezultat i indeksimit në masën 2.5% dhe i politikës së rritjes së pagave për punonjësit me gradën “Inspektor” dhe “Nënkomisar” dhe rezultat i indeksimit në masën 2.5% për gradat e tjera.

3. Efektet financiare, që rrjedhin nga zbatimi i  këtij vendimi për vitin 2026, përballohen nga buxheti i Drejtorisë së Përgjithshme të Policisë së Shtetit, miratuar në ligjin nr.87/2025, “Për buxhetin e vitit 2026”.

4. Ngarkohen Ministria e Punëve të Brendshme dhe Drejtoria e Përgjithshme e Policisë së Shtetit për zbatimin e këtij vendimi.

Ky vendim hyn në fuqi pas botimit në “Fletoren zyrtare” dhe i shtrin efektet nga data 1 janar 2026.

Në mbështetje të nenit 100 të Kushtetutës dhe të neneve 10, 11 e 12, të marrëveshjes financiare kuadër të partneritetit, ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, dhe Komisionit Evropian, për rregullat specifike të zbatimit të asistencës financiare të Bashkimit Evropian për Republikën e Shqipërisë, në kuadër të Instrumentit për Asistencën e Paraanëtarësimit (IPA III), ratifikuar me ligjin nr.65/2022, me propozimin e ministrit të Financave, Këshilli i Ministrave

1. Në vendimin nr.206, datë 7.4.2023, të Këshillit të Ministrave, “Për ngritjen e strukturave dhe autoriteteve përgjegjëse për menaxhimin indirekt dhe ushtrimin e funksioneve, të përgjegjësive dhe të marrëdhënieve ndërmjet autoriteteve dhe strukturave të menaxhimit indirekt të asistencës së Bashkimit Evropian, në kuadër të programit për zhvillimin rural të Instrumentit për Asistencën e Paraanëtarësimit (IPARD III)”, bëhen ndryshimet e mëposhtme:

a) Pika 1, e kreut V, ndryshohet, si më poshtë vijon:

“1. Struktura menaxhuese, e përbërë nga zyra mbështetëse e ZKA‑së  dhe organi kontabël, si struktura të veçanta, drejtohet nga drejtori i përgjithshëm i strukturës për menaxhimin e fondeve të Bashkimit Evropian në ministrinë përgjegjëse për financat, nën përgjegjësinë e ZKA‑së, për zbatimin e programit IPARD III, sipas funksioneve të përcaktuara në këtë vendim dhe në përputhje me manualet e brendshme të procedurave dhe rregulloren e brendshme të ministrisë përgjegjëse për financat.”.

b) Kudo në përmbajtje të vendimit, emërtimi “Ministria e Financave dhe Ekonomisë” zëvendësohet me fjalët “… ministria përgjegjëse për    financat …”.

2. Ngarkohet Ministria e Financave për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës, të shkronjave “a” e “b”, të pikës 2, të nenit 8, të ligjit nr.35/2023, “Për kompetencat për caktimin e pagave, trajtimeve të tjera financiare dhe përfitimeve të të punësuarve në institucionet e administratës publike, si dhe të pagës bazë minimale në shkallë vendi”, dhe të nenit 20, të ligjit nr.9210, datë 23.3.2004, “Për statusin e ushtarakut të Forcave të Armatosura të Republikës së Shqipërisë”, të ndryshuar, me propozimin e ministrit të Shtetit për Administratën Publike dhe Antikorrupsionin, Këshilli i Ministrave

1. Lidhjet nr.1 dhe nr.2, të vendimit nr.420, datë 26.6.2024, të Këshillit të Ministrave, “Për trajtimin me pagë dhe shtesa mbi pagë të ushtarakëve aktivë të Forcave të Armatosura të Republikës së Shqipërisë”, të ndryshuar, zëvendësohen me lidhjet me të njëjtët numra dhe tituj, që i bashkëlidhen këtij vendimi dhe janë pjesë përbërëse të tij.

2. Vlerat e elementit “pagë bazë për gradë”, në lidhjen nr.1, si dhe vlerat e elementit “pagë për titull akademik/gradë shkencore/kualifikim shkencor”, në lidhjen nr.2, janë rezultat i indeksimit në masën 2.5%.

3. Efektet financiare, që rrjedhin nga zbatimi i këtij vendimi, për paga dhe sigurime shoqërore e shëndetësore, për vitin 2026, përballohen nga buxheti i Ministrisë së Mbrojtjes, miratuar në ligjin nr.87/2025, “Për buxhetin e  vitit 2026”.

4. Ngarkohet Ministria e Mbrojtjes për zbatimin e këtij vendimi.

Ky vendim hyn në fuqi pas botimit në “Fletoren zyrtare” dhe i shtrin efektet nga data 1 janar 2026.

Në mbështetje të nenit 100 të Kushtetutës, të shkronjave “a” dhe “b”, të pikës 2, të nenit 8, të ligjit nr.35/2023, “Për kompetencat për caktimin e pagave, trajtimeve të tjera financiare dhe përfitimeve të të punësuarve në institucionet e administratës publike, si dhe të pagës bazë minimale në shkallë vendi”, të ndryshuar, dhe të neneve 37, pika 5, e 59, pika 3, të ligjit nr.69/2012, “Për sistemin arsimor parauniversitar në Republikën e Shqipërisë”, të ndryshuar, me propozimin e ministrit të Shtetit për Administratën Publike dhe Antikorrupsionin, Këshilli i Ministrave

1. Lidhjet nr.1, nr.2 e nr.3, të vendimit nr.425, datë 26.6.2024, të Këshillit të Ministrave, “Për miratimin e strukturës dhe të niveleve të pagave të punonjësve mësimorë dhe të punonjësve të tjerë jomësimorë në institucionet arsimore dhe në institucionet plotësuese të sistemit arsimor parauniversitar”, zëvendësohen me lidhjet me të njëjtët numra dhe tituj, që i bashkëlidhen këtij vendimi dhe janë pjesë përbërëse të tij.

2. Vlerat e elementit “paga e pozicionit” për:

a) pozicionet me numra rendorë, nga 7 deri në 11, të lidhjes nr.1, pozicionet me numra rendorë 1 e 2, të lidhjes nr.2, dhe pozicionet me numra rendorë, nga 5 deri në 8, të lidhjes nr.3, janë rezultat i indeksimit në masën 2.5% dhe i politikës së rritjes së pagave;

b) pozicionet e tjera janë rezultat i indeksimit në masën 2.5%.

3. Efektet financiare, që rrjedhin nga zbatimi i këtij vendimi për vitin 2026, përballohen nga buxheti i institucioneve përkatëse, të miratuara në ligjin nr.87/2025, “Për buxhetin e vitit 2026”. Për njësitë e vetëqeverisjes vendore përballohen nga transferta e miratuar në ligjin nr.87/2025, “Për buxhetin e vitit 2026”, si dhe nga të ardhurat e veta të njësive të vetëqeverisjes vendore.

4. Ngarkohen Ministria e Arsimit, Ministria e Ekonomisë dhe Inovacionit dhe njësitë e vetëqeverisjes vendore për zbatimin e këtij vendimi.

Ky vendim hyn në fuqi pas botimit në “Fletoren zyrtare” dhe i shtrin efektet financiare nga data 1 janar 2026.

Në mbështetje të nenit 100 të Kushtetutës dhe të neneve 10, 11 e 12 të marrëveshjes financiare kuadër të partneritetit, ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, dhe Komisionit Evropian, për rregullat specifike të zbatimit të asistencës financiare të Bashkimit Evropian për Republikën e Shqipërisë në kuadër të Instrumentit për Asistencën e Paraanëtarësimit (IPA III), ratifikuar me ligjin nr.65/2022, me propozimin e ministrit të Financave, Këshilli i Ministrave

I. Në vendimin nr.540, datë 20.9.2023, të Këshillit të Ministrave, “Për përcaktimin e funksioneve, përgjegjësive dhe marrëdhënieve ndërmjet autoriteteve e strukturave për menaxhimin indirekt të asistencës financiare të Bashkimit Evropian nën Instrumentin për Asistencën e Paraanëtarësimit                 2021–2027 (IPA III)”, bëhen këto ndryshime:

1. Në nenin 7 bëhen ndryshimet e mëposhtme:

a) Pika 1 ndryshohet, si më poshtë vijon:

 “1. Struktura menaxhuese e përbërë nga zyra mbështetëse e ZKA‑së dhe organi kontabël, si struktura të veçanta, drejtohet nga drejtori i Përgjithshëm i strukturës për menaxhimin e fondeve të Bashkimit Evropian në ministrinë përgjegjëse për financat, nën përgjegjësinë e ZKA‑së, për zbatimin e programit IPA III, sipas funksioneve të përcaktuara në këtë vendim dhe në përputhje me manualet e brendshme të procedurave dhe rregulloren e brendshme të Ministrisë së Financave.”.

b) Në pikën 2, fjalët “… drejtorisë mbështetëse të ZKA‑së …” zëvendësohen me “… strukturës përkatëse …”;

c) Në pikën 3, fjalët “… Drejtorisë së Fondit …” zëvendësohen me “… strukturës përkatëse …”.

2. Shkronja “ç”, e pikës 1, të nenit 12, ndryshohet, si më poshtë vijon:

“ç) një drejtori e veçantë në organikën e ministrisë përgjegjëse për politikat e punësimit, për programin operativ shumëvjeçar në fushën e punësimit të të rinjve (2024 – 2027).”.

3. Në pikën 3, të nenit 17, fjalët “… të paktën një herë në vit …” zëvendësohen  me fjalën “… periodikisht …”.

4. Në pikën 4, të nenit 19, fjalët “… për monitorimin e kapaciteteve …” zëvendësohen me “… për vlerësimin dhe monitorimin e kapaciteteve …”.

II. Ngarkohet Ministria e Financave për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës, të pikës 5, të nenit 6, të ligjit nr.155/2015, “Për lojërat e fatit në Republikën e Shqipërisë”, të  ndryshuar, dhe të nenit 4, të ligjit nr.10325, datë 23.9.2010, “Për bazat e të dhënave shtetërore”, me propozimin e ministrit të Financave, Këshilli i Ministrave

1. Ky vendim përcakton:

a) krijimin e regjistrit elektronik të personave, për të cilët është vendosur moslejimi për t’u futur në ambientet e lojërave të fatit apo në faqe interneti, në aplikacione ose në platformë elektronike, ku mund të luhen lojëra fati, sipas kategorisë së licencuar;

b) rregullat për paraqitjen, shqyrtimin, miratimin, anulimin apo refuzimin e kërkesës për moslejimin e personit për të hyrë në ambientet e lojërave të fatit, në faqe interneti, në aplikacione ose në platformë elektronike, ku mund të luhen lojëra fati, sipas kategorisë së licencuar;

c) rregullat e mbajtjes e të funksionimit të regjistrit elektronik të personave, për të cilët është vendosur moslejimi për t’u futur në ambientet e lojërave të fatit, në faqe interneti, në aplikacione ose në platformë elektronike, ku mund të luhen lojëra fati, sipas kategorisë së licencuar.

2. Ky vendim ka si qëllim, gjithashtu, parandalimin, minimizimin dhe eliminimin e pasojave socio-ekonomike të lidhura me frekuentimin e lojërave të fatit nga ana e personave që shfaqin probleme me përdorimin e lojërave të fatit, probleme, të cilat kërcënojnë seriozisht stabilitetin financiar familjar e individual të lojtarit.

3. Regjistri elektronik i personave, për të cilët është vendosur moslejimi për t’u futur në ambientet e lojërave të fatit apo në faqe interneti, në aplikacione ose në platformë elektronike, ku mund të luhen lojëra fati, sipas kategorisë së licencuar (në vijim, Regjistri), administrohet nga Autoriteti i Mbikëqyrjes të Lojërave të Fatit (në vijim, AMLF).

4. Regjistri do të jetë i aksesueshëm nga të gjithë organizatorët e lojës së fatit të kategorisë përkatëse, të licencuar sipas ligjit nr.155/2015, “Për lojërat e fatit në Republikën e Shqipërisë”, të ndryshuar.

5. Termat e përdorur në këtë vendim kanë të njëjtin kuptim me përkufizimet e përcaktuara në ligjin nr.155/2015, “Për lojërat e fatit në Republikën e Shqipërisë”, të ndryshuar, dhe në ligjin nr.10 325, datë 23.9.2010, “Për bazat e të dhënave shtetërore”.

1. Kërkesa për moslejimin e një personi për t’u futur në ambientet e lojërave të fatit apo në faqe interneti, në aplikacione ose në platformë elektronike bëhet nëpërmjet portalit “e-Albania” nga vetë lojtari ose nga një prej familjarëve të tij, si bashkëshorti/ja, prindërit, fëmija i rritur ose një person tjetër, që jeton me lojtarin në të njëjtën familje. AMLF-ja ruan të dhënat e gjeneruara, në përputhje me legjislacionin në fuqi për mbrojtjen e të dhënave personale.

2. Kërkesa për moslejimin për t’u futur në ambientet e lojërave të fatit apo në faqe interneti, në aplikacione ose në platformë elektronike plotësohet sipas formatit standard të miratuar dhe të publikuar nga AMLF-ja në faqen e saj të internetit.

3. Kërkesa përfshin informacionin, si: emrin dhe mbiemrin e lojtarit, letërnjoftimin/pasaportën, adresën dhe të dhënat e kontaktit, fotografinë e lojtarit, periudhën e moslejimit të kërkuar, si dhe llojin e lojërave për të cilat kërkohet moslejimi.

4. Në rastet kur kërkesa bëhet nga vetë lojtari, AMLF-ja, brenda 2 (dy) ditëve nga paraqitja e kërkesës, pas verifikimit të identitetit të kërkuesit, vendos për pranimin e kërkesës, duke bërë pasqyrimin në regjistër menjëherë. Kërkuesi njoftohet për vendimin me shkrim edhe nëpërmjet portalit                          “e-Albania”.

5. Vendimi përmban:

a) emrin dhe mbiemrin e lojtarit;

b) adresën dhe të dhënat e kontaktit të lojtarit;

c) afatin e moslejimit për të luajtur lojëra fati;

ç) llojin e lojës së fatit.

6. Në rastet kur kërkesa bëhet nga një prej familjarëve të lidhur me lojtarin, përveç informacionit të përcaktuar në pikën 3 të këtij kreu, kërkesa mund të shoqërohet me vetëdeklarimin që lojtari ka probleme serioze personale ose në familje nga përdorimi i lojërave të fatit. Deklarimi i problemeve me përdorimin e lojërave të fatit duhet të shoqërohet edhe me dokumentacion mjekësor apo i lidhur me procese gjyqësore/vendim gjyqësor, që faktojnë problemet e lojtarit me përdorimin e lojërave të fatit, probleme, të cilat kërcënojnë seriozisht stabilitetin financiar, familjar e individual të lojtarit.

7. Pas marrjes së kërkesës, titullari i AMLF-së, brenda 5 (pesë) ditëve, shqyrton dokumentacionin dhe vendos:

a) të miratojë kërkesën në rastet kur dokumentacioni është i plotë dhe përmban të dhëna identifikuese të qarta për gjendjen problematike të lojtarit, pa u kufizuar në vërtetimet/deklarimet e renditura në pikën 5 të këtij kreu; ose

b) të refuzojë kërkesën, duke sqaruar në vendim arsyet dhe shkaqet e refuzimit të kërkesës. Si shkaqe për refuzim kërkese janë kur kërkesa nuk është bërë nga personi i përcaktuar në pikën 1 të këtij vendimi dhe praktika dokumentare e paraqitur nuk identifikon apo provon gjendjen problematike të lojtarit në përdorimin e lojërave të fatit. Në rastet e miratimit të kërkesës, vendimi përmban të njëjtat elemente si në                    pikën 4 të këtij kreu.

8. AMLF-ja njofton kërkuesin me shkrim në adresë postare/nëpërmjet portalit “e-Albania” për vendimin e marrë.

9. Pas përfundimit të afatit të moslejimit, të miratuar sipas kërkesës, AMLF-ja fshin nga regjistri informacionin për moslejimin. AMLF-ja njofton lojtarin nëpërmjet portalit “e-Albania”.

10. Kërkuesi, ndaj të cilit është dhënë një vendim nga AMLF-ja për moslejimin për t’u futur në ambientet e lojërave të fatit apo në faqe interneti, në aplikacione ose në platformë elektronike, ka të drejtën të paraqesë një kërkesë anulimi të këtij vendimi pranë AMLF-së, por jo më parë se 3 (tre) muaj nga data hyrjes në fuqi të vendimit.

11. Kërkesa për anulim paraqitet nga personat e përcaktuar në pikën 1 të këtij kreu dhe përmban argumentet, arsyet e faktet, që provojnë ndryshimin e rrethanave mbi të cilat ishte akorduar vendimi për moslejimin e lojtarit, si dhe çdo dokumentacion shoqërues që disponon kërkuesi.

12. AMLF-ja shqyrton kërkesën për anulim vendimi brenda 5 (pesë) ditëve nga paraqitja e kësaj kërkese dhe vendos:

a) të miratojë kërkesën për anulimin e vendimit në rastet kur provohet dhe identifikohet qartë ndryshimi i rrethanave të lojtarit dhe nuk ekzistojnë më pengesat e shkaqet për moslejim të lojtarit për t’u futur në ambientet e lojërave të fatit apo në faqe interneti, në aplikacione ose në platformë elektronike; ose

b) të refuzojë kërkesën për anulim të vendimit, në rastet kur konstatohet se kërkesa e paraqitur nuk provon ndryshimin e rrethanave dhe të fakteve, mbi të cilat është marrë vendimi për moslejim të lojtarit.

13. AMLF-ja njofton kërkuesin me shkrim në adresë postare/nëpërmjet portalit “e-Albania” për vendimin e marrë.

1. Të dhënat parësore janë të dhënat e mbledhura nga AMLF-ja. Të dhënat parësore janë të dhënat e mëposhtme:

a) Kodi unik identifikues i lojtarit që nuk lejohet;

b) Kërkesa/formulari i aplikimit;

c) Dokumenti shoqërues mjekësor apo i lidhur me procese gjyqësore/vendim gjyqësor, nëse ka;

ç) Statusi i kërkesës;

d) Lloji i lojës, për të cilën zbatohet moslejimi;

dh) Periudha e moslejimit, nga ______ deri _________.

2. Të dhënat dytësore, të cilat merren nga një bazë tjetër të dhënash, ku ato janë parësore dhe me të cilat ndërvepron, janë, si më poshtë vijon:

a) Të dhënat e individit dhe adresa nga baza e të dhënave shtetërore “Regjistri kombëtar i gjendjes civile” dhe “Regjistri kombëtar i adresave”, të administruara nga Drejtoria e Përgjithshme e Gjendjes Civile;

b) Informacioni i kontaktit nga baza e të dhënave shtetërore, portali unik qeveritar “e-Albania”;

c) Të dhënat e subjektit (NUIS), organizatori i licencuar nga baza e të dhënave shtetërore Regjistri Tregtar dhe Regjistri Kombëtar i Licencave, Autorizimeve dhe Lejeve, të administruara nga Qendra Kombëtare e Biznesit (për identifikimin e subjekteve, të cilat do të kenë akses në listën e personave që nuk lejohen).

3. Të gjitha veprimet e kryera në bazën e të dhënave janë të gjurmueshme e të dokumentuara dhe ruhen duke përdorur kodin identifikues të personit të ngarkuar që ka kryer veprimin, datën e orën e konsultimit, fjalët kyç të përdorura për kërkimin, numrin e dosjes dhe të dhënat e konsultuara.

4. AMLF-ja është përgjegjëse për menaxhimin, në përputhje me këtë vendim, të informacionit e aksesimit në bazën e të dhënave. Në rast të konstatimit të veprimeve të paautorizuara dhe të veprimeve që keqpërdorin të dhënat personale, AMLF-ja pezullon menjëherë aksesin e personit, i cili ka vepruar në kundërshtim me ligjin apo udhëzimet e procedurat për administrimin e bazës së të dhënave. Pezullimi i aksesit nuk përjashton përgjegjësinë disiplinore administrative, civile ose penale.

5. Mirëmbajtja dhe funksionimi i regjistrit bëhen në përputhje me kërkesat dhe rregullat për administrimin e bazës së të dhënave, masat e marra për sigurinë e bazës së të dhënave të miratuara nga titullari i AMLF-së.

6. Niveli i aksesit në bazën e të dhënave është, si më poshtë vijon:

a) AMLF-ja ka të drejta të plota administrative mbi bazën e të dhënave në rolet:

i. administrator;

ii. editues;

iii. lexues.

b) Organizatori i licencuar i lojërave të fatit  ka të drejta vetëm për shikim (lexues).

7. Regjistri do të jetë i aksesueshëm nga të gjithë organizatorët e lojës së kategorisë përkatëse, nëpërmjet kredencialeve të vendosura në dispozicion nga AMLF-ja.

8. AMLF-ja, në cilësinë e “kontrolluesit”, sipas legjislacionit në fuqi për mbrojtjen e të dhënave personale, dokumenton masat tekniko-organizative të përshtatura e të zbatuara për garantimin e mbrojtjes së të dhënave personale.

9. Deri në ngritjen e regjistrit elektronik, kërkesa bëhet me shkrim. AMLF-ja informon të gjitha shoqëritë që veprojnë në fushën e lojërave të fatit lidhur me lojtarët e pasqyruar në regjistër, si dhe për ndryshimet e të dhënave të tyre.

10. AMLF-ja ndërmerr të gjitha masat e nevojshme teknike dhe organizative për sigurimin e një ndërveprimi të kontrolluar dhe të mbrojtur me subjektet e licencuara, duke garantuar që çdo akses apo shkëmbim i informacionit të realizohet në mënyrë të sigurt, të dokumentuar e të gjurmueshme, në përputhje me kërkesat e ligjit për mbrojtjen e të dhënave personale në të gjitha fazat e ngritjes dhe të funksionimit të regjistrit.

1. Kërkesat për moslejimin për t’u futur në ambientet e lojërave të fatit apo në faqe interneti, në aplikacione ose në platformë elektronike, ku mund të luhen lojëra fati, të kryera përpara hyrjes në fuqi të këtij vendimi, mbeten në fuqi dhe mund të revokohen me kërkesë të personit që ka kërkuar moslejimin ose me kërkesë të vetë personit të ndaluar.

2. Ngarkohet Autoriteti i Mbikëqyrjes së Lojërave të Fatit për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës, të shkronjës “a”, të nenit 8/a, të  ligjit nr.8744, datë 22.2.2001, “Për transferimin e pronave të paluajtshme të shtetit në njësitë e qeverisjes vendore”, të ndryshuar, dhe të neneve 13 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e ministrit të Shtetit për Pushtetin Vendor, Këshilli i Ministrave

1. Revokimin e së drejtës së pronësisë Bashkisë Tiranë dhe kalimin në përgjegjësi administrimi të Kancelarisë së Urdhrave dhe Medaljeve të pasurive nr.4/870 dhe nr.4/871, në zonën kadastrale 8270, me vendndodhje në Tiranë, sipas kartelave të pasurive dhe hartave kadastrale, që i bashkëlidhen këtij vendimi dhe janë pjesë përbërëse të tij, me qëllim ushtrimin e detyrave funksionale administrative.

2. Kancelarisë së Urdhrave dhe Medaljeve i ndalohet ndryshimi i destinacionit të përdorimit të pasurive të përmendura në pikën 1, të këtij vendimi.

3. Pika 2, e vendimit nr.406, datë 4.7.2018, të Këshillit të Ministrave, “Për ndryshimin e përgjegjësisë së administrimit, nga Ministria e Brendshme te Ministria e Financave dhe Ekonomisë dhe kalimin në pronësi të Bashkisë Tiranë të pjesëve takuese të pronës me emërtimin “Garda e Republikës, Garnizon”, me vendndodhje në zonën kadastrale nr.8270, me numër pasurie 4/134, dhe për një ndryshim në vendimin nr.815, datë 29.11.2007, të Këshillit të Ministrave, “Për miratimin e listës shtesë të inventarit të pronave të paluajtshme shtetërore, të cilat i kalojnë në përgjegjësi administrimi Ministrisë së Brendshme, për Gardën e Republikës”,  të ndryshuar”, shfuqizohet.

4. Ngarkohen Bashkia Tiranë, Kancelaria e Urdhrave dhe Medaljeve dhe Agjencia Shtetërore e Kadastrës për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

Në mbështetje të nenit 100 të Kushtetutës dhe të pikës 2, të nenit 16/1, të     ligjit nr.75/2019, “Për rininë”, të ndryshuar, me propozimin e ministrit të Turizmit, Kulturës dhe Sportit, Këshilli i Ministrave

1. Ky vendim ka si objekt miratimin e rregullave për organizimin e Programit të Talenteve Rinore (në vijim, Programi), si dhe të kritereve, të mënyrës së mbështetjes dhe të masës së shpërblimit financiar për të rinjtë përfitues në program.

2. Programi zbatohet nga Agjencia Kombëtare e Rinisë (në vijim, AKR-ja), në bazë të thirrjeve për aplikim për të rinjtë, sipas përcaktimeve të këtij vendimi.

3. AKR-ja bashkëpunon me institucionet publike brenda vendit dhe me misionet diplomatike apo postet konsullore jashtë vendit për zbatimin e mbarëvajtjen e këtij programi.

4. Programi financohet nëpërmjet fondit grant të dedikuar për rininë, miratuar në ligjin vjetor të buxhetit, si dhe nga donacione ose të ardhura të tjera, nga burime të ligjshme. AKR-ja financon pjesëmarrjen e të rinjve në kompeticionet e veprimtaritë zyrtare ndërkombëtare (në vijim, veprimtaria ndërkombëtare) dhe jep shpërblim financiar, bazuar në rezultatet e arritura prej tyre në veprimtaritë ndërkombëtare.

5. AKR-ja bashkëpunon me ministrinë përgjegjëse për punët e jashtme dhe përfaqësitë diplomatike të Republikës së Shqipërisë jashtë vendit, kur nevojitet verifikimi i organizatorëve dhe i veprimtarisë ndërkombëtare apo për lehtësimin e pjesëmarrjes së të rinjve në vendin pritës.

6. Ministria përgjegjëse për punët e jashtme, në bazë të vlerësimit, përfshin përfituesit e këtij programi në aktivitetet publike të misioneve diplomatike apo posteve konsullore jashtë vendit për të promovuar arritjet e tyre dhe imazhin e Shqipërisë në platformat ndërkombëtare.

1. Kandidati ka të drejtë të përfitojë mbështetje financiare nga Programi, nëse plotëson në mënyrë kumulative kriteret e përgjithshme dhe një nga kriteret e posaçme, sipas përcaktimeve të pikave 2, 3 dhe 4 të këtij kreu.

2. Kriteret e përgjithshme për përfitimin e mbështetjes nga Programi janë, si më poshtë vijon:

a) Kandidati i përket grup-moshës rinore të përcaktuar në shkronjën “f”, të nenit 3, të ligjit nr.75/2019, “Për rininë”, të ndryshuar;

b) Kandidati është shtetas shqiptar.

3. Kriteret e posaçme për përfitimin e mbështetjes nga Programi janë, si më poshtë vijon:

a) Kandidati është përzgjedhur për të përfaqësuar vendin në veprimtarinë ndërkombëtare në fushën e arsimit, në bazë të konkurrimit në nivel kombëtar, të organizuar apo të njohur nga ministria përgjegjëse për arsimin parauniversitar;

b) Kandidati është përzgjedhur për të përfaqësuar vendin në një veprimtari ndërkombëtare të sportit individual, në bazë të konkurrimit në nivel kombëtar, të organizuar nga Komiteti Olimpik Kombëtar Shqiptar ose nga një federatë sportive shqiptare;

c) Kandidati është përzgjedhur për të marrë pjesë në një veprimtari ndërkombëtare në fushën e artit, të kulturës, të edukimit, të shkencës e të teknologjisë të organizuar nga:

i. një organizatë ndërqeveritare;

ii. një qeveri e njohur ndërkombëtarisht;

iii. një nga 100 (njëqind) universitetet më të mira në botë, sipas fushës specifike të edukimit që përkon me fushën e veprimtarisë ndërkombëtare nga “Times Higher Education” – renditja botërore e universiteteve;

iv. një nga 500 (pesëqind) ndërmarrjet më të mëdha në botë, sipas renditjes botërore “Fortune 500”, për vitin e aplikimit;

v. rrjetet panevropiane të organizatave kulturore dhe krijuese, mbështetur nga Programi i Evropës Krijuese i Bashkimit Evropian.

ç) Kandidati është përzgjedhur si delegat zyrtar rinor ose nga programe të ngjashme përfaqësimi për të rinjtë të ngritura nga organizatat ndërqeveritare;

d) Kandidati është përzgjedhur për të përfaqësuar Shqipërinë ose trashëgiminë e saj kulturore, arsimore, shkencore, teknologjike apo sportive në veprimtarinë e organizuar një vend tjetër të konfirmuar nga misioni diplomatik apo posti konsullor i Republikës së Shqipërisë në vendin përkatës.

4. Kandidati që plotëson kriteret e përcaktuara në pikën 1, të këtij kreu, mbështetet me përparësi në Program, nëse u përket grupeve të veçanta, si më poshtë vijon:

a) Ka statusin jetim;

b) Ka humbur kujdestarinë prindërore me vendim gjykate të formës së prerë;

c) Është person me aftësi të kufizuara;

ç) Është person që ka statusin “viktimë trafikimi”/“viktimë e mundshme trafikimi”;

d) I përket pakicës kombëtare rome dhe egjiptiane;

dh) Gëzon statusin e “Fëmijës në përkujdesjen e Republikës”;

e) I përket një familjeje në skemën e ndihmës ekonomike;

ë) Është fëmijë i vendosur në shërbimin e kujdestarisë së përkohshme.

5. Programi mbështet kandidatin, që përmbush kriteret e përcaktuara pikën 1 të këtij kreu, në mënyrat, si më poshtë vijon:

a) Nëpërmjet kompensimit të shpenzimeve të pjesëmarrjes në veprimtarinë ndërkombëtare;

b) Nëpërmjet dhënies së shpërblimit financiar, bazuar në rezultatin e arritur në veprimtarinë ndërkombëtare.

6. Kandidati ka të drejtë të përfitojë mbështetje financiare nga Programi, sipas mënyrave të përcaktuara në shkronjat “a” dhe “b”, të pikës 5, të këtij kreu, vetëm një herë gjatë zbatimit të një thirrjeje vjetore.

7.  Përjashtimisht, kandidati ka të drejtë të përfitojë mbështetje financiare më shumë se një herë, gjatë së njëjtës thirrje vjetore, nëse në bazë të rezultatit të arritur në veprimtarinë ndërkombëtare, për të cilën ka përfituar financimin e Programit, i lind e drejta të marrë pjesë në një veprimtari ndërkombëtare të një niveli më të lartë. Në këtë rast, kandidati i nënshtrohet procedurës së aplikimit për përfitimin e mbështetjes financiare, sipas përcaktimeve të këtij vendimi.

8. Kompensimi i shpenzimeve për pjesëmarrjen në veprimtarinë ndërkombëtare përfshin, si më poshtë vijon:

a) Shpenzimet e udhëtimit vajtje-ardhje, përllogaritur në bazë të distancës ajrore në kilometra, nga vendi i nisjes te vendi i zhvillimit të veprimtarisë, sipas vlerës financiare të përcaktuar për distancat në lidhjen 1, që i bashkëlidhet këtij vendimi;

b) Shpenzimet e akomodimit përgjatë zhvillimit të veprimtarisë ndërkombëtare, të përllogaritur në bazë të netëve të qëndrimit dhe vlerës së kompensimit financiar për natë qëndrimi, të përcaktuar për shtetin ku zhvillohet veprimtaria ndërkombëtare, sipas lidhjes 2, që i bashkëlidhet këtij vendimi;

c) Shpenzimet e udhëtimit vajtje-ardhje dhe akomodimi për një person shoqërues, kur kandidati është fëmijë apo është person me aftësi të kufizuara, që mbështetet me ndihmës personal, në bazë të legjislacionit në fuqi për përfshirjen dhe akesueshmërinë e personave me aftësi të kufizuara.

9.   Kompensimi i shpenzimeve për personin shoqërues përllogaritet, sipas rastit:

a) Në masën 50% të vlerës së përllogaritur për kompensimin e shpenzimeve të udhëtimit vajtje-ardhje dhe të akomodimit për kandidatin përfitues.

b) Në masën 150% të vlerës së përllogaritur për kompensimin e shpenzimeve të udhëtimit vajtje-ardhje dhe të akomodimit për kandidatin përfitues, kur shoqëron një grup prej 3 (tre) ose më shumë fëmijësh në të njëjtën veprimtari ndërkombëtare. Shuma financiare për kompensimin e shpenzimeve përllogaritet në masën 150% mbi vlerën e mbështetjes financiare të akorduar për njërin nga fëmijët, edhe në rastin kur numri i fëmijëve të shoqëruar në veprimtarinë ndërkombëtare është më i lartë se tre.

c) Në masën 100% të vlerës së përllogaritur për kompensimin e shpenzimeve të udhëtimit vajtje-ardhje dhe të akomodimit për kandidatin përfitues, që u përket grupeve të veçanta, sipas përcaktimit të pikës 4, të këtij kreu, apo për kandidatin përfitues me aftësi të kufizuara, që mbështetet me ndihmës personal.

10. Shpenzimet e tjera të nevojshme për pjesëmarrjen e kandidatit në veprimtarinë ndërkombëtare, si pagesa për vizën, regjistrimin, sigurimin e shëndetit, transportin e brendshëm, trajtimin ushqimor etj. nuk përballohen nga Programi. Përjashtimisht, për kandidatët përfitues që u përkasin grupeve të veçanta, të përcaktuara në pikën 4 të këtij kreu, Programi do të ofrojë mbështetje financiare për mbulimin e këtyre shpenzimeve, në masën 10% të vlerës financiare të akorduar për kompensimin e shpenzimeve të akomodimit, sipas përcaktimit të shkronjës “b”, të pikës 8, të këtij kreu, me kusht që këto shpenzime nuk përballohen nga organizatorët e veprimtarisë ndërkombëtare apo nga palë të treta.

11. Programi nuk akordon mbështetje financiare, nëse nga vlerësimi i dokumentacionit të paraqitur, rezulton se shpenzimet e përcaktuara në shkronjat “a”, “b” dhe “c”, të pikës 8, të këtij kreu, përballohen plotësisht nga organizatorët e veprimtarisë ndërkombëtare apo nga palë të treta. Nëse nga vlerësimi i dokumentacionit të paraqitur këto shpenzime rezultojnë pjesërisht në ngarkim të organizatorëve apo palëve të treta, Programi kompenson diferencën midis vlerës së akorduar për mbulimin e udhëtimit dhe të akomodimit e vlerës së kompensimit të shpenzimeve të përcaktuar në këtë vendim.

12. Shpërblimi financiar i jepet kandidatit përfitues bazuar në rezultatin e arritur në një veprimtari ndërkombëtare, të nivelit botëror, evropian e rajonal,  sipas rasteve të mëposhtme:

a) Nëse kandidati klasifikohet nga vendi i parë deri në vendin e tretë, në renditjen përfundimtare të veprimtarisë ndërkombëtare;

b) Nëse kandidati fiton një nga çmimet e para sipas kategorive, akorduar në veprimtarinë ndërkombëtare, që, në bazë të rregullave të organizimit, nuk kryen renditje të përgjithshme të pjesëmarrësve.

13. Vlera e shpërblimit financiar i jepet kandidatit përfitues sipas rasteve të mëposhtme:

a) Në bazë të klasifikimit në renditjen individuale, sipas shkronjës “a”, të lidhjes 3, që i bashkëlidhet këtij vendimi;

b) Në bazë të klasifikimit në renditjen ekipore, sipas shkronjës “b”, të lidhjes 3, që i bashkëlidhet këtij vendimi;

c) Për fitimin e njërit nga çmimet e para në veprimtarinë individuale, sipas shkronjës “c”, të lidhjes 3, që i bashkëlidhet këtij vendimi;

ç) Për fitimin e njërit nga çmimet e para në veprimtarinë ekipore, sipas shkronjës “ç”, të lidhjes 3, që i bashkëlidhet këtij vendimi.

14. Kandidati humb të drejtën e përfitimit të shpërblimit financiar, sipas përcaktimeve të këtij kreu, nëse për rezultatet e arritura në veprimtarinë ndërkombëtare parashikohet mundësia e dhënies së një shpërblimi financiar, përmes një programi të ndryshëm, të financuar nga shteti shqiptar, pavarësisht vlerës financiare të këtij shpërblimi.

1. AKR-ja harton dhe shpall, në fillim të çdo viti kalendarik, thirrjen për ofrimin e mbështetjes financiare nga Programi dhe mundësinë për aplikimin e kandidatëve. Thirrja shpallet në faqen e internetit të institucionit dhe qëndron e hapur përgjatë gjithë vitit kalendarik deri në shpenzimin e plotë të fondeve të akorduara për Programin.

2. Thirrja për aplikim përmban:

a) vlerën e mbështetjes financiare të akorduar për thirrjen;

b) udhëzimet për përgatitjen dhe dorëzimin e aplikimit;

c) formularët e aplikimit;

ç) informacionin për kriteret dhe procedurën e vlerësimit të aplikimeve.

3. Aplikimi për mbështetjen financiare, sipas përcaktimeve të këtij vendimi, bëhet nga:

a) kandidati, nëpërmjet llogarisë së tij, në shërbimin përkatës në portalin “e-Albania”;

b) prindi ose kujdestari ligjor, kur kandidati është fëmijë, në shërbimin përkatës në portalin “e-Albania”;

c) personi shoqërues,  nëpërmjet llogarisë së tij, në shërbimin përkatës në portalin “e-Albania” vetëm për përftimin e mbështetjes financiare, sipas përcaktimeve të shkronjës “c”, të pikës 8, të kreut II, të këtij vendimi.

4. Aplikimi për përfitimin e mbështetjes financiare, sipas përcaktimeve të shkronjës “a”, të pikës 5, të kreut II, të këtij vendimi, përfshin informacionin për kandidatin, veprimtarinë ndërkombëtare, organizatorët, mënyrën e përzgjedhjes së pjesëmarrësve,  shpenzimet për pjesëmarrjen dhe personin shoqërues. Dokumentet që ngarkohen në portalin “e-Albania” janë, si më poshtë vijon:

a) Ftesa e pjesëmarrjes për kandidatin, lëshuar nga organizatorët e veprimtarisë ndërkombëtare.

b) Dokumenti i publikuar apo i lëshuar nga organizatorët e veprimtarisë ndërkombëtare, ku përcaktohen shpenzimet e mbuluara prej tyre apo të palëve të treta, për pjesëmarrjen e kandidatëve dhe/ose të personave shoqërues në veprimtarinë ndërkombëtare.

c) Vetëm për veprimtarinë ndërkombëtare të përcaktuar në shkronjën “a”, të pikës 3, të kreut II, të këtij vendimi, ngarkohet akti i miratimit të pjesëmarrjes së kandidatit, lëshuar nga ministria përgjegjëse për arsimin parauniversitar. Në këtë rast, akti përmban dhe konfirmimin, nëse institucioni financon apo jo, përmes fondeve të veta, pjesëmarrjen e kandidatëve dhe/ose të personave shoqërues në veprimtarinë ndërkombëtare.

ç) Vetëm për veprimtarinë ndërkombëtare të përcaktuar në shkronjën “b”, të pikës 3, të kreut II, të këtij vendimi, ngarkohet akti i miratimit të pjesëmarrjes së kandidatit dhe, sipas rastit, të personit shoqërues,  lëshuar nga Komiteti Olimpik Kombëtar Shqiptar apo federata sportive shqiptare. Në këtë rast, akti përmban edhe konfirmimin, nëse institucioni përkatës financon apo jo, përmes fondeve të veta, pjesëmarrjen e kandidatëve dhe/ose të personave shoqërues në veprimtarinë ndërkombëtare.

d) Vetëm për veprimtarinë ndërkombëtare të përcaktuar në shkronjën “d”, të pikës 3, të kreut II,  të këtij vendimi, ngarkohet dokumenti i lëshuar nga misioni diplomatik apo posti konsullor i Republikës së Shqipërisë në vendin përkatës. Dokumenti konfirmon rëndësinë e veprimtarisë për promovimin e imazhit ose të trashëgimisë së Shqipërisë  në vendin përkatës dhe mbështetjen e kandidatit për pjesëmarrjen në këtë veprimtari.

dh) Sipas rastit, dokumenti që vërteton se kandidati u përket grupeve të veçanta, sipas përcaktimit të pikës 4, të kreut II, të këtij vendimi.

e) Sipas rastit, vendimi i komisionit mjekësor përkatës që kandidati është person me aftësi të kufizuara, që ka nevojë për përkujdesje personale.

ë) Çdo dokument tjetër që kandidati vlerëson të rëndësishëm për mbështetjen e aplikimit të tij.

5. Aplikimi për përfitimin e mbështetjes financiare, sipas përcaktimeve të shkronjës “b”, të pikës 5, të kreut II, të këtij vendimi, përfshin informacionin për kandidatin, veprimtarinë ndërkombëtare, organizatorët, mënyrën e përzgjedhjes së pjesëmarrësve,  rezultatet e shpallura dhe përmban një pikë të veçantë për deklarimin që kandidati nuk është përfshirë në një procedurë administrative, që synon përfitimin e shpërblimit financiar për rezultatin e arritur në veprimtarinë ndërkombëtare, në kuadër të një programi të ndryshëm, financuar nga shteti shqiptar. Dokumentet që ngarkohen në portalin “e-Albania” janë, si më poshtë vijon:

a) Çmimi, certifikata apo dokumenti zyrtar i lëshuar nga organizatorët e veprimtarisë ndërkombëtare, që vërteton rezultatin e arritur nga kandidati në këtë veprimtari;

b) Sipas rastit, dokumenti që vërteton se kandidati u përket grupeve të veçanta, sipas përcaktimit të pikës 4, të kreut II, të këtij vendimi;

c) Çdo dokument tjetër që kandidati vlerëson të rëndësishëm për mbështetjen e aplikimit të tij.

6. Dokumentet që ngarkohen në portalin “e-Albania”, për aplikimin për përfitimin e mbështetjes financiare, sipas përcaktimeve të shkronjës “c”, të pikës 9, të kreut II, të këtij vendimi, janë, si më poshtë vijon:

a) Raporti mjeko-ligjor, që vërteton se personi shoqërues është i aftë fizikisht e mendërisht, nëse personi është i ndryshëm nga prindi apo nga kujdestari ligjor i kandidatit përfitues apo personi është i ndryshëm nga ndihmësi personal i kandidatit përfitues me aftësi të kufizuara;

b) Vetëdeklarimi i personit për marrjen përsipër të detyrimeve dhe të përgjegjësisë për shoqërimin e kandidatit/ëve në veprimtarinë ndërkombëtare.

7. Dokumentet e aplikimit në thirrje, sipas përcaktimeve të këtij kreu, në momentin e ngarkimit në portalin “e-Albania” duhet të jenë në gjuhën shqipe ose të përkthyera në gjuhën shqipe nga përkthyes zyrtarë, në origjinal ose të njësuara me origjinalin.

8. Afati i lejuar për dorëzimin e  aplikimeve për përfitimin e mbështetjes financiare është, si më poshtë vijon:

a) Jo më vonë se 30 (tridhjetë) ditë kalendarike përpara fillimit të veprimtarisë ndërkombëtare, sipas mënyrës së mbështetjes, të përcaktuar në pikën 3, të kreut 2, të këtij vendimi;

b) Jo më vonë se 45 (dyzet e pesë) ditë kalendarike pas përfundimit të veprimtarisë ndërkombëtare, sipas mënyrës së mbështetjes, të përcaktuar në pikën 12, të kreut II, të këtij vendimi.

9. Përjashtimisht, do të pranohet aplikimi i dorëzuar përtej afatit të përcaktuar në pikën 8 të këtij kreu, kur, për shkak të kushteve dhe të afateve të zhvillimit të veprimtarisë ndërkombëtare, respektimi i këtij afati nga kandidati nuk do të ishte i mundur.

10. Jo më vonë se 10 (dhjetë) ditë kalendarike nga shpallja e thirrjes për aplikim, me urdhër të drejtorit të Përgjithshëm të AKR-së, ngrihet komisioni i vlerësimit. Komisioni i vlerësimit përbëhet nga 3 (tre) anëtarë, ku njëri prej tyre mban pozicionin e kryetarit të komisionit.

11. Anëtarët e komisionit duhet të kenë jo më pak se 2 (dy) vjet eksperiencë pune në fushën e rinisë.

12. Komisioni i vlerësimit ushtron këto detyra:

a) Administron e vlerëson të gjitha aplikimet e dorëzuara në thirrje;

b) Bën vlerësimin e aplikimeve, duke përcaktuar njëkohësisht vlerën e mbështetjes financiare, që do t’u akordohet përfituesve;

c) Harton e nënshkruan raportin e vlerësimit për çdo aplikim të dorëzuar në thirrje.

13. Komisioni i vlerësimit, brenda 7 (shtatë) ditëve kalendarike nga data e marrjes së aplikimit, bën verifikimin e  përmbushjes së kritereve të thirrjes publike dhe, sipas rastit:

a) Merr vendimin për pranimin e aplikimit, duke përcaktuar edhe vlerën e mbështetjes financiare, që i akordohet përfituesit.

b) Merr vendimin për refuzimin e aplikimit për mbështetjen financiare. Ky vendim përmban, në çdo rast, edhe arsyet e refuzimit.

c)  Kërkon informacion shtesë, nëpërmjet portalit “e-Albania”, në  rastin kur aplikimi dhe dokumentacioni shoqërues nuk vërtetojnë përmbushjen e kritereve të thirrjes, duke lënë një afat prej 7 (shtatë) ditësh kalendarike për plotësimin e dokumentacionit. Aplikimi refuzohet, në rast se dokumentacioni nuk plotësohet brenda afatit të caktuar.

14. Komisioni i vlerësimit nuk shqyrton asnjë aplikim për mbështetje financiare, i dorëzuar përtej afatit të lejuar, sipas përcaktimeve të pikës 8 të këtij kreu,  apo nuk mund të rivendoset në afat, në bazë të parashikimit të pikës 9 të këtij kreu.

15. Komisioni i vlerësimit shqyrton me përparësi aplikimin për mbështetje financiare të dorëzuar nga kandidati që u përket grupeve të veçanta të përcaktuara në pikën 4 të kreut II.

16. Vendimi për pranimin apo refuzimin e aplikimit për mbështetje financiare merret me shumicë votash nga anëtarët e komisionit të vlerësimit dhe i njoftohet kandidatit në portalin “e-Albania” me nënshkrim ose vulë elektronike.

17. Komisioni i vlerësimit, kur vërteton plotësimin e kushteve për akordimin e mbështetjes financiare, sipas përcaktimit të shkronjës “c”, të pikës 5, të kreut II, të këtij vendimi, njofton personin shoqërues, duke i lënë një afat prej 5 (pesë) ditësh kalendarike për ngarkimin e dokumenteve të përcaktuara në pikën 6, të këtij kreu, në portalin “e-Albania”. Në rast se personi shoqërues nuk kryen aplikimin brenda afatit të caktuar, komisioni i vlerësimit njofton kandidatin përfitues dhe i kërkon të përcaktojë një person shoqërues të ndryshëm nga i pari.

18. Komisioni i vlerësimit, kur, nga shqyrtimi i dokumentacionit të aplikimit të kandidatit, konstaton që është përcaktuar më shumë se një person shoqërues, njofton e fton për dorëzimin e aplikimit, nëpërmjet portalit “e-Albania”, fillimisht:

a) personin shoqërues, të përcaktuar në aktin e miratimit të lëshuar nga ministria përgjegjëse për arsimin parauniversitar për pjesëmarrjen në veprimtarinë ndërkombëtare, të përcaktuar në shkronjën  “a”, të pikës 3, të kreut II, të këtij vendimi;

b) personin shoqërues, të përcaktuar në aktin e miratimit të lëshuar nga Komiteti Olimpik Kombëtar Shqiptar apo federata sportive shqiptare për pjesëmarrjen në veprimtarinë ndërkombëtare, të përcaktuar në shkronjën  “b”, të pikës 3, të kreut II, të këtij vendimi;

c) personin shoqërues, të përcaktuar në dokumentin e konfirmimit, të lëshuar nga misioni diplomatik apo posti konsullor i Republikës së Shqipërisë në vendin përkatës të zhvillimit të veprimtarisë, të përcaktuar në shkronjën  “d”, të pikës 3, të kreut II, të këtij vendimi;

ç) personin shoqërues, prindi ose kujdestari ligjor, për pjesëmarrjen në veprimtarinë ndërkombëtare, të përcaktuar në shkronjat “c” dhe “ç”, të pikës 3, të kreut II, të këtij vendimi.

19. Komisioni i vlerësimit, kur vlerëson se dokumentacioni i ngarkuar, sipas pikës 18 të këtij kreu, nuk është i plotë, njofton personin shoqërues, nëpërmjet portalit “e-Albania”, duke i lënë një afat prej 5 (pesë) ditësh kalendarike për plotësim. Në rast se personi shoqërues nuk plotëson dokumentacionin e kërkuar brenda afatit të caktuar, komisioni i vlerësimit njofton kandidatin përfitues dhe i kërkon të përcaktojë një person shoqërues të ndryshëm.

20. Vendimi për pranimin ose refuzimin e aplikimit për mbështetje financiare për personin shoqërues merret nga komisioni i vlerësimit me shumicë votash, bazuar në shqyrtimin e dokumentacionit të paraqitur. Vendimi i komunikohet personit shoqërues, nëpërmjet portalit “e-Albania”, me nënshkrim ose vulë elektronike.

Procedura e akordimit të mbështetjes financiare për personin shoqërues lejohet të përsëritet vetëm 1 (një) herë me një person shoqërues të ndryshëm nga i pari, në rast se:

a) komisioni i vlerësimit merr vendim refuzimi;

b) personi shoqërues nuk paraqet aplikimin brenda afatit të përcaktuar në pikën 17 të këtij kreu;

c) personi shoqërues nuk plotëson dokumentacionin brenda afatit të përcaktuar në pikën 19 të këtij kreu.

Në rast se edhe aplikimi i dytë nuk depozitohet brenda afatit apo nuk paraqitet dokumentacioni i kërkuar, kandidati humbet të drejtën për përfitimin e mbështetjes financiare për shoqërimin në veprimtarinë ndërkombëtare, në kuadër të këtij programi.

21. Ankimi ndaj vendimit të komisionit të vlerësimit për refuzimin e aplikimit apo për vlerën e përllogaritur të mbështetjes financiare, që i akordohet kandidatit përfitues apo personit shoqërues, i drejtohet drejtorit të Përgjithshëm të AKR-së, nëpërmjet portalit “e-Albania”, në përputhje me rregullat e parashikuara në Kodin e Procedurave Administrative.

22. AKR-ja lidh marrëveshjen për mbështetjen financiare të kandidatit përfitues dhe të personit shoqërues. Disbursimi i mbështetjes financiare bëhet nga AKR-ja te llogaria bankare e përfituesit dhe e shoqëruesit të tij, brenda 14 (katërmbëdhjetë) ditëve kalendarike nga nënshkrimi i marrëveshjes për mbështetjen nga Programi.

23. Kandidati përfitues dhe personi shoqërues dorëzojnë pranë AKR-së dokumentet justifikuese të udhëtimit dhe të akomodimit, brenda 14 (katërmbëdhjetë) ditëve kalendarike nga data e përfundimit të veprimtarisë ndërkombëtare.

24. Kandidati përfitues ngarkohet me detyrimin e kthimit të mbështetjes financiare të përfituar sipas përcaktimeve të shkronjave “a” dhe “b”, të pikës 5, të kreut II, të këtij vendimi, në rastet kur, pa shkaqe të arsyeshme:

a) nuk paraqitet në veprimtarinë ndërkombëtare;

b) përjashtohet nga veprimtaria ndërkombëtare;

c) nuk përmbyll veprimtarinë ndërkombëtare;

ç) nuk dorëzon pranë AKR-së dokumentet justifikuese të udhëtimit e të akomodimit.

25. Personi shoqërues ngarkohet me detyrimin e kthimit të mbështetjes financiare të përfituar sipas përcaktimit të shkronjës “c”, të pikës 5, të kreut II, të këtij vendimi, në rastet kur, pa shkaqe të arsyeshme:

a) kandidati përfitues apo personi shoqërues nuk paraqitet në veprimtarinë ndërkombëtare;

b) kandidati përfitues përjashtohet nga veprimtaria ndërkombëtare;

c) kandidati përfitues nuk përmbyll veprimtarinë ndërkombëtare;

ç) nuk dorëzon pranë AKR-së dokumentet justifikuese të udhëtimit e të akomodimit.

26. Për efekt të zbatimit të këtij vendimi, shkaqe të arsyeshme do të konsiderohen sëmundje të menjëhershme apo ndërrim jete të personit apo një anëtari të familjes së tij, fatkeqësi natyrore, anulime dhe vonesa të mjeteve të transportit, që nuk varen nga personi, të vërtetuara sipas dokumentit përkatës.

IV. DISPOZITA KALIMTARE DHE TË FUNDIT

1. Deri në ngritjen dhe funksionimin e sistemit elektronik për financimin e projekteve të dedikuara dhe të regjistrit elektronik për të rinjtë, aplikimet për përfitimin e mbështetjes financiare në Program do të administrohen në format fizik, nëpërmjet rrugëve postare dhe nëpërmjet postës elektronike, pranë AKR-së, sipas informacionit të dhënë në thirrjen e publikuar në faqen zyrtare të internetit.

2. AKR-ja përgatit raportin vjetor të monitorimit të Programit, brenda datës 31 mars të vitit pasardhës, dhe ia paraqet ministrisë përgjegjëse për rininë.

 3. Vlerësimi i ndikimit të mbështetjes financiare të Programit bëhet çdo 2 (dy) vjet nga struktura përgjegjëse pranë ministrisë përgjegjëse për rininë.

4. Ngarkohet Agjencia Kombëtare e Rinisë për shpalljen e thirrjes për ofrimin e mbështetjes financiare nga Programi i Talenteve Rinore për vitin 2026, brenda 45 (dyzet e pesë) ditëve nga hyrja në fuqi e këtij vendimi.

5. Ngarkohen ministria përgjegjëse për rininë, ministria përgjegjëse për punët e jashtme dhe Agjencia Kombëtare e Rinisë për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës dhe të pikës 10, të nenit 59, të ligjit nr.152/2013, “Për nëpunësin civil”, të ndryshuar, me propozimin e ministrit të Shtetit për Administratën Publike dhe Antikorrupsionin, Këshilli i Ministrave

1. Në vendimin nr.115, datë 5.3.2014, të Këshillit të Ministrave, “Për përcaktimin e procedurës disiplinore dhe të rregullave për krijimin, përbërjen e vendimmarrjen në komisionin disiplinor në shërbimin civil”, të ndryshuar, bëhen shtesat dhe ndryshimet e mëposhtme:

a) Në kreun I bëhen këto shtesa:

i. Në fund të shkronjës “d”, të pikës 2, shtohen fjalët “… ose zëvendëssekretarin e Përgjithshëm të Këshillit të Ministrave, për procedurën disiplinore të nisur, sipas shkronjës “b”, të pikës 6/1, të kreut II, të këtij vendimi.”;

ii. Në fund të shkronjës “d”, të pikës 3, shtohen fjalët “… ose zëvendëssekretarin e Përgjithshëm të Këshillit të Ministrave, për procedurën disiplinore të nisur, sipas shkronjës “b”, të pikës 6/1, të kreut II, të këtij vendimi.”.

b) Pika 6/1, e kreut II, ndryshohet, si më poshtë vijon:

“6/1. Përjashtimisht, kërkesa/rekomandimi i depozituar në institucion, sipas pikës 3, të këtij kreu, i dërgohet komisionit disiplinor për rastet kur:

a) shkeljet disiplinore të pretenduara janë konstatuar nga Agjencia për Dialog dhe Bashkëqeverisje;

b) shkeljet disiplinore të pretenduara janë konstatuar gjatë veprimtarisë së grupit akselerator nga zëvendëssekretari i Përgjithshëm i Këshillit të Ministrave.”.

2. Ngarkohen institucionet, pjesë e fushës së veprimit të legjislacionit për nëpunësin civil, për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

Në mbështetje të nenit 100 të Kushtetutës dhe të pikës 5, të nenit 24, të ligjit nr.90/2012, “Për organizimin dhe funksionimin e administratës shtetërore”, me propozimin e ministrit të Shtetit për Administratën Publike dhe Antikorrupsionin, Këshilli i Ministrave

1. Në kreun III, të vendimit nr.867, datë 10.12.2014, të Këshillit të Ministrave, “Për procedurat e bashkëpunimit në institucionet e administratës shtetërore”, të ndryshuar, bëhen shtesat dhe ndryshimet e mëposhtme:

a) Pas pikës 18 shtohen pikat 18/1 dhe 18/2, me këtë përmbajtje:

“18/1. Nëpunësit dhe ekspertët e jashtëm, të cilët caktohen për të qenë pjesë e grupit të përbashkët, nënshkruajnë deklaratën me shkrim, ku pranojnë detyrat dhe përgjegjësitë e punës në grupin e përbashkët, duke u zotuar të ushtrojnë me përgjegjshmëri dhe integritet funksionet në grupin e përbashkët, duke shërbyer me ndershmëri e profesionalizëm, brenda fushës së tyre të përgjegjësisë dhe ekspertizës.

18/2. Secili anëtar i grupit të përbashkët mban përgjegjësi ligjore individuale për punën dhe veprimtarinë e tij, në kuadër të kryerjes së detyrave që i janë caktuar. Përgjegjësia ligjore është e kufizuar brenda fushës së tij të përgjegjësisë, nivelit të ekspertizës dhe veprimtarisë, detyrës e kontributit të dhënë apo të kërkuar, në kuadër të detyrave/projektit të grupit të përbashkët.”.

b) Shkronjat “d” dhe “dh”, të pikës 19, ndryshohen, si më poshtë vijon:

“d) Përcakton detyrat konkrete për secilin prej anëtarëve të grupit të përbashkët, duke marrë në konsideratë:

i. detyrën e përbashkët/projektin e përcaktuar, sipas pikës 9, të këtij kreu;

ii. fushën e përgjegjësisë që mbulon secili anëtar i grupit të punës;

iii. ekspertizën dhe eksperiencën e secilit anëtar të grupit të punës;

iv. institucionin që përfaqëson anëtari i grupit të punës dhe, në rastin e ekspertëve të jashtëm, profilin dhe kualifikimin, si dhe arsyet e angazhimit të tij, të përcaktuara në urdhrin për ngritjen e grupit të punës.”.

dh) Kontrollon zbatimin e detyrave për secilin prej anëtarëve të grupit të përbashkët dhe mund të kërkojë zëvendësimin e tyre, në rast se performanca e anëtarit është e ulët dhe/ose përbën pengesë për funksionimin dhe mbarëvajtjen e punës.”.

c) Pas shkronjës “dh”, të pikës 19, shtohen shkronjat “e”, “ë”, “f” dhe “g”, me këtë përmbajtje:

“e) Identifikon dhe individualizon kontributin e secilit anëtar të grupit të përbashkët;

ë) Kujdeset për përgatitjen e procesverbalit për secilën mbledhje të grupit të përbashkët dhe evidentimin në të të kontributeve individuale të secilit anëtar të grupit të përbashkët;

f) Në përfundim të veprimtarisë së grupit, përmbledh të gjithë dokumentacionin që dëshmon punën dhe kontributin e secilit anëtar dhe ia bashkëlidh ato procesverbaleve të punës që arkivohen, sipas përcaktimeve të bëra në urdhrin për ngritjen e grupit;

g) Kryen çdo veprim tjetër të nevojshëm për realizimin e qëllimit, objektit dhe detyrave, për të cilat është ngritur grupi i përbashkët.”.

ç) Pas pikës 20 shtohet pika 20/1, me këtë përmbajtje:

“20/1. Mbledhjet e grupit evidentohen përmes procesverbalit që përgatitet për çdo mbledhje të grupit të punës. Në procesverbalin për çdo mbledhje shënohen diskutimet, kontributet dhe e gjithë veprimtaria e punës së grupit të përbashkët. Procesverbali miratohet dhe nënshkruhet në mbledhjen e ardhshme të grupit.”.

d) Në fund të pikës 21 shtohet fjalia, me këtë përmbajtje:

“Në rast se mungesa e anëtarit është e përsëritur dhe përbën pengesë për punën e grupit të punës, drejtuesi i grupit mund të kërkojë zëvendësimin e tij, pranë titullarit të institucionit që e ka caktuar.”.

2. Ngarkohen institucionet e administratës shtetërore për zbatimin e këtij vendimi.

Ky vendim hyn në fuqi pas botimit në “Fletoren zyrtare”.