Viti i ri shkollor 2025-2026 do të nisë më 8 shtator për arsimin bazë dhe arsimin e mesëm të lartë, duke ftuar nxënësit në një vit të ri sfidash dhe arritjesh në rrugën e dijes.

Ministria e Arsimit dhe Sportit përmes infografëve, detajoi sot datat e fillimit dhe mbarimit të shkollës, datat e pushimeve, datat e provimeve kombëtare, afatet e regjistrimit në shkollë dhe tërheqjen e librave falas, si dhe informoi mbi disa rregulla bazë që nxënësit duhet të zbatojnë gjatë procesit mësimor.

Me një rëndësi të veçantë mbetet komunikimi dhe bashkëpunimi prind – shkollë, i cili këtë vit do të pasurohet me shtimin e hapësirave të reja në platformën SMIP mbi cilësinë e mësimdhënies dhe orientimin e karrierës së fëmijës.

Po ashtu shërbimi psiko-social dhe oficerët e sigurisë do të ofrojnë këtë vit shkollor standarde të reja për mbështetje më efektive dhe për një ambient më të sigurt në shkollë.

Ndërkohë që, mundësi të reja do të shpalosen për zhvillimin e fëmijëve përmes përdorimit të gjerë të laboratorëve inteligjentë në lëndë shkencore, teknologji, gjuhë të huaja dhe projekte praktike. Ndërsa aktivitetet në nivel kombëtar do të pasurohen me Konkursin kombëtar të teatrit për shkollat 9 –vjeçare, Festivalin e shkencës për shkollat e mesme dhe Konkursin Kombëtar të Gjuhës Shqipe për klasat e IX.