Vendime të miratuara në mbledhjen e Këshillit të Ministrave, datë 4 Nëntor 2022:
V E N D I M
PËR
KRIJIMIN E BAZËS SË TË DHËNAVE SHTETËRORE “SISTEMI ELEKTRONIK I MENAXHIMIT TË DENONCIMEVE PËR REKORDET KORRUPTIVE”
Në mbështetje të nenit 100 të Kushtetutës dhe të nenit 4, të ligjit nr.10325, datë 23.9.2010, “Për bazat e të dhënave shtetërore”, me propozimin e ministrit të Drejtësisë, Këshilli i Ministrave
V E N D O S I:
I. DISPOZITA TË PËRGJITHSHME
1. Krijimin e bazës së të dhënave shtetërore “Sistemi Elektronik i Menaxhimit të Denoncimeve për Rekordet Korruptive” (këtu e në vijim “SEMDRK”).
2. SEMDRK-ja është një bazë e të dhënave shtetërore, nëpërmjet së cilës grumbullohet informacion i organizuar dhe i ruajtur në formë elektronike për denoncimet e rasteve të korrupsionit, informacion për menaxhimin, trajtimin e statusin e tyre, si dhe raportimin e të dhënave korruptive nga struktura përgjegjëse kundër korrupsionit dhe koordinatorët e Rrjetit kundër Korrupsionit.
3. SEMDRK-ja administrohet nga Ministria e Drejtësisë, në përputhje me parimet, kriteret dhe masat tekniko-organizative të zbatueshme për garantimin dhe menaxhimin e sigurisë në përpunimin e të dhënave personale, sipas parashikimeve të legjislacionit në fuqi për mbrojtjen e të dhënave personale si dhe parimin e konfidencialitetit, duke mos bërë publike asnjë të dhënë ose informacion të marrë për shkak të detyrës/gjatë kryerjes së saj.
4. Struktura përgjegjëse për gjenerimin e të dhënave në SEMDRK është struktura përgjegjëse për antikorrupsionin në Ministrinë e Drejtësisë, e cila kujdeset për grumbullimin, mbledhjen e të dhënave, përpunimin e tyre statistikor, analizën dhe përgatitjen e raporteve përkatëse.
II. PËRMBAJTJA, ADMINISTRIMI DHE RUAJTJA E TË DHËNAVE TË SEMDRK-SË
1. SEMDRK-ja përmban të dhënat, si më poshtë vijon:
a) Të dhënat për rastet e denoncuara;
b) Gjurmimin e të dhënave dhe përpunimin e informacionit që i bëhet rasteve të denoncuara;
c) Të dhëna mbi statistikat;
ç) Unifikimin dhe ruajtjen në formë elektronike të të dhënave për rastet e denoncuara.
2. Të dhënat, që përmban SEMDRK-ja, ndahen në të dhëna parësore dhe dytësore:
a) Të dhënat parësore janë:
i. data e ankesës/denoncimit;
ii. data dhe numri i regjistrimit të ankesës/denoncimit në strukturën përgjegjëse;
iii. objekti i ankesës/denoncimit;
iv. subjekti dhe institucioni ndaj të cilit drejtohet ankesa/denoncimi;
v. lista e dokumenteve shoqëruese të ankesës/denoncimit;
vi. afati për trajtimin e ankesës/denoncimit;
vii. dokumente lidhur me hapat e ndërmarrë nga struktura antikorrupsion;
viii. të dhënat e koordinatorit antikorrupsion i cili ndjek çështjen.
b) Të dhëna dytësore janë:
i. të dhënat e identifikimit të kërkuesit, si emri, atësia, mbiemri;
ii. të dhënat referenciare nga ndërveprimi me bazat e tjera të të dhënave, sipas pikës 1, të kreut III, të këtij vendimi.
III. NDËRVEPRIMI ME BAZAT E TJERA TË TË DHËNAVE DHE NIVELI I AKSESIMIT PËR SUBJEKTET E INTERESUARA
1. Baza e të dhënave të SEMDRK-së ndërvepron me:
a) Regjistrin Kombëtar të Gjendjes Civile, administruar nga Drejtoria e Përgjithshme e Gjendjes Civile;
a) Portalin unik qeveritar “e-albania”;
b) Platformën “Me ty, për Shqipërinë që duam”;
ç) sisteme të tjera sipas legjislacionit në fuqi.
2. Dhënës të informacionit janë:
a) çdo subjekt, i cili bën një denoncim, kërkesë apo ankesë, të administruar nëpërmjet platformës “Me ty, për Shqipërinë që duam”;
b) struktura përgjegjëse për antikorrupsionin në Ministrinë e Drejtësisë;
c) koordinatorët e Rrjetit kundër Korrupsionit;
ç) autoritetet publike/private që kanë detyrimin në bazë të ligjeve të posaçme.
3. Subjekte të interesuara janë:
a) SPAK-u;
b) prokuroria;
c) çdo subjekt tjetër, i përcaktuar shprehimisht me vendim të Këshillit të Ministrave.
4. Niveli i aksesimit në bazën e të dhënave të SEMDRK-së është, si më poshtë vijon:
a) Veprimet në regjistër kryhen nga struktura përgjegjëse për antikorrupsionin në Ministrinë e Drejtësisë, e cila ka të drejta regjistrimi, përpunimi, raportimi, leximi, shkrimi, delegimi te koordinatori i rrjetit dhe përditësimi për të dhënat e regjistruara në regjistër;
b) Koordinatorët e Rrjetit kundër Korrupsionit kanë të drejtë të regjistrojnë, të lexojnë, të hedhin të dhëna e raporte, si dhe të modifikojnë apo të përditësojnë informacionin vetëm në lidhje me rastet përkatëse që ndiqen prej tyre;
c) Subjektet e përcaktuara në shkronjat “a” dhe “b”, të pikës 3, të këtij kreu, kanë të drejtë të kenë akses të drejtpërdrejtë dhe të pakufizuar në leximin e raporteve përfundimtare, kallëzimeve penale dhe të dhënave që lidhen me to, kur është e nevojshme për të hetuar një vepër penale.
5. Palët shkëmbejnë të dhënat personale në përputhje me qëllimin e grumbullimit të tyre, si dhe ndërmarrin masa teknike e organizative të përshtatshme për të mbrojtur të dhënat personale nga shkatërrime të paligjshme, humbje aksidentale apo nga çfarëdo forme tjetër e paligjshme përpunimi, për të mbrojtur aksesin ose përhapjen nga persona të paautorizuar, veçanërisht kur përpunimi i të dhënave bëhet në rrjet.
6. Çdo veprim në sistem lidhur me aksesin, ndryshimin, korrigjimin apo përhapjen e të dhënave duhet të lërë gjurmë me qëllim garantimin e sigurisë dhe konfidencialitetit të të dhënave personale.
IV. DISPOZITA TË FUNDIT
1. Ministria e Drejtësisë:
a) bashkëpunon dhe bashkërendon punën me Agjencinë Kombëtare të Shoqërisë së Informacionit (këtu e në vijim “AKSHI”) për ngritjen dhe hostimin e sistemit;
b) mbikëqyr dhe ofron asistencë teknike në bashkëpunim me AKSHI-n për përdorimin e sistemit.
2. SEMDRK-ja, si bazë të dhënash shtetërore, bëhet në formatin “web-based” dhe hostohet në serverat e AKSHI-t.
3. AKSHI, në cilësinë e autoritetit rregullator koordinues të bazave të të dhënave shtetërore, është përgjegjës për krijimin e kushteve të nevojshme teknike dhe organizative që sigurojnë ndërveprimin e SEMDRK-së me bazat e tjera të të dhënave shtetërore.
4. Rregullat për organizimin dhe funksionimin e brendshëm të SEMDRK-së përcaktohen nga ministri përgjegjës për çështjet kundër korrupsionit, në përputhje me standardet, rregullat dhe procedurat e përcaktuara në nenin 10, të ligjit nr.10325, datë 23.9.2010, “Për bazat e të dhënave shtetërore”.
5. Vendimi nr.824, datë 7.10.2015, i Këshillit të Ministrave, “Për krijimin, administrimin dhe përdorimin e Sistemit Elektronik për Regjistrimin dhe Gjurmimin e të Dhënave mbi Rastet e Korrupsionit dhe Statistikave të Harmonizuara”, shfuqizohet.
6. Ngarkohen Ministria e Drejtësisë, Agjencia Kombëtare e Shoqërisë së Informacionit dhe koordinatorët e Rrjetit kundër Korrupsionit për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN, NË PARIM, TË MARRËVESHJES SË FINANCIMIT, NDËRMJET REPUBLIKËS SË SHQIPËRISË, PËRFAQËSUAR NGA KËSHILLI I MINISTRAVE I REPUBLIKËS SË SHQIPËRISË, DHE KOMISIONIT EVROPIAN, NË LIDHJE ME PROGRAMIN VJETOR KOMBËTAR PËR SHQIPËRINË PËR VITIN 2021, NË KUADËR TË INSTRUMENTIT TË ASISTENCËS SË PARAANËTARËSIMIT (IPA III)
Në mbështetje të nenit 100 të Kushtetutës dhe nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e Kryeministrit, Këshilli i Ministrave
V E N D O S I:
Miratimin, në parim, të marrëveshjes së financimit, ndërmjet Republikës së Shqipërisë, përfaqësuar nga Këshilli i Ministrave i Republikës së Shqipërisë, dhe Komisionit Evropian, në lidhje me programin vjetor kombëtar për Shqipërinë për vitin 2021, në kuadër të Instrumentit të Asistencës së Paraanëtarësimit (IPA III), sipas tekstit që i bashkëlidhet këtij vendimi.
Ky vendim hyn në fuqi menjëherë.
KRYEMINISTRI
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN E MARRËVESHJES, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË REPUBLIKËS SË KAZAKISTANIT, PËR PËRJASHTIMIN E NDËRSJELLË TË KËRKESAVE PËR VIZA
Në mbështetje të nenit 100 të Kushtetutës dhe të nenit 19, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit për Evropën dhe Punët e Jashtme, Këshilli i Ministrave
V E N D O S I:
Miratimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës së Kazakistanit, për përjashtimin e ndërsjellë të kërkesave për viza, sipas tekstit që i bashkëlidhet këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
DISA NDRYSHIME NË VENDIMIN NR.19, DATË 16.1.2019, TË KËSHILLIT TË MINISTRAVE, “PËR SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA REALIZIMI I PROJEKTIT “PËR RIKUALIFIKIMIN URBAN DHE ZHVILLIMIN E BLLOKUT NR.2, QENDRA E QYTETIT ROSKOVEC”, TË NDRYSHUAR”
Në mbështetje të nenit 100 të Kushtetutës dhe të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
I. Në vendimin nr.19, datë 16.1.2019, të Këshillit të Ministrave, të ndryshuar, bëhen këto ndryshime:
1. Në pikën 3, vlera e përgjithshme e shpronësimit prej “… 30 755 074 (tridhjetë milionë e shtatëqind e pesëdhjetë e pesë mijë e shtatëdhjetë e katër) lekësh …” zëvendësohet me vlerën “… 26 117 513.4 (njëzet e gjashtë milionë e njëqind e shtatëmbëdhjetë mijë e pesëqind e trembëdhjetë pikë katër) lekësh …”.
2. Pika 4 ndryshohet, si më poshtë vijon:
“4. Vlera e përgjithshme e shpronësimit, për pasuritë e llojit “truall” dhe “ndërtesë”, me vlerë 26 117 513.4 (njëzet e gjashtë milionë e njëqind e shtatëmbëdhjetë mijë e pesëqind e trembëdhjetë pikë katër) lekë, përballohet, si më poshtë vijon:
a) 24 435 412 (njëzet e katër milionë e katërqind e tridhjetë e pesë mijë e katërqind e dymbëdhjetë) lekë, nga llogaria “Fondi i shpronësimeve”, në Bankën e Shqipërisë;
b) 1 682 101.4 (një milion e gjashtëqind e tetëdhjetë e dy mijë e njëqind e një pikë katër) lekë, nga buxheti i miratuar për Ministrinë e Infrastrukturës dhe Energjisë.”.
3. Pasuritë me nr.2/170+1-3, nr.2/170+1-2, nr. 2/170-N1, nr.2/170+1-1, që përkojnë me numrat rendorë 10,12,13 dhe 15, hiqen nga tabela e shpronësimit, që i bashkëlidhet këtij vendimi. Të dhënat e numrit rendor 14, për pasurinë 2/170, ZK 3196, në tabelën bashkëlidhur vendimit, zëvendësohen me të dhënat në tabelën, që i bashkëlidhen këtij vendimi.
II. Shpenzimet procedurale, në vlerën 50 000 (pesëdhjetë mijë) lekë, përballohen nga Bashkia Roskovec.
III. Ngarkohen Ministria e Infrastrukturës dhe Energjisë, Ministria e Financave dhe Ekonomisë, Bashkia Roskovec dhe Agjencia Shtetërore e Kadastrës, Drejtoria Vendore Fier, për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
PJESËMARRJEN E PERSONELIT TË FORCAVE TË ARMATOSURA TË REPUBLIKËS SË SHQIPËRISË NË OPERACIONIN E PREZENCËS DHE VIGJILENCËS SË PËRFORCUAR (EVA), DREJTUAR NGA NATO-JA, NË BULLGARI
Në mbështetje të nenit 100 të Kushtetutës, të pikës 1, të nenit 7, të ligjit nr.9363, datë 24.3.2005, “Për dërgimin e Forcave të Armatosura të Republikës së Shqipërisë jashtë vendit, si dhe për mënyrën e procedurat e vendosjes dhe kalimit të forcave ushtarake të huaja në territorin e Republikës së Shqipërisë”, të ndryshuar, të shkronjës “ç”, të nenit 11, të ligjit nr.64/2014, “Për pushtetet dhe autoritetet e drejtimit e të komandimit të Forcave të Armatosura të Republikës së Shqipërisë”, të ndryshuar, me propozimin e ministrit të Mbrojtjes, Këshilli i Ministrave
V E N D O S I:
1. Dërgimin me mision të një toge, të përbërë nga 30 (tridhjetë) ushtarakë të Forcave të Armatosura të Republikës së Shqipërisë, në operacionin e prezencës dhe vigjilencës së përforcuar (eVA), drejtuar nga NATO-ja, në Bullgari.
2. Misioni i personelit të Forcave të Armatosura të Republikës së Shqipërisë është kryerja e detyrave në mbështetje të grup-batalionit shumëkombësh për sigurinë e kufirit lindor të Aleancës, në zonën e caktuar të përgjegjësisë.
3. Venddislokimi i togës së Forcave të Armatosura të Republikës së Shqipërisë është në Novoselo, Bullgari.
4. Kohëzgjatja e këtij misioni është 3 vjet, me sistem rotacioni. Periudha e rotacionit, për çdo togë, është 180 (njëqind e tetëdhjetë) ditë, së cilës i shtohen edhe ditët e qëndrimit për ndërrimin me togën e radhës.
5. Ministria e Mbrojtjes, për ushtarakët pjesëmarrës në këtë operacion, përballon shpenzimet për:
a) dieta për ditët e qëndrimit, në masën 6 000 (gjashtë mijë) lekë në ditë, përveç pagës mujore;
b) akomodim;
c) ushqim;
ç) lavanderi;
d) sigurimin e jetës;
dh) siguracionin shëndetësor jashtë zonës së operacionit;
e) mbështetje shëndetësore;
ë) shpenzime për telefon, internet dhe shërbime postare;
f) transport;
g) transportimin e individëve të shkëputur të misionit për në atdhe në rast vdekjeje, sëmundjeje ose thyerjeje disipline;
gj) aktivitete social-kulturore, në rastet e festave kombëtare, gjatë kohës së kryerjes së misionit;
h) çdo shpenzim tjetër për mbarëvajtjen e kryerjes së operacionit.
6. Transporti i personelit që merr pjesë në misionin në Bullgari, ndërsa nis, ndryshon dhe përfundon detyrën për t’u kthyer në Shqipëri, mbështetja shëndetësore, akomodimi, ushqimi, uji, lavanderia, transporti i individëve të shkëputur nga operacioni për në atdhe, në rast vdekjeje, sëmundjeje ose thyerjeje disipline përballohen nga buxheti i Ministrisë së Mbrojtjes, përveç rasteve kur arrihet nënshkrimi i marrëveshjeve dy- ose shumëpalëshe, ku pala/palët tjetër/e tjera të marrë/marrin përsipër të përballojë/përballojnë këto shpenzime.
7. Efektet financiare, që rrjedhin nga zbatimi i këtij vendimi, përballohen nga buxheti i Ministrisë së Mbrojtjes për vitin 2022.
8. Ngarkohet Ministria e Mbrojtjes për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN, NË PARIM, TË MARRËVESHJES PËR HEQJEN E TARIFAVE DHE TARIFAVE ADMINISTRATIVE NË LIDHJE ME INSPEKTIMIN E IMPORTIT TË PRODUKTEVE BUJQËSORE NË BALLKANIN PERËNDIMOR
Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Bujqësisë dhe Zhvillimit Rural, Këshilli i Ministrave
V E N D O S I:
Miratimin, në parim, të marrëveshjes për heqjen e tarifave dhe tarifave administrative në lidhje me inspektimin e importit të produkteve bujqësore në Ballkanin Perëndimor.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE DHE SHKËMBIMIN E PRONËS, NË FUNKSION TË PROCESIT TË RINDËRTIMIT NË ZONËN E RE PËR ZHVILLIM, LAÇ 1/2, BASHKIA KURBIN, FAZA 1
Në mbështetje të nenit 100 të Kushtetutës, të neneve 5, pika 1, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, të aktit normativ nr.9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”, miratuar me ligjin nr.97/2019, dhe në vijim të vendimit nr.7, datë 6.1.2020, të Këshillit të Ministrave, “Për kushtet dhe procedurat për shpronësimet dhe/ose shkëmbimin e pronës, për interes publik, në funksion të procesit të rindërtimit”, të ndryshuar, e të vendimit nr.8, datë 6.1.2020, të Këshillit të Ministrave, “Për përcaktimin e kushteve dhe të kritereve të përfitimit të sipërfaqeve ndërtimore në objektet e reja për banim nga subjektet që posedojnë ndërtime të klasifikuara si ndërtime pa leje”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
1. Shpronësimin, për interes publik, të pronarëve të pasurive të paluajtshme, pronë private, dhe shkëmbimin e pronës, në funksion të procesit të rindërtimit në zonën e re për zhvillim, Laç 1/2, Bashkia Kurbin, faza 1, sipas tabelës që i bashkëlidhet këtij vendimi.
2. Shpronësimi dhe shkëmbimi i pronës bëhen në favor të Bashkisë Kurbin.
3. Shkëmbimi i pasurive të paluajtshme, pronë private, për të cilat pronarët kanë pranuar kompensimin, me shkëmbim, për pasuritë e llojit “ndërtesë banimi” dhe “ndërtesë jobanimi”, me një pasuri të ardhshme në pronësi të shtetit, bëhet referuar legjislacionit në fuqi, sipas cilësimeve në tabelën që i bashkëlidhet këtij vendimi, si dhe marrëveshjeve/kontratave paraprake, që janë lidhur dhe do të lidhen, ndërmjet Bashkisë Kurbin dhe qytetarëve që shprehin dakordësinë, brenda periudhës së zbatimit të projektit.
4. Pronarët e pasurive të paluajtshme, që shpronësohen, kompensohen në vlerë të plotë, sipas masës së kompensimit përkatës, që paraqitet në tabelën që i bashkëlidhet këtij vendimi, për pasuritë e llojit “truall”, “ndërtesë banimi” dhe “ndërtesë jobanimi”, në vlerën 5 944 008 (pesë milionë e nëntëqind e dyzet e katër mijë e tetë) lekë.
5. Vlera e përgjithshme e kompensimit, prej 5 944 008 (pesë milionë e nëntëqind e dyzet e katër mijë e tetë) lekësh, përballohet nga shpenzimet e fondit të rindërtimit dhe i transferohet Bashkisë Kurbin në buxhetin e vitit 2022, në formën e transfertës së pakushtëzuar.
6. Pronarët e pasqyruar në tabelën, që i bashkëlidhet këtij vendimi, kompensohen për efekt shpronësimi, pasi të kenë paraqitur certifikatën e pronësisë origjinale ose dublikatë, kartelën e pasurisë të rifreskuar, si dhe hartën treguese të regjistrimit pranë Bashkisë Kurbin, referuar aktmarrëveshjes së lidhur.
7. Shpronësimi fillon menjëherë nga hyrja në fuqi e këtij vendimi.
8. Bashkia Kurbin kryen likuidimin e pronarëve të pasurive të paluajtshme, pronë private, të shpronësuar dhe bën shkëmbimin e pronës, referuar aktmarrëveshjeve të lidhura.
9. Afati i kryerjes së shpronësimit në vlerë monetare do të jetë momenti i fillimit të realizimit të projektit. Afati i kryerjes së shkëmbimit të pronës private me një pronë shtetërore të ardhshme, sipas marrëveshjeve të nënshkruara, do të jetë në përfundim të realizimit të rindërtimit në zonën e re për zhvillim, Laç 1/2, Bashkia Kurbin, faza 1.
10. Bashkia Kurbin i kërkon Agjencisë Shtetërore të Kadastrës që, brenda 30 (tridhjetë) ditëve nga hyrja në fuqi e vendimit të shpronësimit dhe të shkëmbimit ose nga data që ka marrë formë të prerë vendimi i gjykatës, në rast se kompensimi kryhet nëpërmjet shkëmbimit të pronës private me një pasuri shtetërore të ardhshme, në kartelën e pasurisë për pronën “truall”, ku do të krijohet pasuria e ardhshme, regjistruar në Agjencinë Shtetërore të Kadastrës, të bëjë regjistrimin e barrës ligjore, sipas legjislacionit në fuqi, në favor të pronarit privat, për përfitimin në të ardhmen të pasurisë shtetërore, kur kjo e fundit të regjistrohet në Agjencinë Shtetërore të Kadastrës. Kur pronari/pronarët privatë ka/kanë pranuar kushtet e shkëmbimit, pjesë të kërkesës për regjistrim janë dhe marrëveshjet përkatëse. Me regjistrimin e pasurisë së ardhshme në regjistrin përkatës pranë Agjencisë Shtetërore të Kadastrës, me kërkesë të njësisë zbatuese (Fondi Shqiptar i Zhvillimit) dhe të përfaqësuesit të pronarit shtet (Bashkia Kurbin) bëhet regjistrimi i kalimit të të drejtave të pronësisë për pronën shtet, në favor të pronarit privat.
11. Bashkia Kurbin, brenda 30 (tridhjetë) ditëve nga data e hyrjes në fuqi të vendimit të Këshillit të Ministrave për shpronësimin, i kërkon Agjencisë Shtetërore së Kadastrës të kryejë regjistrimin e pasurive, pronë private të shpronësuara, sipas legjislacionit në fuqi dhe referuar aktmarrëveshjes së lidhur.
12. Gjatë periudhës së zbatimit të projektit, (përfundimi i punimeve) qytetarët, nëse nuk kanë në pronësi ose në posedim objekte të tjera banimi, do të strehohen nga njësia e vetëqeverisjes vendore nëpërmjet programeve të rindërtimit, të parashikuara në aktin normativ nr.9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”, ose në legjislacionin në fuqi për strehimin social.
13. Agjencia Shtetërore e Kadastrës pezullon të gjitha transaksionet me pasuritë e shpronësuara, deri në momentin kur do të realizohen procesi i hedhjes së gjurmës së projektit mbi hartat kadastrale dhe regjistrimi i kalimit të pronësisë në favor të Bashkisë Kurbin për pasuritë e shpronësuara.
14. Shpenzimet procedurale, në vlerën 70 000 (shtatëdhjetë mijë) lekë, përballohen nga buxheti i miratuar për Ministrinë e Infrastrukturës dhe Energjisë.
15. Ngarkohen Ministria e Infrastrukturës dhe Energjisë, Ministria e Financave dhe Ekonomisë, Agjencia Shtetërore e Kadastrës, Bashkia Kurbin dhe Fondi Shqiptar i Zhvillimit për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA REALIZIMI I PROJEKTIT “NDËRTIMI I NËNSTACIONIT TË RI 110/20 KV, VALIAS”
Në mbështetje të nenit 100 të Kushtetutës dhe të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
1. Shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Ndërtimi i nënstacionit të ri 110/20 kV, Valias”.
2. Shpronësimi bëhet në favor të Operatorit të Shpërndarjes së Energjisë Elektrike.
3. Pronarët e pasurive të paluajtshme, pronë private, që shpronësohen, kompensohen, në vlerë të plotë, sipas masës përkatëse, që paraqitet në tabelën që i bashkëlidhet këtij vendimi, për pasuritë e llojit “arë”, me një vlerë të përgjithshme prej 1 728 384 (një milion e shtatëqind e njëzet e tetë mijë e treqind e tetëdhjetë e katër) lekësh.
4. Vlera e përgjithshme e shpronësimit, prej 1 728 384 (një milion e shtatëqind e njëzet e tetë mijë e treqind e tetëdhjetë e katër) lekësh, përballohet nga Operatori i Shpërndarjes së Energjisë Elektrike.
5. Vlera e shpenzimeve procedurale, në masën 50 000 (pesëdhjetë mijë) lekë, përballohet nga Operatori i Shpërndarjes së Energjisë Elektrike.
6. Shpronësimi fillon menjëherë pas botimit të këtij vendimi në “Fletoren zyrtare” dhe afati i përfundimit të shpronësimit është brenda 3 (tre) muajve nga data e hyrjes në fuqi të tij.
7. Pronarët e pasurive të paluajtshme, pronë private, të pasqyruar në tabelën që i bashkëlidhet këtij vendimi, kompensohen, për efekt shpronësimi, pasi të kenë paraqitur dokumentacionin justifikues për likuidim pranë Operatorit të Shpërndarjes së Energjisë Elektrike.
8. Operatori i Shpërndarjes së Energjisë Elektrike kryen procedurat për likuidimin e pronarëve të shpronësuar, sipas përcaktimeve të bëra në këtë vendim.
9. Afati i fillimit dhe i përfundimit të punimeve është në përputhje me afatet e parashikuara nga Operatori i Shpërndarjes së Energjisë Elektrike.
10. Agjencia Shtetërore e Kadastrës, Drejtoria Vendore Kamzë-Vorë, pezullon të gjitha transaksionet me pasuritë e shpronësuara, deri në momentin e realizimit të procesit të hedhjes së gjurmës së projektit mbi hartën kadastrale dhe regjistrimit të aktit të kalimit të pronësisë në favor të Operatorit të Shpërndarjes së Energjisë Elektrike për pasuritë e shpronësuara.
11. Agjencia Shtetërore e Kadastrës, brenda 30 (tridhjetë) ditëve nga data e miratimit të këtij vendimi, nis procedurat për hedhjen e gjurmës së projektit mbi hartën kadastrale, sipas planimetrisë së shpronësimit të miratuar, dhe regjistron aktin e kalimit të pronësisë për pasuritë e shpronësuara në favor të Operatorit të Shpërndarjes së Energjisë Elektrike.
12. Ngarkohen Ministria e Infrastrukturës dhe Energjisë, Agjencia Shtetërore për Shpronësimin, Operatori i Shpërndarjes së Energjisë Elektrike, Agjencia Shtetërore e Kadastrës, Drejtoria Vendore Kamzë-Vorë, dhe Drejtoria e Miradministrimit dhe Mbrojtjes së Tokës pranë Këshillit të Qarkut Tiranë për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU