Ministri Karakaçi në Konferencën e Energjisë në Athinë: Shqipëria po konsolidohet si nyje strategjike energjetike në rajon

Ministri i Infrastrukturës dhe Energjisë, Enea Karakaçi, mori pjesë në Konferencën e Energjisë të organizuar në Athinë nga Financial Times dhe Kathimerini, ku bashkë me ministrat e energjisë të vendeve të rajonit diskutoi mbi sfidat, projektet strategjike dhe të ardhmen energjetike të Europës Juglindore.

Gjatë prononcimit, ministri Karakaçi vuri theksin tek pozicionimi strategjik i Shqipërisë në rrjetin rajonal të transmetimit të energjisë, duke nënvizuar ndërlidhjet ekzistuese me vendet fqinje dhe avancimin mbi 90% të punimeve për linjën e interkonjeksionit me Maqedoninë e Veriut. Ai prezantoi gjithashtu projektet për lidhjen energjetike me Italinë, si pjesë e vizionit për forcimin e interkonjektivitetit rajonal.

Një fokus i veçantë iu kushtua partneritetit strategjik me SHBA-në dhe marrëveshjeve të fundit që synojnë transformimin e Vlorës në një qendër gravitacionale për transmetimin e gazit natyror në rajon. Ministri theksoi se Shqipëria, duke prodhuar 100% të energjisë nga burime të rinovueshme, ka kapacitetin të integrojë edhe gazin natyror pa cenuar objektivat kombëtare dhe ato të European Union për energjinë e gjelbër.

Karakaçi ndau gjithashtu progresin e Shqipërisë në diversifikimin e burimeve të energjisë, duke evidentuar rritjen e prodhimit nga energjia fotovoltaike, që tashmë përbën mbi 10% të prodhimit vendas të energjisë. Sipas tij, ky zhvillim është rezultat i politikave mbështetëse të qeverisë shqiptare dhe investimeve private në sektor.

Gjatë qëndrimit në Athinë, ministri zhvilloi edhe një takim bilateral me ministrin grek të energjisë, ku u diskutua mbi zgjerimin e bashkëpunimit mes dy vendeve, përfshirë projektin për një linjë të dytë interkonjeksioni Shqipëri-Greqi dhe bashkëpunimin mes bursës shqiptare dhe asaj greke të energjisë elektrike.